Sápmi |

Laiti álggahan Twitter-ságastallama sámeáššiid birra – duhtavaš go ollugat searvan ságastallamii

Petra Laiti lokte oktan dehálamos áššiin rasismma, man sápmelaččat gártet ain vásihit.

petra laiti ssn suoma sámi nuorat
Petra Laiti lea Suoma Sámi Nuorat -searvvi ođđa ságadoalli. Govva: Privahtta

Suoma Sámi Nuorat -searvvi ságadoalli ja servvodatberošteaddji Petra Laiti lea álggahan Twitter-konttustis ságastallama, mii gieđahallá sápmelaččaid. Laiti leage aktiivvalaš geavahit Twittera ja son liiko ságastallanvuogis, mii doppe geavahuvvo. Das son oaččui jurdaga ságastallat sámeáššiin aiddo Twitteris.

– Mun čuovun dákkár olbmuid, geain leat dávjá hui guhkes ságastallamat juste Twitteris. Mun jurddašin, ahte maid jus mun álggahan diekkár ságastallama, olahago dat olbmuid ja oaččongo mun muhtinlágan reakšuvnnaid. Lean gal duđavaš, ahte bargen dan, lohká Laiti.

Petra Laiti álggahii dán Twitter-ságastallama mannán vahkoloahpa. Son lea čállán boasttočuoččuhusaid dahjege teesaid sápmelaččain, maid son de lea vuigen.

Olbmot leatge olu re-tweetin nappo juohkán daid Laiti twiittaid dahje civkkimiid, ja maiddái vástidan sutnje.

– Lea leamašan hui positiiva dat ságastallan dihto láhkai, olbmot leat kommenteren ahte "ojá, mun in oba diehtánge ahte man vehá mun dieđán dan ášši birra", ja de olbmot leat dieđus jearran, ahte gos sáhttá oažžut dieđu sámiid birra ja nu ain, muitala Laiti.

Rasisma sámiid vuostá gávdno nu guhká go olbmot eai ádde sápmelaččaid leat sierra álbmot

Petra Laiti lea maiddái jearran Twitter-álbmogis rabas gažaldagaid. Okta dain gažaldagain lea, manin Suomas dahje suopmelaččain lea nu váttis dovddastit rabas rasismma, man suopmelaččat hárjehit sápmelaččaid vuostá.

Laitis alddisge leat vásáhusat dan rabas rasismmas.

– Mun lean dan vásihan viehka dávjáge, muhto mun orun Helssegis, de gávpotbiras lea vehá earálagan go kánske Sámis. Gal mun liikká čuoččuhan dan, ahte rabas rasisma sámiid vuostá gávdno Suomas.

Suoma Sámi Nuorat -searvvi ságadoalli ja servvodatberošteaddji árvala, ahte olbmuid diehtemeahttunvuohta ja áddejumi váilun dagaha rasismma. Maiddái diskriminašuvdna nappo vealaheapmi lea rasisma, oaivvilda Laiti. 

– Mii eat beasa das eret, ovdalgo olbmot ipmirdit, ahte sámit lea sierra álbmot ja ahte dat diskriminašuvdna, maid sápmelaččat vásihit, lea maiddái rasisma. Jus olbmot eai dieđe, ahte sápmelaččat ja suopmelaččat leat sierra álbmogat, de sis lea hui váttis ipmirdit manne sámit hállet rasismma ja diskriminašuvnna birra, smiehtada Laiti.

Guldal Petra Laiti jearahallama Dearvva-sáddagis.

Varrasamosat: Sápmi

Váldoođđasat

Bivnnuhamosat

Varrasamosat

Muualla Yle.fi:ssä