Sápmi |

Kuvddâl jiõn: Yle Sääʹmjânnam õõʹni vaalpaneeʹl sääʹmmouddoummu võboršiiʹǩǩid – vaal lij pâʹsspeeiʹv

Vaalpeiʹvv lij čõhččmannu 20. peiʹvv. Jiõnstempääiʹǩ lie Keväjääuʹrest, Njauddmest, Njeäʹllmest da Čeʹvetjääuʹrest.

Hanna-Maaria Kiprianoff ja Veikko Feodoroff
Veikko Feodoroff da Hanna-Maaria Kiprianoff Čeʹvetjääuʹrest lie võboršeʹǩǩen Saaʹmi ouddoummuvaalâst 2020. Govva: Ville-Riiko Fofonoff / Yle

Yle Sääʹmjânnam õõʹni vaalpaneeʹl sääʹmmouddoummu võboršiiʹǩǩid seärad čõhččmannu 16. peeiʹv Tiõrv-kõskkpeiʹvv-vuõlttõõzzâst.

Sääʹm ouddoummuvaal vaalpaneeʹlest leʹjje mieʹldd kueʹhtt võboršeeʹǩǩ, vaalnââmrin kueʹhtt Hanna-Maaria Kiprianoff da vaalnââmrin koumm ištti ouddooumaž Veikko Feodoroff.

Vaalpanee'l kõõččmõõžž leʹjje norrum takai säʹmmlain. Vaalpanee'l leäi Čeʹvetjääuʹrest da jååʹđteei leäi Ontrimiklai Ääʹrhep, Erkki Gauriloff.

Vaalpeiʹvv lij čõhččmannu 20. peiʹvv. Jiõnstempääiʹǩ lie Keväjääuʹrest, Njauddmest, Njeäʹllmest da Čeʹvetjääuʹrest.

Saaʹmi ouddoummuvaal 2020 vaalpanee'l. Jietna: Erkki Gauriloff / Yle

Jiõnstemšõddmõõžžâst vieʹltet âʹlddkontaaktid da jääʹǩǩtet staankõõskid

Vaal-luʹvddkåʹdd lij jäʹrjstummšest välddam lokku jeäʹrben koronaviruuzz pâššnummuž cõggmõõžž. Jiõnstempääiʹǩest tååimat Tiõrvâsvuõđ da pueʹrrvââjjam stroiʹttel di mättʼtõs- da kulttuurministeria 14.5.2020 uʹvddem koronaviruspâššnummši cõggâmvuäʹppõõzz mieʹldd, što ainsmââʹttet vaaltååimtõõzz jäʹrjstummuž staanâld.

Jiõnstemšõddmõõžžâst vieʹltet âʹlddkontaaktid da jääʹǩǩtet staankõõskid. Jiõnstemsââʹjest vuäiʹtte leeʹd kueʹhtt jiõnsteei vuârstes seʹst di jiõnstemsââ'j åålǥbeäʹlnn vueʹrdet jiõnstemvuâr nuʹtt što ââʹnet kõõsk jeeʹres jiõnsteeʹjid. Vaaltåimmšeeʹǩǩ ääʹvee uus pueʹtti da võõidi jiõnsteeʹjid da vuäʹpste jiõnsteeʹjid hygieniasiâzztõõzzi jääʹǩǩtummšest.

Vaaltåimmšeeʹǩǩ da jiõnsteei âʹnne muâttmaask jiõnstemšõddmõõžž ääiʹj. Jiõnsteei vuäitt ââʹnned jiiʹjjes muâttmaask, jiõnstempääiʹǩest vuäǯǯ ǩeʹrddmaask, jõs lij tarbb. Jiõnstempääiʹǩest jääʹǩǩtet šiõǥǥ ǩiõtt- da koossâmhygienia. Pääiʹǩest lij vuäittmõš põõssâd ǩiõđid di lie ǩiõtt-tooid da ǩeʹrddsuõrmka vuäǯǯamnalla. Jiõnstempääiʹǩ čiistât täujja jiõnstummuž ääiʹj.

Varrasamosat: Sápmi

Váldoođđasat

Varrasamosat

Muualla Yle.fi:ssä