Sää´mjânnam |

Kuvddâl jiõn: Ǩiõllpieʹzzest škoouʹle -haʹŋǩǩõs vuõʹlji jottu – Čeʹvetjääuʹrest vuõrsmam Anna-Katariina Feodoroff kueiʹmmuʹčteeʹlen oouʹdeed sääʹm-mättʼtõõzz

Ǩiõllpieʹzzest škoouʹle -haʹŋǩǩõõzz täävtõssân lij viikkâd ooudâs nuõrttsääʹmǩiõllsaž mättʼtõõzz. Čeʹvetjäuʹrrneǩ Anna-Katariina Feodoroff alttii kueiʹmmuʹčteeʹlen vueʹssmannu aalǥâst. Õinn haʹŋǩǩõʹsse ooʒʒât še nuuʹbb uʹčteeʹl tuõjju.

Anna-Katariina Feodoroff valittiin Kolttakulttuurisäätiö Ǩiõllpieʹzzest škoouʹle -hankkeen opettajaksi kehittämään kolttasaamelaista opetuta.
Anna-Katariina Feodoroff alttii kueiʹmmuʹčteeʹl tuâj dommsiidâst Čeʹvetjääuʹrest. Son valmštââvv Ketterä-õllškooulâst uʹčteeʹlen taʹnni. Govva: Terhi Harju / Kolttakulttuurisäätiö

Kueiʹtekksaž Ǩiõllpieʹzzest škoouʹle -haʹŋǩǩõs lij piâssâm altteed vueʹssmannu aalǥâst, ko kueiʹmmuʹčteeʹlen vaʹlljeeš Pedagogikktiõttji kandidatt Anna Katariina Feodorooff. Haʹŋǩǩõõzz täävtõssân lij lââʹzzted sääʹmpäärnai di -nuõri ǩiõlʼlaž vuõiggâdvuõđi teâuddjummuž Lääʹddjânnmest da tuärjjeed päärnai škooulpälggaz ǩiõllpieʹzzest jiiʹjjesǩiõllsaž mättʼtõõzz årra Aanar kååʹddest.

Feodoroʹffe tät haʹŋǩǩõs lij samai vääžnai. Son lij jiõčč vuäinnam, mäʹhtt nuõrttsääʹmǩiõllsaž mättmateriaal vueʹǩǩ lij hueʹnn da uʹčteeʹl lie occanj - di seeʹst lie veâl jiânnai tuâj tuejjeed õhttu.

– Siʹjjid âlgg vieʹǩǩted tän tuâjast da lââʹssen âlgg tuärjjeed da vieʹǩǩted tõid päärnaid, ǩeäk mättʼtâʹtte sääʹmǩiõl. Nuʹt sij piârrjid še. Tõt vuäitt leeʹd lossâd puärrsid da piârrjid, ǩeäk jie jiijj silttâd mainsted sääʹmǩiõl, vuäinn Feodoroff.

Nuõrttsääʹmǩiõllsaž vuâđđmättʼtõs jåått mâʹŋŋlasas

Anna-Katariina Feodoroff jiõčč lij päʹrnnpooddstes lookkâm škooulâst sääʹmǩiõl da välddam sääʹmǩiõl mieʹldes universiteʹttmäättaid še. Son lij ââʹn Lappi universiteeʹtt pedagogikktiõttji kandidatt da valmštââvv Ketterä-õllškooulâst uʹčteeʹlen taʹnni.

Juʹn Feodorooff jieʹllem ääiʹj sääʹmǩiõl sââʹjj lij ouddnam jiânnai.

Tän kõõskâst, ko son lij väʒʒam veâl päärnžen škooul kuuʹlmin da jååttam tiõđlaž maailma, lij nuõrttsääʹmǩiõlâst leämmaž vueiʹtlvaž čõõđted pâʹjjmättʼtõõtti-tuʹtǩǩõõzz säämas. Universiteeʹttin mättʼtõs lij ouddnam vueiʹvvaaunâsmäättaid da ougglõsmättʼtõs lij ouddnam kuʹǩes laauʹǩivuiʹm.

Anna-Katariina Feodoroff valittiin Kolttakulttuurisäätiö Ǩiõllpieʹzzest škoouʹle -hankkeen opettajaksi kehittämään kolttasaamelaista opetuta.
Vuõssmõs läuʹǩǩ haʹŋǩǩõõzz tuâjast lij vuäǯǯad päärnaid mieʹldd nuõrttsääʹmǩiõllsaž mättʼtõʹsse. Govva: Terhi Harju / Kolttakulttuurisäätiö

Kuuitâǥ takai vuâđđškooultõs lij pääccam Feodorooff miõlâst tuâǥǥpeälla. Ko Feodoroff leäi veâl vueʹllškooulâst, leäi suʹst vueiʹtlvaž lookkâd säämas škooulaunnsin ouddmiârkkân åskldõõǥǥ. Tän ääiʹj nuõrttsääʹmǩiõl veeʹresǩiõl da jieʹnnǩiõl mättʼtõõzz lââʹssen ij vueiʹt lookkâd jeeʹres škooulaunnsid.

– Jõs mon smiõttâm tõn vuâđđškooul pääiʹǩ, teʹl tõk ääʹšš jie leäkku jiõččääʹššest ouddnam čuuʹt jiânnai. Možât leäʹp mõõnnâm joba tuâǥǥårra. Mättmateriaal jie leäkku ääiʹjtässʼsaž jie-ǥa vaʹstted mättplaan kaiʹbbjõõzzid, mušttal kueiʹmmuʹčteeʹl Feodoroff.

Håʹt ââʹn sääʹmǩiõl vuäitt lookkâd puk Lääʹddjânnmest ougglõsõhttvuõđi pääiʹǩ, ij uʹčteeʹli mieʹrr leäkku lâssnam jiânnai.

Uʹčteeʹli peeiʹv teâuddje lââʹsstuâjain da sij taarbše pueʹrab säimmõõzz, koʹst vuäǯǯa tuärj. Ânnʼjõžäiggsaž mättmateriaal âlgg leeʹd šiõǥǥ da ââʹnteei, vuäinn Anna-Katariina Feodoroff.

– Sääʹmǩiõllsa päärna õõlǥče leeʹd tääʹssärvvsa jeärrsivuiʹm da vuäinam, što vuäitam tän tuâjast oouʹdeed täi aaʹššid.

Čeʹvetjäuʹrrneǩ Anna-Katariina Feodoroff lij vueʹssmannu aalǥâst alttääm kueiʹmmuʹčteeʹlen. Kuvddâl suu jurddjin, mõõnnalla nuõrttsääʹmǩiõllsaž mättʼtõõzz õõlǥči viikkâd ooudâs. Jietna: Sara Wesslin / Yle, Nuõrttsäämas

Puärrsid täättat vaʹstteed haʹŋǩǩõõzz kõõjjõʹsse

Ââʹn, ko haʹŋǩǩõõzz tååim lie piâssâm kuddnalla jottu, tuäivv Feodoroff, što vuõssmõs läuʹǩǩ tän tuõjju lij vuäǯǯad sääʹmǩiõllsaž päärnaid mättʼtõʹsse.

Haʹŋǩǩõõzz škooulâkksai da vuâlla škooulâkksai sääʹmpäärnai puärrsid čuäʹjtum kõõjjõʹsse lie puättam occanj vasttõõzz. Kõõjjõõzzâst seʹlvtet piârrji sââʹj da måkam taarb da tuõivvi sääʹmpäärnai piârrjin lie sääʹmǩiõl da sääʹmǩiõllsaž mättʼtõʹsse.

Kõõjjõõzz vaʹstteemääiʹj lie juätkkam 23.5.2021 räjja da kueiʹmmuʹčteeʹl auʹǯǯai puärrsid vaʹstteed kõõjjdõʹsse aktiivlânji. Kõõjjõs lij vuõlttuum puärrsid škooul pääiʹǩ, leša jõs piâr ij leäkku vuäǯǯam kõõjjõõzz, piâr vuäitt väʹldded vuõiʹǧǧest õhttvuõđ kueiʹmmuʹčteela neʹttpååʹšt pääiʹǩ.

– Tõid naaʹlid, mäʹhtt vueiʹttep tuärjjeed da vieʹǩǩted, âlgg õinn smiõttâd. Leäi jurddjen še, što ooudčim teâđ puärrsid, što måkkam vuõiggâdvuõđ päärnain lie mättʼtõʹsse.

Varrasamosat: Sää´mjânnam

Váldoođđasat

Varrasamosat

Muualla Yle.fi:ssä