Sápmi

Kyehti uđđâ kirje almostuumin anarâškielân! – “Sáttá joba keesi ääigi puáttiđ”

Petter Morottaja
Petter Morottaja osko, ete ulmuuh loheh anarâškielâlâš kiirjijd ain ko tagareh almostuveh. Govva: Linnea Rasmus / Yle

Anarâškielâ servi almostit čohčuv kyehti uđđâ kirje. Matti Morottaja kirje Kuobžâ-Saammâl eellimkerdi já Lee Rodgers Saammâl-kirjerááiđu čiččâd uási Saammâl já puoidâ.

Saammâl-kirjerááiđu nubben majemuš uási nommâ lii Saammâl já puoidâ. Anarâškielâ seervi pargee Kuobžâ-Saammâl Maati Petter ađai Petter Morottaja muštâl, ete kirje ij taarbâš innig kuhháá vyerdiđ.

– Sáttá joba keesi ääigi puáttiđ, Morottaja illood.

Saammâl-kirjerááiđu káávcád uási kolgâččij meid taan ive ääigi šoddâđ valmâšin. Nubbe kirje mii seervist forgâpalij almostuvá lii kuhes áigásâš proojeekt. Kirje nommâ lii Kuobžâ-Saammâl eellimkerdi.

– Tääl tot álgá leđe taggaar tiileest, ete uážu vuordâččiđ muádi mánuppaje siisâ vissâ. Tommit tehálâš proojeekt, ete tom ferttee kale fijláđ nuuvt, ete lii vissásávt vaalmâš já tuárvi pyeri, Morottaja muštâl.

Nuorâikiirjijd ferttee val vyerdiđ

Morottaja osko, ete ulmuuh loheh anarâškielâlâš kiirjijd já uáiná, ete ohtâ-uv uđđâ kirje anarâškielân lii tergâd.

– Jyehi kirje lii stuorrâ lase toos maid anarâškielân puáhtá luuhâđ, sun iätá.

Tuhháát sijđod nuorâi kirjálâšvuođâ anarâškielân-proojeekt lii meid ovdánâm kuuloold já Morottaja muštâl, ete jurgâlusah láá-uv jo šoddâm. Sun muštâl, ete lope- já teddilemaašijd ferttee čuávdiđ ovdil ko nuorâikiirjijd puáhtá almostittiđ.

– Sáttá moonnâđ kale puáttee ihán, Morottaja muštâl.

Varrasamosat

Muualla Yle.fi:ssä