Sápmi |

Laiti oaččui Sámiráđi bargostipeandda – Áigu bargat jagi Suohpanterroriin

Sámiráđđi lea juohkán golbma 20 000 euro bargostipeandda sápmelaš kulturbargiide. Suohpanterroris bohtet ollu čájáhusat dán jagi ja okta deháleamos dain lea Kiasma čájáhus, muitala stipeandda oažžu Jenni Laiti. Guokte eará bargostipeandda oažžuiba Erica Huuva Slow Art Sápmi -bargui ja Ivan Matrekhin divttaid čállimii.

Jenni Laiti
Jenni Laiti gullá Suohpanterror-kollektiivii. Govva: Carl-Johan Utsi

Sámiráđđi juolludii gieskat golbma 20 000 euro sturrosaš bargostipeandda sápmelaš kulturbargiide.

Okta oažžuin lea johkamohkkilaš Jenni Laiti. Laiti áigu bargat dáiddárkollektiiva Suohpanterroriin.

– Dát lea stuorra gudni oažžut dán stipeandda ja mokta bargat viidásabbot badjána! Dan jagi siste mun boađán bargat Suohpanterrora bargguin. Joatkit dainna maid min dáiddárkollektiiva lea jo ovdalge bargan. Dieđusge ieš dat dáiddalaš oassi dahje dat artivisma, dáidda- ja aktivisma, dat lea dat stuorimus oassi mainna boađán joatkit, Laiti čilge.

Dasa lassin Laiti áigu bargat Suohpanterrora ruovttusiidduiguin ja álggahit printenbuktagiid dego t-báiddiid buvttadeami.

Oktan deháleamos bargun son namuha maid čájáhusaid.

Suohpanterroris farga čájáhus Helssega Kiasmas

Suohpanterroris lea boahtimin čájáhus earet eará Suoma modearnadáidaga museai Kiasmai Helssegis.

– Suohpanterroris leat ollu čájáhusat boahtimin čuovvovaš jagi áigge ja okta deháleamos lea Kiasma. Mii boahtit leat mielde Kiasma Toisinajattelija-čájáhusas golggotmánus njukčâmánnui ja dasa dieđusge háliidan bidjat ollu návccaid go dat lea deháleamos čájáhus mii mis lea goassige leamašan, Laiti muitala.

Sámiráđi eará 20 000 euro bargostipeanddaid oažžuiba Erica Huuva Slow Art Sápmi -bargui ja Ivan Matrekhin divttaid čállimii.

Varrasamosat: Sápmi

Váldoođđasat

Varrasamosat

Muualla Yle.fi:ssä