Sápmi |

Lappi Kulturfoanda juolluda sámekultuvrii ja -diehtagii badjelaš 80 000 euro – Suvi West fidne doarjaga ođđa filmma várás

Dán jagi eai lágidan jahkeávvudoaluid.

Suvi West
Suvi West fidne Lappi Kulturfoanddas veahkkeruđa ođđa filmma ovdabuvttadeapmái. Govva: Vesa Toppari / Yle

Suoma kulturruhtaráju Lappi foanda lea juohkán oktiibuot 581 000 euro veahkkeruđaid 53 ohccái. Sámekultuvrii juolluduvvui badjelaš 80 000 euro.

Dokumeantabagadalli Suvi West oažžu 18 000 euro Máhccan-filmma ovdabuvttadeapmái. Filbma jearrá, mii dáhpáhuvvá álbmogii, mas váldo eret kultuvrralaš ja vuoiŋŋalaš árbevierru, ja mii dáhpáhuvvá, go dat máhccá ruoktot. Máhccan-filbma čuovvu, go sápmelaččaid máttuid árbi máhccá Suoma álbmotmuseas Sámemusea Siidii.

Artesána Elle Valkeapää oažžu 10 000 euro Vettiiguin 20 jagi (Juurilla 20 vuotta) -ávvučájáhusa ollašuhttimii.

Filosofiija doaktárat Rauna Kuokkanen, Pirjo Virtanen ja Veli-Pekka Lehtola ožžot oktasaš bargojovkoseaset 12 500 euro. Dainna ruđain sii áigot lágidit álbmotdilálašvuođaid, mat laktásit sápmelaččaid gieđahalli dutkamušaid ehtalaš rávvagiid ollašuhttimii.

Diplomagiellajorgaleaddji Kaija Anttonen oažžu 13 000 euro sápmelaš diktahámát epohkaromána jorgaleapmái suomagillii.

Musihkkastudeanta Erke Eriksen oažžu 2 500 euro davvi-, anáraš- ja nuortalašgielat hevimusihka bargamii.

Servodatdiehtaga magisttar Elsa Laiti-Hedemäki oažžu 7 000 euro davvisáme- ja suomagielat muitalusaid čállimii.

Luohkkáoahpaheaddji Máret Ingá Länsman oažžu 2 000 euro bigálusskuvlla oahppanbirrasin Sámis gieđahalli pro gradu-bargui.

Sámiduojár Tuula-Maija Magga-Hetta oažžu 9 000 euro sámi árbevirolaš dujiid duddjomii.

Teologa magisttar Helga West oažžu 2 000 euro mánáidgirjji čállimii.

Pedagogihka doavttir Rauni Äärelä-Vihriälä oažžu 6 500 euro sámegielat giellabeassedoaimma gieđahalli barggu várás.

Eará veahkkeruđaid oažžuid gávnnat Suoma kulturruhtaráju neahttasiidduin.

Dán jagi eai lágidan jahkeávvudoaluid. Dáidaga oassi veahkkeruđain lea lagabui 70 proseantta, go 39 ohccái mieđihuvvui oktiibuot 396 000 euro. Veahkkeruđaid sturrodaga gaskaárvu lea 10 962 euro. Lappi Kulturfoanda fidnii 465 ohcamuša oktiibuot ovcci miljon euro ovddas.

Beaiváduvvon 16.5.2020 dii. 11.26: lasihuvvon veahkkeruđaid oažžuid namat listái ja divvojuvvon bajilčála

Varrasamosat: Sápmi

Váldoođđasat

Varrasamosat

Muualla Yle.fi:ssä