Säämi |

Kyeleest-uv puáhtá kevttiđ puoh – keejâ video

Kyele čielgitaavtijn šaddeh maaŋgâlágáneh čiiŋah. Ääigi tai rähtimân kalga kuittâg väridiđ.

Video: Anne Karhu-Angeli

Aanaarlâš puásuitáálu eemeed Anne Karhu-Angeli tuáijoo ennuv. Sun hoksái et mannegis ij meid kyeleest puávtáččij kevttiđ puoh, nuuvt ko poccust-uv. Sun lii jo kuhheeb ääigi kuolij näähki kiävttám tuojijn, mut tääl meid taavtijd.

– Lijjim museoin uáinám puáris tuoijijd já talle oinim Matleena Fofonoff kietâčiiŋâ, mii lâi rahtum viäddáin já kyeletaavtijn já tot lâi nuuvt muččâd, muštâl Karhu-Angeli.

Čiiŋah iä valmâštuu tállán. Mana jiejâs äigi ko kyeleest šadda čiŋŋâ. Anne Karhu-Angeli kuáláást jieš kuolijd maid porá já taavtijd putteest, páiná já ráhtá čiŋŋân. Taan tove valmâštuvvojeh peljičiiŋah já cimccâh-heervah.

– Taid kalga pyereest putestiđ, mut puáhtá pieijâđ saaibâ čáácán kásániđ, jis ij oostâ tállán porgâđ, seelvât Karhu-Angeli siämmást ko čuággu aimijn kyele selgitäävti putesin.

ruodot
Päinejum kyeletäävtih. Govva: Anja Kaarret / Yle

Jis haalijd taavtijd eres ivne ko luándu vielgâd, te taid puáhtá päiniđ eres luándu ivnijguin. Anne Karhu-Angeli lijkkoo siipuul koorâi ivneest, mut lii páinám meid eres ivnijguin.

– Kloriiti jis kiävttá, te kalga mušteđ, et tot pilled täävti, jis kuhháá addel orroođ tost, muštoot Karhu-Angeli.

Sust láá táválávt putestum valmâšin suullân neljičyeđe tähtipittáá já talle álgá rähtiđ jieš čiiŋâid.

Selgitaavtij lasseen eres-uv kyeletaavtijd puáhtá ávhástâllâđ. Taavijguin puáhtá meid sierâdiđ.

– Kronk kronk káránâs, kost kulij kyessi puátá?, koijâd Karhu-Angeli siämmás,t ko leggist puško vepsitäävti láttei.

kalan ruodot
Puško uáivi- já vepsitaavtijd puáhtá kevttiđ sierrân. Govva: Anja Kaarret / Yle

Ellei já luándu amnâsijn rahtum čiiŋah láá ärbivuáváliih já luánduustevliih

Taan peeivi ulmuuh halijdeh eenâb já eenâb luándulijd čiiŋâid. Tiina Sanila-Aikio lii jo iivijd kiävttám čiŋŋân kyeletaavtijd.

– Taah láá nuorttâlij ärbivuáváliih čiiŋah já halijdâm taan äärbi siäiluttiđ, nube tááhust taah láá ekologisiih, Sanila-Aikio muštâl.

Sámedikki ságadoalli Tiina Sanila-Aikio ja su isit Leo Aikio buorástahttime Suoma Dásseválddi Presideanta Sauli Niinistö Suoma iehčanasvuođabeaidoaluin jagis 2018.
Sämitige saavâjođetteijee Tiina Sanila-Aikio jiečânâsvuođâ juuhlijn 2018. Suu kaperist já mááccuhist láá kyeletähtičiiŋah. Govva: Yle Areena

Sun meid jieš lijkkoo tuoijuđ kyeletaavtijn, ige toolâ taan pargo áiján.

– Kalhan maaŋgâ eres säämi kietâtyejeest lii val korrâsub hommá, ko tain, iätá Sanila-Aikio.

Kuldâl Tiina Sanila-Aikio sahhiittâllâm täst.

Kuldâl Anne Karhu-Angeli sahhiittâllâm täst.

Tivvoom: Uuđâs paječaalâ muttejum 4.9.2019 tiijme 16:06.

Varrasamosat: Säämi

Váldoođđasat

Varrasamosat

Muualla Yle.fi:ssä