Sápmi |

Lappi Guovddášbellodatnuorat: Sápmelaš giellabesiide ferte čujuhit lasi ruđa

Lappi Guovddášbellodatnuorat leat behtton ruhtaministeriija evttohussii geahpedit sámegiela giellabesiid ruhtadeami. Guovddášnuoraid mielde ruhtadeami unnun čuohcá sakka sámegielaid ealáskahttimii. Sii gáibidit Lappi riikabeaiáirasiid bealuštit sámekultuvrra.

Inarinsaamenkielinen kielipesä
Anáris lea giellabeassedoaimmain gáddjojuvvon anárašgiella, mii lea lei jo jávkamin. Govva: Yle Sápmi

Lappi Guovddášbellodatnuorat leat fuolas ruhtaministtar Jutta Urpilainen áigumušas sihkastit eret badjel beali sámekultur- ja giellabesiide čujuhuvvon mearreruđas. Oahpahus- ja kulturministeriija lei evttohan 700 000 euro giellabesiide, muhto ruhtaministeriija evttohii iežas bušeahttaárvalusas dušše 300 000 euro.

"Čuohcá sámegielaid ealáskahttimii"

Dán jahkái giellabesiide lea čujuhuvvon 500 000 euro. Guovddášbellodatnuoraid mielas mearreruđa geahpedeapmi čuohcá garrasit sámegiela ealáskahttimii.

- Sápmelaččat leat EU áidna eamiálbmot ja sámegielaid gáhtten lea dehálaš olles Supmii. Geahpedeapmi ii olus váikkut stáhta ekonomiijai, muhto dagaha stuorra váttisvuođaid sámekultuvrii, čuoččuha Lappi Guovddášbellodatnuoraid ságadoalli Teppo Säkkinen.

Ovdamearkka dihte Anáris lea giellabeassedoaimmain gáddjojuvvon anárašgiella, mii lea lei jo jávkamin ja lea ainge áitatvuloš giella. Maiddái nuortalašgiela hállit leat unnán ja giella jávkamin.

- Giellabesiiguin ja kulturdoaimmaiguin doarjut ođđa sápmelaš sohkabuolvvaid gielladáiddu ja divrras kultuvrra boahttevuođa. Jus ii leat ealli giella, ii leat maid ealli kultuvra ja álbmot, muittuhit Guovddášnuorat.

"Lappi riikkabeaiáirasat galget bealuštit sámekultuvrra"

Sámeservodat lea beahttašuvvan. Ráđđehusprográmma lohpádusat eai leat ollašuvvamin.

- Sápmelaš áŋgiris gielladoalaheaddjiid bargu dárbbaša maid stáhtas doarjaga. Lappi riikkabeaiáirasat fertejit rastá bellodatrájáid bissehit ruhtaministeriija evttohusa ja bealuštit sámekultuvrra, ávžžuha Säkkinen.

Varrasamosat: Sápmi

Váldoođđasat

Varrasamosat