Sápmi |

Lapin Kansa: Deanu guolastannjuolggadusa nuppástusain sohppojuvvon, Suoma lohpevuovdima álggaheamis ii vel diehtu

Norggas leat mearridan álggahit lohpevuovdima cuoŋománu 20. beaivve.

Tapio Hakaste
Eana- ja meahccedoalloministeriija ráđđádalli virgeolmmoš Tapio Hakaste mielas lei veháš vuordemeahttun, ahte norgalaččat leat jo almmuhan beaivemeari lohpevuovdima álggaheapmái. Govva: Vesa Toppari / Yle

Deanu guolástannjuolggadusa nuppástusain boahtte geassái lea dál sohppojuvvon. Norgga ja Suoma eiseválddit vuolláičálle disdaga 24.3. boahtte geasi nuppástusaid guoskevaš beavdegirjji, čállá Lapin Kansa.

Guktuin riikkain ossodathoavddat čáliiga namaska elektrovnnalaš áššegirjái, ja Suomas lobi dasa attii eana- ja meahccedoalloministtar Jari Leppä.

Eana- ja meahccedoalloministeriija dieđiha ášši nuppástusain nu jođánit go vejolaš, boahtá ovdan Lapin Kansas.

Suoma lohpevuovdima álggaheamis ii vel diehtu

Dal koronavirusis fuolakeahttá dahket válmmaštallamiid, vai besset vel vuovdit Deanu čázádahkii guolástuslobiid.

Eana- ja meahccedoalloministeriija ráđđádalli virgeolmmoš Tapio Hakaste muitala, ahte Deanu lohpevuovdimis lea ságastallon Norggain, ja lohpevuovdima leat mearridan maŋidit.

Norgga beale Deanu čázádaga guolástanhálddahus (Tanavassdragets Fiskeforvaltning TF), lea jo mearridan sirdit lobiid ovddalgihtii vuovdima álggaheami cuoŋománu 20. beaivái.

– Mii leat ožžon olu gažademiid mo covid-19:a ráddjehusat váikkuhit guolástanvejolašvuođaide ja vejolašvuođaide rasttildit Deanu. Mii maŋidit ovddalgihtii vuovdima dassážii go sáhttit dadjat juoidá eará dás, ákkastallá Deanu čázádaga guolástanhálddahus ádjáneami.

Tapio Hakaste mielas lei veháš vuordemeahttun diehtu, ahte norgalaččat leat jo almmuhan beaivemeari. Dat lea čielggas, ahte Suoma lohpevuovdin ii álgge mánotbaji doajáldagas, muhto teknihkalaš áššiid vigget oažžut ortnegii dan rádjái.

Lohpevuovdimis mearrideapmi gullá EBI-guovddážii, muhto koronavirusa dihte dál leat spiehkastatdilis. EBI-guovddáš lei jo mánnodaga almmuheamen dieđáhusa áššis, muhto ii ollašuhttán dan.

– Mii fertet beare vuollegažžan geahččat mo dilli ovdána, ja figgat eallit dan mielde, smiehtada Hakaste.

26.3.2020 dii. 15:20 divvojuvvon Tanavassdragets Fiskeforvaltning sámegillii Deanu čázádaga guolástanhálddahus hábmái.

Varrasamosat: Sápmi

Váldoođđasat

Varrasamosat

Muualla Yle.fi:ssä