Säämi |

Kuldâl jienâ: Nubbe váldá vissásávt koronapuáhuttâs, nubbe ij val tieđe – Kerttu Paltto: "Kalehân maaŋgâláán smiettâmušah láá"

Kerttu Paltto já Jari Linjama muštâlává jurduidis koronapuáhuttâsâst.

Kerttu Paltto
Avveellâš Kerttu Paltto ij val tieđe váldá-uv koronapuáhuttâs vâi ij. Sun haalijd vyerdiđ puátusijd vistig. Govva: Anja Kaarret / Yle

Suomâst já olgoenâmijn láá tääl álgám puáhuttiđ ulmuid. Anarist já Suáđikylást puáhutškuottii sosiaal- já tiervâsvuođâsyergi pargeid onne majebaargâ. Ucjuuvâst algâttii jo moonnâm ohhoost. Puáhuttâsâh valmâštuvvojii jotelis äigitavluin já eereeb iärrás tondiet motomeh ulmuuh val smiettih puáhuttâs väldim já torvolâšvuođâ.

Avveellâš Kerttu Paltto ij lah val vises áigu-uv sun väldiđ koronapuáhuttâs.

– Jiem mun vala tieđe, ko kalehân maaŋgâláán smiettâmušah láá. Ferttee tääl kuldâlâđ, ko puákutteh olgoenâmijn já Suomâst, magareh puátuseh tobbeen puátih tääl.

Sun čuávu koronapuáhuttâs savâstâllâm mediast, mutâ ij jieš aktiivlávt uusâ koronauđđâsijd. Oovtâ uuđâs sun kuittâg eromâšávt vuárdá.

– Mun lam kuldâlâm, et kuás tot president Niinistö váldá tom puákuttâs. Mun lam vuárdám toid, et kuás sij väldih, et mon ruokkâdeh toh sijgis láá.

Paltto ij lah mongin kooskâst lamaš aaibâs vises váldá-uv puáhuttâs vâi ij. Suu alge puáhutteh vuossâmui juávhust, já Paltto áigu tárkká čuávvuđ, mii sunjin já iärrásáid kiäid puáhutteh tábáhtuvá.

– Muu ovdiibeln láá maŋgâ kiäid puákutteh, te ferttee kuldâlâđ já čuávvuđ tärkkilávt-uv talle ko älgih taan kuávlust-uv puákuttiđ ulmuid.

Suomâst vuossâmužžân puáhuttâsâid finnejeh sosiaal -já tiervâsvuođâ syergi pargeeh já riskâjuávhu ulmuuh. Eres ulmuuh finnejeh puáhuttâs maŋeláá.

Avveellâš Kerttu Paltto muštâl jurduidis koronapuáhuttâsâst Tiervâ-vuolgâttâsâst. Jietna: Anja Kaarret / Yle

Kanttor Jari Linjama vuálgá maassâd máátâš.
Kanttor Jari Linjama áigu vissásávt väldiđ koronapuáhuttâs tállán ko suu vuáru puátá. Govva: Anja Kaarret / Yle

Kanttor áigu väldiđ koronapuáhuttâs: "Must ij lah mihheen tom vuástá aainâskin"

Orivesist ässee kanttor Jari Linjama ij lah vuossâmui juávhust finniimin koronapuáhuttâs, mutâ lii kuittâg jo smiettâm ääši.

– Kale oskom, et lam tom väldimin. Must ij lah mihheen tom vuástá aainâskin.

Sun lii pargostis ohtâvuođâst puáris ulmuigin, já tot lii meid ohtâ suijâ toos, mondiet sun kalga väldiđ koronapuáhuttâs.

– Pargoost lii jo taggaar koččoom lamaš, et influenssa puáhuttâs kolgâččij väldiđ, te oskoččim et talle ko muu vuáru puátá, te kolgâččij koronapuáhuttâs väldiđ, sun arvâl.

Jari Linjama muštâlij Tiervâ-vuolgâttâsâst jurduidis koronapuáhuttâsâst. Jietna: Anja Kaarret / Yle

Varrasamosat: Säämi

Váldoođđasat

Varrasamosat

Muualla Yle.fi:ssä