Sápmi |

"Lean ožžon girjjis sihke ruvssuid ja rissiid" – Saamelaiskiista evttohassan jagi suopmelaš diehtogirjin

Veli-Pekka Lehtola almmustahtii ođđasamos Saamelaiskiista-girjjis moadde vahku dassái Turku girjemeassuin ja girji lea dan rájes beaggán Suoma mediain. Dál dat lea evttohassan maiddái jagi suopmelaš diehtogirjin. Girječálli ieš lea ožžon sihke giitosiid ja kritihka girjjis.

Sápmelaš girječálli ja sámekultuvrra professor Veli-Pekka Lehtola ođđaseamos girji "Saamelaiskiista" (sá. Sápmelašriidu) lea evttohassan jagi suopmelaš diehtogirjin.

Lehtola atná evttohasvuođa árvvus.

– Dat gal lei somá leat evttohassan, go dat lea goittotge Suoma nubbin dehálamos diehtogirjebálkkašupmi. Mun lean dieđusge ovttas ovcci eará evttohasain evttohassan doppe, muhto duođai somá, go dat lei goittotge oaivvilduvvon Mátta-Suoma olbmuide dat girji, vehá nugo čilget, ahte mas lea gažaldat sámiid guoskevaš riiddus, Lehtola muitala.

Dán jagi evttohassan leat máŋga girjji, main lea vehádatfáddá. Lehtola jáhkká, ahte dan temá leat válljen danin, go Suomas beaggájit olu vaššeságat juste dál.

– Dathan lea dehálaš fáddá. Várra dat lea juste danin, ahte go orru leamen, ahte vaššeságat ja negatiivvalaš oainnut leat lassánan Suoma servodagas maiddái, ahte gánske dat boahtá das. Dieđusge mu girji gieđahallá maiddái dakkár oainnuid, Veli-Pekka Lehtola dadjá.

Sihke giitosat ja kritihkka

Saamelaiskiista-girjji almmustahttindilálašvuohta lei moadde vahku dassái Turku girjemeassuin ja girji lea beaggán Suoma mediain moatti vahkus olu.

Girječálli Veli-Pekka Lehtola lea ožžon máhcahaga girjjis.

– Máŋggat sápmelaččat leat giitán das, ahte mun lean čállán dakkár girjji. Oktage logai, ahte go sus orui, ahte leago son áibbas boastut jurddašan dan ášši birra. Suomas leat olu dakkár hállanvuogit, ahte dat álgoálbmotrolla livččii miinu dakkár hui amas ja dat sáhkavuorut leamaš hui áddemeahttumat. Duođai dat olmmoš giittii, ahte dál son fuomášii, ahte joo, galhan mun lean seammáláhkai jurddašan daid áššiid birra, Lehtola dadjá.

– Galhan mun lean ožžon olu giitosiid muhto maiddái kritihka, olbmot árvvoštallet, ahte munge lean dás riidaleamen dán ášši hárrái, go dat lea vehá dakkár ”jogo dahje”-ságastallan.  Jos don it leat seammá mielas go mii leat, de don leat dan nuppi bealde, Lehtoa kommentere kritihka maid lea girjjistis ožžon.

Kanava-áigečála ja Otava Girjefoanda juolludit jahkásaččat 10 000 euro Kanava-bálkkašumi jagi buoremus suopmelaš diehtogirjái. Kanava-diehtogirjebálkkášumi vuoiti čielgá boahtte vahku duorastaga, 29.10.

Varrasamosat: Sápmi

Váldoođđasat

Varrasamosat

Muualla Yle.fi:ssä