Sápmi |

Lapin Kansa Ságaid buvttadeaddjin lea válljejuvvon Outi Paadar – sámegielat ođđasat máhccet aviisii jo guovvamánus

Ohcejohkalaš Outi Paadar illuda álgit bargui. Čálalaš ođđasiid lassin buvttadeaddji niehkun lea fállat sámegielagiidda maiddái juoidá áibbas ođđa.

Outi Paadar
Outi Paadar lea bargan árat earret eará jorgaleaddjin, Lapin Kansa sámegielat doaimmaheaddjin ja Yle Sámi Ohcejot doaimmaheaddjin. Paadar leamaš aktiivvalaš maiddái servodatáššiin, son lea earret eará doaibman Sámiráđi lahttun ja jođihan Roavvenjárgga sámiid Mii-searvvi.

Davvi-Suoma stuorámus aviisa Lapin Kansa buvttadišgoahtá fas sámegielat ođđasiid. Buvttadeaddjin lea válljejuvvon ohcejohkalaš Outi Paadar, guhte lea ovdalge bargan Lapin Kansa Ságaid doaimmaheaddjin ja maiddái Yle Sámi doaimmaheaddjin diibmá.

Lapin Kansa -aviisa ii leat buvttadan sámegielat ođđasiid badjelaš jahkái. Aviisa álggahii sámegielat buvttadeami, Lapin Kansa Ságat, jagi 2012 álggus, muhto sámegiella bázii aviissas eret geasset 2018. Fálaldat nogai, daningo aviisa maŋŋonii dalle iežas ruhtaohcamušain olmmošlaš feailla dihte.

Mannan jagi loahpas Lapin Kansai mieđihuvvui viimmat 45 000 euro ruhtadoarjja sámegielat ođđasiid buvttadeapmái. Doarjja lea sullii seamma stuoris go ovdalge.

"Mii dal ihkinassii Sámis dáhpáhuvvá, dan mun muitalan"

Ohcejohkalaš Outi Paadar buvttadišgoahtá sámegielat sisdoaluid guovvamánu álggu rájes. Son illuda álgit bargui.

– Lea hui somá, ahte doaibma fas joatkašuvvá. Smihtten jo ovtta gakka, mo de jos sámegiella ii oidno šat čálalaččat aviissain, muhto lihkus dat dáná čoavdašuvai. Lean hui ilus ja duđavaš, Paadar govvida dovdduidis.

Buvttadeaddji Outi Paadar bargun lea govvet ja čállit ođđasiid sihke Lapin Kansa neahttasiidui ja báberaviisii. Son lea doaimmahusa áidna sámegielat bargi, muhto muhtin freelanceriid sáhttet geavahit, jus ruhtadilli addá dasa vejolašvuođa. Paadar veahkkebargin lea nammaduvvon earret eará freelancer Elle Máret Labba.

– Lapin Kansa doaimmahusashan leat gal earátge, geat máhttet sámegiela, muhto mun lean áidna, gii čállá sámegillii, ja dušše fal sámegillii. Mun in goit dán vuoro čále suomagielat artihkkaliid ollenge, Paadar čilge.

Paadar ii vuos dárkilabbot muital, jogo sus leat mielas fáttát, main son boahtá čállit sámegielat ođđasiid. Son lohpida čuovvut, mii Sámis dáhpáhuvvá.

– Fáttát bohtet sihkkarit leat hui seammaláganat go ovdalge. Mii dal ihkinassii Sámis dáhpáhuvvá, de dan mun muitalan.

Čálalaš ođđasiid lassin buvttadeaddji niehkun livčče fállat sámegielagiidda maiddái juoidá ođđa.

– Mii leat vehá maid plánedaddan sámegielat podcásta. Ferte guorahallat, livččego dan vejolaš ollašuhttit ja makkár áigetávvaliin. Die lea ođđa ášši, man mii leat dássážii plánen, Outi Paadar muitala.

Buvttadeapmi joatkašuvvá goit geassemánu lohppii

Lapin Kansa vástideaddji váldodoaimmaheaddji Antti Kokkonen lea ilus, go sámegielat buvttadeapmi fas álgá.

Son jáhkká, ahte sámegielat sisdoalut joatkašuvvet aviissas guhká. Dál mieđihuvvon ruhtademiin sáhttet goit bargat dušše geassemánu lohppii.

– Mii áigut ohcat ruhtadoarjaga maid čuovvovaš ohcamis. Čuolbman lea goit dat, go doarjagat mieđihuvvojit easka loahppajagi bealde, sávvamis dan dihte ii šatta boddu buvttadeapmái, muitala Kokkonen.

Lapin Kansa -aviissa neahttasiidduin muhtin ođđasat sáhttet leat nu gohčoduvvon máksomuvrra duohken, muhto sámegielat ođđasat eai. Ulbmil lea, ahte buohkat besset lohkat daid nuvttá.

– Sámegielat sisdoaluide ruhtadeapmi boahtá oahpahus- ja kulturministeriijas. Dat eai dan dihte sáhte leat mange čoavddasáni duohken, čilge buvttadeaddji Outi Paadar.

Lapin Kansa lea okta daid hárve aviissain, mat Suomas buvttadit sámegielat sisdoaluid.

Varrasamosat: Sápmi

Váldoođđasat

Varrasamosat

Muualla Yle.fi:ssä