Sápmi |

Lappi riikabeaiáirasat: Deanu soahpamuša ráđđádallamiid galggašii álggahit ođđasit

Lappi riikabeaiáirasat ságastalle mánnodaga ovttas Ohcejoga ovddasteddjiiguin Deanu guolástansoahpamuša dilis Anáris. Lappi riikabeaiáirras Markus Lohi (guovd) muitala, ahte Lappi riikabeaiáirasiin lea oktasaš oaidnu das, ahte ráđđádallamiid galggašii álggahit álggus.

Markus Lohi
Govva: Guovddášbellodat

Lappi riikabeaiáirasat ságastalle mánnodaga 15.8. Sámekulturguovddáš Sajosis, Anáris Deanu guolástansoahpamuša dilis ovttas Ohcejoga ovddasteddjiiguin.

Lappi riikabeaiáirras Markus Lohi (guovd) muitala, ahte Lappi riikabeaiáirasiin lea oktasaš oaidnu das, ahte ráđđádallamiid galggašii álggahit ođđasit.

– Mis lei hui buorre ságastallan. Ja sáhttá dadjat, ahte buorre oktasaš vuoigŋa maiddái ja oktasaš oaidnu das, ahte dát Suoma ja Norgga gaskasaš soahpamuševttohus, mii guoská Deanu guolásteami, ii oppalohkái duokkárin leat dohkálaš. Lappi riikabeaiáirasiin lea oktasaš oaidnu das, ahte dál ráđđádallamiid galggašii álggahit ođđasit, ođđa vuolggasajis.

"Eanet oktavuođaváldimat go dábálaččat"

Deanu ođđa soahpamuša ráđđádallanboađus almmustahttojuvvui geassemánu loahpas.

Markus Lohi muitala, ahte lappilaš riikabeaiáirasat leat ožžon soahpamušhápmosii laktáseaddji oktavuođaváldimiit eanet go oktavuođaváldimiid dábálaččat.

– Mii leat ožžon dás olu dieđu ja oktavuođaváldimiid. Máŋga lappilaš riikabeaiáirasa celke, ahte álbmogis ja báikkálaš ássiin leat boahtán eanet oktavuođaváldimat go dábálaččat. Sáhttá dadjat nuge, ahte hárve lea nu, ahte báikegottis sulaid buohkat orrot leamen ovtta oaivilis das, ahte dákkár soahpamuša sisdoallu ii heive.

Lohi dadjá, ahte lea álki leat dan oaivilis, ahte soahpamuša sisdoalu galgá rievdadit, ovdal go dan sáhttá doalvut ovddos guvlui.

– Orru nu ahte rievtti mielde geange mielas soahpamuš ii leat buorre. Danin minge lea dál álki ovttas leat dan oaivilis, ahte sisdollui duođaige dárbbašuvvo nuppástus, ovdal go dán sáhttá doalvut ovddos guvlui.

Varrasamosat: Sápmi

Váldoođđasat

Varrasamosat

Muualla Yle.fi:ssä