Sápmi |

Leammi álbmotmeahcis navdet bakteraid čázádagas – Meahciráđđehusas ávžžuhit vuoššat juhkančázi

Meahciráđđehusas eai leat resurssat dutkat ášši dađi eambo, muhto ávžžuhit johttiid leat várrugasat juhkančáziin. 

Ravadasköngäs Lemmenjoen kansallispuistossa.
Leammi álbmotmeahcci lea Suoma stuorámus álbmotmeahcci ja dat lea vuođđuduvvon jagis 1956. Govva: Juha Salminen

Meahciráđđehus lea ožžon otne maŋŋebárgga cavgileami vánddardeaddjis, ahte Leammi álbmotmeahcis Anáris lea vejolaččat olmmoš buohccán go lea juhkan čázi, mas leat bakterat.

Dieđihanhoavda Pirjo Rautiainen Meahciráđđehusas muitala, ahte sidjiide leat riŋgen ja muitalan, ahte golleroggit leat váruhan vánddardeaddjiid juhkamis čázi álbmotmeahci ádjagiin, go dat soaitá dagahit čoavjedávdda.

– Doppe lea vejolaččat boazu dahje muhtin eará ealli jápmán čázádaga lahkosii ja beassan bakterat čáhcái, nuba čáhci gánneha vuoššat ovdal go juhká dan, váruha Rautiainen.

Meahciráđđehus lea hálidan dieđihit áššiš Leammi álbmotmeahci facebook-kontus, vaikko sis ii leatge eambo diehtu áššis eaige leat áigumin dárkilabbot dutkatge dan.

– Midjiide lea boahtán dušše dát okta cavgileapmi ja soaitá leat, ahte lea sáhka dušše ovtta báikkis gokko ná lea geavvan, muhto hálideimmet muittuhit olbmuid, go lea ilgat jus doppe gasku meahci buohccá, joatká Rautiainen.

Diehtu ja rávvagat buhtes juhkančázis gávdnojit Meahciráđđehusa neahttasiidduin.

Leammi álbmotmeahcci lea Suoma stuorámus álbmotmeahcci ja dat lea vuođđuduvvon jagis 1956.

Varrasamosat: Sápmi

Váldoođđasat

Varrasamosat

Muualla Yle.fi:ssä