Sápmi |

Lapin Kansa -aviissas heite buvttadeames sámegielat ođđasiid, go eai diehtán, ahte ledje ožžon dasa ruhtadeami

Lapin Kansa doaimmahusas eai vel dieđe, goas jotket sámegielat Ságat-ossodaga doaimmaheami. 

lapin kansa aviisa
Lapin Kansa -aviisa leamašan okta dain hárve aviissain Suomas, mat buvttadit sámegielat sisdoaluid. Govva: Anni-Saara Paltto / Yle

Lapin Kansa -aviissas eai leat geassemánu rájes almmustuvvan sámegielat ođđasat, Ságat. Lapin Kansa oaččui suoidnemánu álggus vehádatgielat sisdoaluide dárkkuhuvvon doarjaga sámegielat sisdoalu almmustahttima várás, muhto aviissa váldodoaimmaheaddji Antti Kokkonen ii lean ožžon dieđu dán doarjaga fidnemis.

– Doarjja báhcá dál geavakeahttá. Dál lea menddo maŋŋit álggahit, go ruđa galgá geavahit ovdal cuoŋománu loahpa, čilge Kokkonen.

Lapin Kansa -aviissa doaimmahusas eai vel dieđe, goas jotket sámegielat Ságat-ossodaga doaimmaheami.

– Árvvoštalan maŋŋeleappos, ohcatgo mii ruđa čuovvovaš ohcamis, dadjá Antti Kokkonen.

Doarjaga galgá máhcahit ministeriijai, jus dan ii geavat

Oahpahus- ja kulturministeriija dieđihii suoidnemánus, ahte stáhtaráđđi lea juohkán ruhtadoarjagiid aviissaid ja daid neahttabláđiid vehádatgielat sisdoaluide. Lapin Kansai mieđihedje dalle 45 000 euro davvisámegielat ođđasiid buvttadeapmái.

Ráđđehusráđđeolmmoš Satu Paasilehto oahpahus- ja kulturministeriijas muitala, ahte sii leat sádden áššis mearrádusa ja máksán doarjaga guovtti oasis, nuppi geassit ja nuppi golggotmánus.

– Lea hui váivi, jus Lapin Kansa doarjja lea báhcán mannu eahpečielggasvuođa dihtii geavakeahttá. Jagi 2020 mieđihuvvon doarjaga galgá geavahit cuoŋománu 2021 loahpa rádjai. Doarjaga galgá máhcahit ministeriijai, jus dan ii geavat dahje geargga geavahit dan dárkkuhussii, masa dat lea mieđihuvvon, muitala Paasilehto.

Jagi 2021 mediadoarjagiid sáhttá ohcat áramustá miessemánus

Stáhtaráđđi juohká mediadoarjaga vehádatgielat sisdoaluide jahkásaččat. Dan várás stáhta bušehttii leat várren 500 000 euro mearreruđa.

Satu Paasilehto muitala, ahte jagi 2021 doarjagiid bidjet ohcanláhkai vejolaččat miessemánu áigge. Ođđa doarjagiid sáhttá ohcat, go ministeriijas leat vuos fidnen jagi 2020 doarjagiid geavaheamis raporttaid cuoŋománu loahpa rádjai.

– Dávjá ohccit leat aŋkke oassái seamma aviissat jagis jahkái, nu ahte mii dárkkistit raporttaid, ovdal go árvvoštallat ruhtadeami čuovvovaš jahkái, čilge Paasilehto.

Sámegielat Ságaid buvttadeamis leamašan ovdalge boddu

Lapin Kansa -aviisa leamašan jagi 2012 álggu rájes okta dain hárve aviissain Suomas, mat buvttadit sámegielat sisdoaluid. Dát lea nubbi geardi, go sámegielat buvttadeapmi nogai.

Mannan háve sámegiella bázii aviissas eret geasset 2018, go aviisa maŋŋonii iežas ruhtaohcamušain olmmošlaš feailla dihte. Ođđajagimánus 2020 sámegielat Ságaid buvttadišgohte ođđasit sullii beannot jagi bottu maŋŋá. Dalle mieđihuvvon ruhtademiin sáhtte goittot bargat dušše geassemánu lohppii.

Varrasamosat: Sápmi

Váldoođđasat

Varrasamosat

Muualla Yle.fi:ssä