Sää´mjânnam |

Kuvddâl jiõn: Nuõrttsääʹmǩiõllsaž räʹppvideoin piʹrǧǧääm nuõri fiʹlmmǩeâštõõttmõõžžin – Čeʹvetjääuʹr škooulneeʹǩǩ mieʹldd Oskari-fiʹlmmǩeâšttõõttmõõžžâst

Čeʹvetjääuʹr škooul 6. klassneeʹǩǩ Ilmari Leivo ja Aarni Seri lie taʹnni vuässõõttâm juʹn määŋgaid päärnai da nuõri fiʹlmmǩeâsttõõttmõõžžid.

Sevettijärven koululaiset Aarni Seri ja Ilmari Tanhua tekevät koltansaamenkielistä räppiä.
Aarni Seri da Ilmari Leivo äigga õinn puõʹttiääiʹj tuejjeed räʹppmusiikk säämas. Govva: Tero Harju

6. klassneeʹǩǩ Ilmari Leivo da Aarni Seri lie tuõđâst jiijjâz sääʹmǩiõllsaž räʹppmusiikkin. Tååimteei Sara Kelemeny mainstõõʹtti suännaid, što måkkam tobddmõõžžin suäna lie vuässõõttâm jeeʹresnallšem ǩeâšttõõttmõõžžid. Jietna: Sara Kelemeny / Yle

Čeʹvetjääuʹr škooulneeʹǩǩ Ilmari Leivo da Aarni Seri tuejjeem musikkvideo lij mieʹldd Kulttuurpõrtt Valve päärnaikulttuurkõõskõõzz Oskari-fiʹlmmǩeâsttõõttmõõžžâst.

Mon leäm čeäʹpp räʹppjed -nõmmsaž videoin nuõrr räʹppjeei lie juʹn ǩeâšttõõttâm nuʹt Sääʹmnuõri čeäʹppvuõttpeeiʹvest ko še Nuori kulttuuri -šõddmõõžžâst ǩeâđđa 2021. Leivo da Seri leʹjje juʹn ouddâl täi šõddmõõžži raajjâm måtam veeʹrd jiijjâz räʹppmusiikk.

– Šõõddi nåkkam toobd, što lij päkk tuejjeed ođđ rääʹpp. Ââʹn muäna alttiim aivv tuõđâst tuejjeed räʹppmusiikk. Jeäʹp leʹčče åskkam, što nääiʹt kuuʹǩǩ piâssâp da tät leʹčči mieʹldd nääiʹt määŋg pääiʹǩest, mušttle Ilmari Leivo da Aarni Seri.

Nuõrttsääʹmǩiõllsaž video ǩeâšttââtt rääidast Omin voimin, Jiijjâs viõǥǥin, da tõn vuäitt jieʹlled ǩiõččmen da jiõnsteʹmmen seeidast www.kulttuurivalve.fi/oskari-kilpailu.

Räʹppteeʹkst šâʹdde sääʹmǩiõl klaaʹssest

Škooulneeʹǩǩ lie vuäǯǯam jiânnai vieʹǩǩ Čeʹvetjääuʹr škooulâst. Suännai teeʹkst šâʹdde nuõrttsääʹmǩiõl čiâssin da škooulvieʹǩǩteei Tero Harju vieʹǩǩat nuõrid ǩeeʹrjted säämas da lij vieʹǩǩtam tuâǥǥai leʹbe nuʹtt koččum biitti vuäǯǯmõõžžâst.

Seri da Leivo lie tuejjääm räʹppmusiikk nuʹtt Maaski tueʹǩǩen -nõõmin ko še Kootkmiõhtt-nõõmin.

Suännai räʹppduo lij-i maaiʹlm vuõssmõs nuõrttsäämas räʹppjam joukk.

– Kâʹl räʹppjummuš lij vaiggääb säämas ko lääddas. Leâša kâʹl tõt lij puârast oʹnnstam. Vuõššân ǩeeʹrjtep lääddas da Tero vieʹǩǩat muännaid samai jiânnai jåårǥlâʹtted teeʹkstid säämas. Säämas räʹppjummuš miârkksââvv muännaid jiânnai, mušttle Leivo da Seri.

– Jiânnai-han tõõzz mõõnnâm škooulčiâss, leâša ij tõt leäkku häiʹttjam uʹčteeʹl. Son lij pâi leämmaž kuärǥast.

Lââʹzz sääʹmǩiõllsaž ođđsid vuäitak ǩiõččâd Yle Ođđâz-seeidast da kuvddled Nuõrttsäämas-seeidast Yle Areenast.

Varrasamosat: Sää´mjânnam

Váldoođđasat

Varrasamosat

Muualla Yle.fi:ssä