Sápmi |

Kulturmearreruđain almmustahttet Norggas 18 sámemusihkkaskearru, Suomas ovtta

Norgga Sámedikkis lea ruhta, mainna doarjut sámekultuvrra. Daiguin ruđaiguin sii ruhtadit earret eará 18 ođđa sámemusihkka-CD:a. Suopma vatná kulturmearreruđain reahkkái doarjja dušše ovtta CD:ai.

Iŋgá-Máret Gaup-Juuso
Inga-Máret Gaup-Juuso lei áidna gii oažžui musihkabuvttadeapmái ruhtadeami Suoma sámedikki kulturlávdegottis. Govva: Nilla-Máhtte Magga

Guktuin riikkain, Suomas ja Norggas juolludit sámekultuvrii sierra mearreruđaid. Mearreruđaiguin dorjot ovttat dáiddáriid, muhto maid servviid dahje fidnuid maiguin lágidit dáhpáhusaid.

Guktuin riikkain ruđaid badjel mearrida ja ohcamušaid gieđahallá Sámediggi. Suomas Sámedikki kulturlávdegoddi ja Norggas fas Sámediggeráđđi.

Erohusa dan guovtti riikka gaskkas ii leat vuogádagain, muhto baicca ruhtasupmiin. Suomas Sámedikki kulturlávdegottis lei dán jagi 176 000 euro mainna doarjut sámi kultuvrra Suomas. Seammá áigge Norggas bastet doarjut árbedieđu, dearvvašvuođa, ealáhusaid, giela ja máhtu fitnuid oktiibuot gosii 2,5 miljon euroin. Dat lea 14 geardde eambbo go Suoma kulturmearreruđat.

Suomas ruhta ovtta CD:ai, Norggas juolludedje ruđa 18 skearru buvttadeapmái

Suoma Sámediggi basttii dán jagi juolludit doarjaga dušše ovtta musihkkaprošektii, juoigi Ingá-Máret Gaup-Juuso oaččui CD-skearru almmustahttimii 4 000 euro.

Norggas sullii 1,16 miljon euro mearreruđain leat várrejuvvon kultursuorgái, dego skearruid dahje girjjiid almmuhemiide. Dan ruhtasupmis Norgga Sámediggi lea addán ruhtadeami earret eará 18 sámemusihkkara ođđa CD: a almmuheapmái. Doarjaga CD-skearru almmustahttimii leat ožžon earret eará Elin Kåven ja Felgen Orkester.

Maiddái juolluduvvon ruhtasupmiin lea stuorra erohus Suoma ja Norgga gaskkas. Sámedikki CD-skearruid almmustahttindoarjja Norggas lei sullii 8 700 euros gitta 20 000 euroi. Gaskamearálaččat ovtta musihkaskearru almmuheapmái Norgga Sámediggi juolludii 15 000 euro.

Seammá áigge Suoma beale luohteskerrui gávdnui 4 000 euro. Nappo Norgga beale juolluduvvon gaskamearálaš supmige lea gosii njealjegeardásaš dán supmi ektui, maid Ingá-Máret Gaup-Juuso oaččui iežas CD:ai Suomas.

Varrasamosat: Sápmi

Váldoođđasat

Varrasamosat

Muualla Yle.fi:ssä