Säämi |

Lapeco norá Aanaar kuávluin pasâttâsâid – "Kavhâdumos saje lâi tijmá Kilbisjäävrist"

Lapeco fáálá palvâlem jyehi keesi, ige pasâttâsâi pyehtim määvsi maiden. Onne roskeauto puátá Anarân.

Video: Roskeauto puáttim siijdân lii tábáhtume, maaŋgâs puátá aaibâs tuše keččâđ já išediđ.
Video: Anja Kaarret / Yle

Lapeco jyehi-ivvááš ecoKIERROS jotá taan-uv ive 3.6.-4.7.2019 Lapeco kuávlu kieldâin: Iänudâh, Aanaar, Kittilä, Muonio, Pelkosenniemi, Salla, Savukoski, Suáđikylá ja Kemijävri. Lapeco fáálá palvâlem jyehi keesi, ige pasâttâsâi pyehtim määvsi maiden. Onne roskeauto lii Anarist. Äigitaavvâl já sorttâdemravvuid kaavnah tääbbin.

Arto Tarkiainen Njiävđámist, lii puáttám monnjâjorrein já sust láá ennuv puáris pasâttâsâh fárustis.

– Taathân lii tuođâi pyeri äšši, náávthân finnee taid tuárispele kuávlu tuuvnijd meddâl. Avelân lam tuálvum jis lii maidnii ucceeb, Tarkiainen muštâl.

Tarkiainen lii huámmášâm nubástus pyereeb sundáán.

– Kale tom huámmáš, ete tot lii toimâm tääbbin ko roskeh iä lah innig nuuvt ennuv, sun muštâl.

Paavo Semenoja puáhtá ruuskijd Njiävđám čuággimpááikán Kirakkajäävrist.
Paavo Semenoja puáhtá ruuskijd Njiävđám čuággimpááikán Kirakkajäävrist. Govva: Anja Kaarret Yle

Paavo Semenoja lii Kirakkajäävrist puáttám pasâttâsâinis já lii puáhtám fárustis puáris kamiin.

– Jyehi ive keččâlâm puáttiđ. Taat kal lii šiev hommá, sun juurdâš.

Sun ij lah kuittâg kuássin tuálvum pasâttâsâid Avelân

– Monnjâjorreest lam tuálvum maadâ-suomân, sun muštâl.

Čevetjävrilâs Petteri Feudoroff lii pyehtimin jieijâs päikkisiijdâ roskečuággim pááikán ruuskijd.
Petteri Feodoroffist lii monnjâjorree tievâ tävirijn. Govva: Anja Kaarret / Yle

Petteri Feodoroff lii puáhtám tävirijd Čevetjáávrán.

-Taat lii hirmâd šiev äšši ko uážu tävirijd meddâl ulmui šiljoin iäge toh pääsi miäcán.

-Lam čuággám tävirijd valmâšin monnjâjorren ovdil ko roskeautoh puátih, Feodoroff muštâl.

“Ruuskij kyeđđim toho luodâ piällás lii rikkoos”

Suvi Saarinen lii Kittilä Lapeco sajattâhtipšoo (suomâkielân asemahoitaja)

– Roskeh láá puáttám taan ive kenski ucceeb meeri ko tijmá. Vaidâleijee kávnojeh roskepeesih vala-uv veikkâ ij kolgâččii. Ruuskij kyeđđim toho luodâ piällás lii rikkoos , sun muštoot.

Kuus tävireh talle maneh ko roskeauto lii nuurrâm taid?

– Jyehi eehid kyerrejeh aldasumos sajattâhân já talle čuávuváá iđedist roskeauto lii oppeet kuárus, muštâl Saarinen.

Taat lii eskân nubbe ihe ko Saarinen lii fáárust, mutâ sun máttá ettâđ mii lii lamaš kavhâdumos saje taan räi.

– Rávhálumos saje taan räi lii lamaš eidu taan kuávlust, ete lep ferttim tuš čuážžuđ. Kavhâdumos saje lâi tijmá Kilbisjäävrist, sun muštâl.

Suvi Saarinen Kittilä Lapecon sajâttâhtipšoo, jotá juávhu mieldi.
Suvi Saarinen lii jieš-uv kavnâm aarnijd. Govva: Anja Kaarret / Yle

Sun kuittâg illood pargostis.

– Kalhan taat lii hävski teivâđ ulmuid já kuullâđ mainâsijd. Kal mun-uv lam kavnâm aarnijd tääbbin, sun muštâl.

Sun haalijd adeliđ ulmuid oovtâ ravvuu:

– Sorttâdiđ puoh tävirijd valmâšin te lii mijjân älkkeb tääbbin, muštoot Saarinen.

Varrasamosat: Säämi

Váldoođđasat

Varrasamosat

Muualla Yle.fi:ssä