Sápmi |

Lappi válgabire jienat rehkenastojuvvon: Juuso, Kärnä ja Autto ođđa áirrasin

Guovddášbellodagas riikkabeivviide mannet Katri Kulmuni lassin Mikko Kärnä ja Markus Lohi. Čađa besse maid Markus Mustajärvi (gurut), Johanna Ojala-Niemelä (SD) ja Kaisa Juuso (VS).

Riikkabeaiválggat 2019.
Lappi válgabires čađa mannet Markus Lohi, Katri Kulmuni, Mikko Kärnä, Markus Mustajärvi, Johanna Ojala-Niemelä, Kaisa Juuso ja Heikki Autto. Govva: Yle

Lappi válgabire buot jienat leat dál rehkenastojuvvon. Buot eanemus jienaid oaččui guovddáža Katri Kulmuni, 8 418 jiena.

Guovddášbellodat oaččui golbma báikki Lappi válgabires. Čađa besse Katri Kulmuni lassin Mikko Kärnä 6 481 jienain ja Markus Lohi 4 966 jienain.

Gurutlihtu evttohas Markus Mustajärvi beasai čađa 5 525 jienain. Sosiálademokráhtaid Johanna Ojala-Niemelä oaččui 6 717 jiena, Kokoomus Heikki Autto 5 447 jiena ja vuođđosuopmelaččaid Kaisa Juuso 5 758 jiena.

Jienastanproseanta njiejai Lappis

Guovddáža Eeva-Maria Maijala ja Alit boahttevuođa Matti Torvinen gahčaiga eret riikkabeivviin Lappi válgabires. Ođđa áirrasin riikkabeivviide manná Kaisa Juuso. Heikki Autto máhccá ruovttoluotta riikkabeivviide ovtta válgabaji bottu maŋŋá ja Mikko Kärnä máhccá sullii jagi bottu maŋŋá riikkabeivviide.

Várresajis Lappi válgabires leat Kalervo Björkbacka (VS) , Eeva-Maria Maijala (guovddáš), Sari Moisanen (gurut), Pekka Tiitinen (SD) ja Sara Tuisku (olgeš).

Lappi válgabires nubbin eanemus jienaid čokkii Ruoná lihtu Riikka Karppinen. Son lei vuosttas, guhte bázii riikkabeaibáikki haga vaikko čokkii 7 814 jiena. Jietnamearri lei ruonáid goalmmádin stuorimus. Ruonáin eanemus jienaid čokkii ságadoalli Pekka Haavisto, guhte oaččui badjel 19 000 jiena.

Lappi válgabire jienastanproseanta lei dáin válggain 68,8. Mannan válggain Lappi jienastanproseanta lei 69,1.

Varrasamosat: Sápmi

Váldoođđasat

Varrasamosat

Muualla Yle.fi:ssä