Sää´mjânnam |

Kuvddâl jiõn: Čâhčča norrum skaaʹlǯi suõusi noorrmõš Låttjooǥǥâst oʹnnsti puârast

Låttjooǥǥ skääʹlǯ lie ââʹn šõddmen Konnevesi tuʹtǩǩeemlaboratoriost luõzzi suuʹdin.

Jokihelmisimpukka eli raakku
Låttjooǥǥâst norrum skaaʹlǯi suõus lie ââʹn šõddmen Jyväskylä universiteeʹtt laboratoriost. Govva: Sara Wesslin / Yle

Čõhččmannust Låttjooǥǥâst norrum skaaʹlǯi suõus lie puârast šõddmen Jyväskylä universiteeʹtt Konnevesi laboratorio kaartin. Toʹben skaaʹlǯi suõus lie naʹddjõõttâm luõzzi suuʹdid, koʹst täk šâʹdde nuʹtt 40 mikromettar.

Jyväskylä universiteeʹtt professor Jouni Taskinen lij toođvaž. Laboratorio kaartin lie šõddmen lååimeʹt dohtid suõus.

– Vuäǯǯaim muäʹddlååi luõssââlǥaid naʹddjõõttâd täid klokidioid leʹbe suõusid. Äiʹǧǧ čuäʹjat, mõõn jiânnai vuäǯǯap skaaʹlǯid. Leâša jõs kueʹl seilla jieʹllmen, meeʹst õõlǥče leeʹd dohti mieʹldd uʹcc skääʹlǯ ištteem vääras joʹǩǩe, mušttal Jouni Taskinen.

Jietna: Yle Areena: Professor Jouni Taskinen mušttal tååimteei Sara Wesslin mainstâttmõõžžâst, måkkam sââʹjest skääʹlǯ lie ââʹn Konnevesi tuʹtǩǩeemlaboratorioin.

Teänjooǥǥâst kauʹnneš ođđ skäʹlǯǯpopulaatioid

Tâʹvv-Lääʹddjânnmest kauʹnneš mõõnni ǩieʹzz še ođđ skäʹlǯǯpopulaatioid. Populaatioid kauʹnneš ouddmiârkkân Teänjooǥǥ, Oulu- da Kemijooǥǥ di Kouta- da Tuållâmjooǥǥ čäccõõzzin

Lääʹddjânnam, Taar, Ruõcc di Ruõššjânnam kõskksaž SALMUS-haʹŋǩǩõõzzâst õõutâst Jyväskylä universiteeʹttin lij täävtõssân maaccted laboratorioin šõdduum skaaʹlǯid mååust Låttjoʹǩǩe puõʹtti čõõuč.

Taskinen vuäinn, što vaarvuâlaž skääʹlǯest lie positiivlaž vuäittmõõžž jeäʹlškueʹtted tâʹvven.

– Tuäivv lij. Tän haʹŋǩǩõõzz ääiʹj leäʹp piâssâm kuõrrâd da leäʹp kaunnâm ođđ skäʹlǯǯpopulaatioid da måtam tõin vuäiʹtte leeʹd sami jieʹllemviõkksa. Tät oudd tuäiv, što täk käunnʼjeʹčče võl jeänab.

Taskinen mieʹldd Sääʹm jooǥǥin skaaʹlǯin lie pueʹrab vuäittmõõžž jieʹllma, ko kolggâmvuuʹd lie šiõǥǥ sââʹjest.

SALMUS-haʹŋǩǩõs lij tåimmam eeʹjj 2019 rääʹjest tâʹvv čäccõõzzi skäʹlǯǯ- da luõssnaaʹli jeälltummuž ouʹdde. Haʹŋǩǩõs tåimm veâl eeʹjj 2022 loʹppe.

Varrasamosat: Sää´mjânnam

Váldoođđasat

Varrasamosat

Muualla Yle.fi:ssä