Sápmi |

Lapin Kansai 45 000 euro davvisámegielat ođđasiid buvttadeapmái – ohcagohtet dalán bargi

Lapin Kansa ii leat buvttadan sámegielat ođđasiid badjelaš jahkái, muhto fargga fas galggašii aviissas oidnot maiddái sámegiella.

ságat lapin kansa
Lapin Kansa buvttadii sámegielat ságaid jagiid 2012–2018. Govva: Lapin Kansa

Davvi-Suoma stuorámus aviisa Lapin Kansa lea ožžon stáhtas ruhtadoarjaga sámegielat ođđasiid buvttadeapmái.

Stáhtaráđđi lea juohkán ruhtadoarjagiid aviissaid ja daid neahttabláđiid vehádatgielat sisdoaluide. Joavkkus lea okta doarjja sámegielat buvttadeapmái, go Lapin Kansa / Kaleva365 Oy oažžu 45 000 euro davvisámegielat ođđasiidda ja eará goluide.

Aviissat ja daid neahttabláđit sáhttet ohcat stáhtaráđis doarjaga sáme-, gárjil-, ruoŧa- ja seavagielat buvttadeapmái. Buot doarjjamearrádusaid sáhttá lohkat stáhtaráđi neahttasiiddus.

Aviisa ohcagoahtá bargi

Lapin Kansa vástideaddji váldodoaimmaheaddji Antti Kokkonen muitala Yle Sápmái, ahte sii álggahit sámegielat ođđasiid buvttadeami dalán, go gávdnet dasa bargi. Aviisa ohcagoahtá bargi dakkaviđe.

Lapin Kansa -aviisa ii leat buvttadan sámegielat ođđasiid badjelaš jahkái. Aviisa álggahii sámegielat buvttadeami, Lapin Kansa Ságat, jagi 2012 álggus, muhto sámegiella bázii aviissas eret geasset 2018. Fálaldat nogai, daningo aviisa maŋŋonii iežas ruhtaohcamušain olmmošlaš feailla dihte.

Dál juolluduvvon 45 000 euro doarjja lea sullii seamma stuoris go ovdalge. Lapin Kansa lea árat ožžon stáhtas jahkásaččat 40 000 euro sámegielat buvttadeapmái.

Varrasamosat: Sápmi

Váldoođđasat

Varrasamosat

Muualla Yle.fi:ssä