Sápmi |

Lemehaš-Biehtár jođaša dál telefonspealus – Speallodemos beassá oahpásnuvvat Pedar Jalvi diktii

Lemehaš-Biehtára eallimis muitaleaddji speallodemoin hálidit doarjut sámegiela ja -kultuvrra oahppama ja oppalohkái muitalit sámekultuvrras ja historjjás.

Pedar Jalvin tuotantoa on siirretty mobiilipelin demoon.
Govva: Yle / Mikkal Morottaja

– Váriid viegan, duoddar duolmman, gullosta mobiilatelefovnnas, masa lea luđejuvvon ođđa sámegielat mobiilaspealu iskkadallanveršuvdna. 

Anárlaš Siiri Angeli lea okta daid vuosttas skuvlamánáin, gii beassá oahpasnuvvat čuođi jagi dassái jábmán sámi girječállái Lemehaš-Biehtárii ja su eallimis dahkkojuvvon speallodemoi.   

Spealu demoveršuvnna leat buvttadan ovttas ráđiid Sámi arkiiva, Sámediggi ja Ohcejoga ealáhusdoaibma. Bargojovkui lea gullan maid  Sámi Allaskuvlla professor Vuokko Hirvonen. Speallodemo almmustahttojuvvui Arktalaš pedagogihkka -seminára oktavuođas 21.9.2017 Anáris.

Siiri Angeli mielas speallu orru miellagiddevaš, vaikko leage vel dán muttus oalle oanehaš.

Kaisu Hautala ja Siiri Angeli
Siiri Angeli (olgešbealde) ja Kaisu Hautala iskkaiga Lemehaš-Biehtár speallodemo. Govva: Yle / Mikkal Morottaja

– Suohtas, spealus galgá oppa áiggi deattašit vai (Lemehaš Biehtár) johtá ovddos guvlui, moddjesta Siiri.

Lemehaš-Biehtár čilge mobiilaspealus Siiri gieđaid gaskkas: "Alla gáissáid ala goarkŋun". Siiri deattaša telefovnna ja muđalda. 

– Duoppe lohká suomagillii, in mun dieđe leago dat mii gullo anárašgiella. Ii várra leat. 

Speallodemoin hálidit doarjut sámegiela ja -kultuvrra 

Vuvddiid váccan, geđggiid geahčan, joatká mobiilaspeallu, go Siiri dan speallá.

Mobiilaspealu demo- dahje iskkadallanveršuvnnas Lemehaš-Biehtár johtá Deatnogáttis. Son čálaša sániid muitui ja lohká daid jitnosii speallái. Vihken jiena guvlui dikta boahtá oahpisin dađe mielde go speallu ovdána.   

Doppe čohkkán, smiehtan, muitán hearvás mánnávuođa áigán, hoahka Lemehaš-Bieahtár spealu bealle muttus.

Lemehaš-Biehtára eallimis muitaleaddji speallodemoin hálidit doarjut sámegiela ja -kultuvrra oahppama ja oppalohkái muitalit sámekultuvrras ja historjjás. Speallodemo buvttadeaddjit áiggošedje ráhkadit viidásut spealu olles Lemehaš-Bieahtára Muohtačalmmit-diktagirjjis. Ohcejoga gieldda ealáhusdoaimma prošeaktabargi Outi Laiti lea okta dain, gii lea leamaš buvttadeamen speallodemo Lemehaš-Biehtáris.

Outi Laiti
Outi Laiti lea leamaš ovddideamen ja plánemin speallodemo, mii muitala Lemehaš-Biehtára eallimis. Govva: Yle / Mikkal Morottaja

– Viidásut spealuin sáhttá buorebut ja viidásabbot ávkkástallat, muhto dán min demo sáhttá geavahit oahpahusas buori ságastallama vuođđun. Speallodemo doaibmá dakkár molssaevttolaš oahppametodan Lemehaš-Biehtára eallimis ja buvttadeamis, dadjá prošeaktabargi Outi Laiti. 

Mehciid váccán, murjjiid čoakkán, joatká Lemehaš-Biehtár mátkkis mobiilaspealus. Loahpas Biehtár joavdá soagi lusa ja oaidná oavssi alde lotti.

Giega jiena leagis gullen, nieidan juoiggusin dan gádden, vihken jiena guvlui – váiben, hoahkala Lemehaš-Biehtár spealu lohppii.  

Siiri Angeli jođii ovttas Lemehaš-Biehtáriin Vihken jiena guvlui divtta čađa. Speallu orui nu suohtas, ahte Siiri háliidii oahpaheaddjái maid rávvet, mo beassá Lemehaš-Biehtára fárus spealu ja divttaid máilbmái.

Anára vuolleskuvlla anárašgielat luohká oahpaheaddji Kaisu Hautala oaidná spealuid buorre vejolašvuohtan earenoamážit sámegiela oahpaheamis vierisgiellan. 

– Dihtor ja spealuid bokte sáhtašii oahpahallat vierrogielat sániid ohppiiguin  ja kulturáššiid oahppan sáhtášii leat maid buorre spealuid bokte, Hautala smiehtada.

Varrasamosat: Sápmi

Váldoođđasat

Varrasamosat

Muualla Yle.fi:ssä