Sápmi |

Leena Niittyvuopio-Jämsä kolumna: Sámi álbmotbeaivi sámiide – “Min árgga sáŋgárat ánssášit rámi ja giitosiid”

Sámi álbmotbeaivve mii eat dávjá beasa gullat ávvuságaid iežamet árggas, baicce mii galgat muitalit earáide sámi kultuvrra birra, čállá Yle Sámi kolumnista Leena Niittyvuopio-Jämsä.

Leena Niittyvuopio-Jämsä
Govva: Laura Niittyvuopio, Vesa Toppari / Yle

Sámi álbmotbeaivi ávvuduvvui fas 6. guovvamánu. Dan beaivve mii eat dávjá beasa gullat ávvuságaid iežamet árggas, baicce mii galgat muitalit earáide sámi kultuvrra birra. Máŋgii mii gártat leat ieža barggus, go álbmotbeaivámet ii leat friddjabeaivi. Medias oidnojit artisttat ja politihkkárat, muhto árgga jietna ii gullo doarvái.

Mu mielas álbmotbeaivi galggašii leat sápmelaččaid beaivi. Ávvubeaivi, mii livččii midjiide alcceseamet. Beaivi, goas máidnut min máŋggabealát, fiinna kultuvrra ja sámi olbmuid. Eatge dárbbašivčče leat váldoálbmogii čilgemen dovdduideamet.

In sáhte ovttain kolumnain addit saji buohkaide, geat ánssášivčče beassat oidnosii álbmotbeaivve. Mun smiehtadin ja jurddahallen olbmuid, geat iežaset bargguineaset leat nana vuođđun min kultuvrii. Dáinna kolumnain giittán din. Dii, Sámi árgga sáŋgárat, ánssášehpet rámi.

Giittán politihkkáriid ja artisttaid. Giitu go lehpet oidnosis álbmotbeaivve jagis jahkái, váibbatkeahttá. Giittán buori barggus sihke gielddapolitihkas ahte Sámedikkis. Giitu juohke ovtta sámegielat lávlagis, musihkkabihtás, divttas ja girjjis.

Giittán du, guhte válljejit bargat beaiveruovttus. Don divššut mánáid sámegillii, go vánhemat leat barggus. Du dihte eatnit ja áhčit besset mannat bargui buorremielas, go dihtet máná oažžut gullat gollegiela divššus. Giittán du, guhte leat ožžon máná ja mearridan bidjat su sámegielat dikšui.

Giittán du, sámeluohká ja sámegiela oahpaheaddji. Don ražat vánis oahppomateriálaid geažil, muhto goittotge barggat barggu váibmovuođustat. Ja giittán maiddái du, guhte bidjet máná sámeluohkkái, vaikko dat ii lean álkimus válljejupmi.

Giittán du, guhte juoiggat okto duoddaris. Ja maiddái du, guhte oahpahat earáid juoigat.

Giittán du, guhte iđđes lihkat ealloravdii. Don oahpahat nuorat bulvii boazodili. Giittán du, guhte juoiggat okto duoddaris. Ja maiddái du, guhte oahpahat earáid juoigat.

Mun giittán du, guhte duddjot sámi dujiid daidda, geat eai ieža máhte. Dego maiddái giittán du, guhte oahpahat duoji. Giittán du, guhte barggat Sámi medias. Don it goassige beasa ieš ávvudit Sámi álbmotbeaivvi, muhto du dihte earát besset guldalit rádio ja lohkat ođđasiid sámegillii.

Giittán du, guhte barggat dearvvasvuođaguovddážis dahje boarrásiidsiiddas, gos juohke beaivve sámástat vuorrasiidda. Giitu dutnje, guhte mearridit duostat čállit sámegillii sosiálamediai, vaikko it lean áibbas sihkar, manaigo giellaoahpa mielde riekta.

Juohke okta lea dehálaš. Lehkos juohkehaš rámis iežas bealis. Sámi álbmotbeaivi sámiide.

Leena Niittyvuopio-Jämsä

Čálli lea eadni, doavttir ja badjenisu. Orru bearrašiinnis Oulus ja gaskkohagaid Vuovdaguoikkas. Olmmošvuoigatvuođaid bealušteaddji ja mánáid litna bajásgeassimis beroštuvvan nisu, guhte oažžu stuorámus lihku eallimasas bearrašis, ustibiin ja sámi eallinvugiin.

Guldal Leena Niittyvuopio-Jämsä kolumna.

Varrasamosat: Sápmi

Váldoođđasat

Varrasamosat

Muualla Yle.fi:ssä