Sápmi |

Lappi guovddášbuohccevissui evttohit sámegielat dearvvašvuođaáššiid dulkka barggu: ášši leat guorahallamin

Sámedikki evttohus lea jođánit ovdánan Lappi buohccedikšunbiire siskkáldas gieđahallamii ja dan atnet doppe dehálažžan.

Lapin keskussairaalan kyltti
Lappi guovddášbuohcceviesus Roavvenjárggas ii dálá dilis oaččo doarvái bures sámegielat bálvalusaid. Govva: Maija-Liisa Juntti / Yle

Sámediggi lea evttohan Lappi buohccedikšunbiirii, ahte guovddášbuohccevissui Roavvenjárgii virgáduvvošii dulka sámegielat dearvvašvuođaáššiide. Buohcceviesus finadettiin lea earenoamáš dehálaš, ahte olmmoš ádde doaktáriid ja fas nuppegežiid.

Evttohusas oaivvildit, ahte olmmoš galgá oažžut guovddášbuohcceviesus sámegielat doarjaga ja veahki nu, ahte su áddejit ja son ieš ádde divššu rávvagiid ja sisdoalu. Ovdamearkka dihte dákkár diliin sámegielat dulkkas livčče ávki. Bálvalusa dárbbašit garrasamosit eallilan olbmot, mánnábearrašat ja psykososiála bálvalusaid dárbbašeaddji olbmot.

Evttohus lea váldojuvvon buriin mielain Lappi buohccedikšunbiires vuostá ja dat lea juo ovdánan joatkkaválmmaštallamii.

Dálá dilis sámegiel bálvalusat illá šaddet duohtan

Sámediggi muitala evttohusastis earret eará dan, ahte sosiála- ja dearvvašvuođabálvalusat lihkostuvvet hejot sámegillii, dasgo bargit leat unnán. Dat lea boahtán ovdán jagi 2020 Sámebaromehteras.

Sámedikki sosiála- ja dearvvašvuođačálli Anne Länsman-Magga muittuha maid, ahte sáhka lea pasieantadorvvolašvuođas.

Anne Länsman-Magga
Sámedikki sosiála- ja dearvvašvuođačálli Anne Länsman-Magga lohká, ahte dálá dilis sámegielat olbmo vuoigatvuođat eai ollašuva bálvalusain Lappi guovddášbuohcceviesus. Govva: Anne Länsman-Magga

– Dat, ahte sámegielat olbmos lea vejolaš duođalaččat gulahallat, lea hui guovddáš ja dehálaš ášši. Das dieđusge leat váikkuhusat dasa, ahte manláhkái dat pasieantadorvolašvuohta ollašuvvá dán olbmo buohtá, go son lea ovdamearkka dihtii deaivvadeamen doaktáriin, Länsman-Magga čilge.

Dálá dilis sámegiel bálvalusa illá oažžu Lappi guovddášbuohcceviesus dárbbuid mielde, iige dulkonbálvalusge doaimma doarvái njuovžilit.

Ášši buohccedikšunbiires joatkkaválmmaštallama vuolde

Tuuli Miettunen bargá Lappi buohccedikšunbiire sámegielat bálvalusaid ordnenplána plánejeaddjin. Son muitala, ahte Sámedikki evttohus bođii hui buriin áiggiin, dasgo sámegielat bálvalusaid leat ordnemen ja plánemen aiddo dál.

Miettunen muitala, ahte sámegielat bálvalusaid heajos dilli lea buohccedikšunbiires dieđus ja dan leat olles fárttain iskamin ovddidit.

Tuuli Miettunen
Plánejeaddji Tuuli Miettunen dadjá, ahte Lappi buohccedikšunbiires lea diehtu garra dárbbus sámegielat bálvalusaid buorideapmái. Govva: Tuuli Miettunen

– Mii maiddái oaidnit, ahte dat lea dehálaš ášši ja dat lea duođalaš dárbu, man Sámediggi das lokte, Miettunen dadjá.

Doibmii dárbbašivččii hukset áibba ođđalágán barggu ja bargogova. Doaibma livčče áibba ođđalágán bálvalus. Dakkár plánain galgáge guorahallat geavatlaš áššiid, dego ovdamearkan ruhtadeami.

– Mii galgat vuos smiehttat, ahte mii dakkár olbmo bargogovva livččii, vai dat bálvalivččii buot buoremusat sámi álbmoga, lohká Miettunen.

Áššis oainnát lasi Yle Ođđasat -sáddagis diibmu 16.45. Yle Ođđasiid Sámis ja Beaivvi ságaid sáhtát maid guldalit Yle Areenas.

Varrasamosat: Sápmi

Váldoođđasat

Varrasamosat

Muualla Yle.fi:ssä