Säämi |

Kuldâl jienâ: Tääl puáhtá iävtuttiđ noomâ anarâškielâ viereskielâ oppâkiirján

Noomâ puáhtá iävtuttiđ Facebookist Anarâškielâ orroomviste -juávhust.

Miina Seurujärvi kappeerkuursâ jođetteijee.
Sämitige oppâmateriaal vuávájeijee Miina Seurujärvi loppeed palhâšume toos kote hutká noomâ uđđâ oppâkiirján. Govva: Mikkal Morottaja / Yle

Sämitige oppâmateriaal toimâttuvvâst lii pargo vyelni uđđâ kirje anarâškielân. Taat uđđâ kirje lii uáivildum 7.–9. luokkalijd, kiäh loheh anarâškielâ viereskiellân.

Vierâskielâ oppâkirjeh láá mottoom verd, tego ovdâmerkkân Kielâkyeimi, mii lii uáivildum sehe luvâttuv uáppeid ete vuorâsulmuid, já Hitruu!-ráiđu mii lii uáivildum 3.–6. luokkalijd. Paješkovlâlijd uáivildum viereskielâ oppâkiirján lii-uv tárbu.

– Kirje lii eskân vuávámmuddoost. Tággáár kirje eidu paješkoovlân ij lah, muštâl sämitige oppâmateriaal vuávájeijee Miina Seurujärvi.

Tääl puohah kiäh láá Facebookist pyehtih iävtuttiđ noomâ taan uđđâ oppâkiirján. Seurujärvi lii Facebookist Anarâškielâ orroomviste -juávhust koijâdâllâm nommâiävtuttâsâid já toho láá-uv puáttám maaŋgâlágáneh iävtuttâsah.

– Ovdâmerkkân tagareh ko Čeppi, Kielâtobdo, Sáárnu, Sáámást, Aarni, Kollekielâ já Kielâkerris.

Veikkâ puátteš oppâmateriaal pargojuávkku meerrid-uv lopâlii noomâ, te Seurujärvi loppeed palhâšume toos, kii hutká noomâ uđđâ oppâkiirján.

– Puávtám lopediđ, et kii lii iävtuttâm tom noomâ kiirján, te finnee talle tom vuossâmuu kirje ko tot lii vaalmâš já almostum, loppeed Seurujärvi.

kirja
Virkkuuvääri kirjeráiđu lii uáivildum anarâškielâ eenikielâ lohheid. Kirjárááiđu niäljád uási almostui čohčuv. Govva: Sáárá Seipiharju / Yle

Eenikielâlijd oppâkirjeh láá niäljád luoka räi

Oppâkiirjij rähtim ij lah mihheen jotelumos hommáid. Vuávámpargo algâttem maŋa kolá kuittâg ohtâ ihe, táválávt val kuhheeb äigi, ovdil ko kirje lii vaalmâš. Uđđâ oppâkirje ferttee vuáváđ, sárguđ kuuvijd, čäälliđ teevstâid já uuccâđ val rähtee, kote ráhtá taan oppâkirje.

– Kalga koijâdâllâđ, ete kiäst lii máttu já asto, iätá Seurujärvi.

Eenikielâ uáppei oppâkirjetile ij lah raappâd. Eenikielâ oppâkirjeh láá niäljád luoka räi. Seurujärvi muštâl, et čohčuv almostui Virkkuuvääri-rááiđu niäljád uási eenikielâlijd uáppeid.

Sämitige oppâmateriaal vuávájeijee Miina Seurujärvi muštâl maggaar kiirján kolgâččij hutkâđ noomâ já magareh kirjeh anarâškielân jo kávnojeh. Jietna: Anja Kaarret / Yle

Varrasamosat: Säämi

Váldoođđasat

Varrasamosat

Muualla Yle.fi:ssä