Sápmi |

Linda Tammela álggaha čakčat Yle Sámi Helsset doaimmaheaddjin

Yle Sámi Helsset doaimmaheaddjin ledje oktiibuot njeallje ohcci.

Linda Tammela
Linda Tammela lea álgoálggos Anáris eret, muhto bargu doalvu su dál Helssegii. Govva: Vesa Toppari / Yle

Yle Sámi mearreáigásaš Helsset doaimmaheaddjin álggaha čakčamánu vuosttas vahkus journalismma studeanta Linda Tammela.

Tammela lea bargan Yle Sámis jagi 2016 rájes geassedoaimmaheaddjin ja freelancedoaimmaheaddjin ođas- ja áigeguovdilis doaimmahusas. Tammela bargá mihcamáraid rádjái nuorra ollesolbmuid rádioprográmma Sohkaršohka lágideaddjin. Tammela lea studeren journalismma Oulu ámmátallaskuvllas ja lea earret eará ráhkadan Gearddit-minidokumentaráiddu, mii lea oaidninláhkai Yle Areenas.

Yle Sámi Helsset doaimmaheaddjin ledje oktiibuot njeallje ohcci.

Linda Tammela illuda vejolašvuođas beassat bargat Helssegis.

– Lean dieđus hui lihkolaš ja giittán dán luohttámušas, ahte beasan álggahit ođđa barggus. Mu ulbmilin lea bargat ođđasiid ja muitalusaid Helssega ja oaivegávpotguovllu sápmelaččaid ja sámiid guoskevaš áššiid birra. Dan stuorra servoša áššiid maid ferte beassat gullat ja buktit oidnosii.

– Sávašin, ahte Helssega ja oaivegávpotguovllu sápmelaččat duostilit válddáše munnje oktavuođa, nie sáhtán oahpásmuvvat gávpotsápmelaččaid eallimii jođáneappot, hásttuha Tammela.

“Dál ii dárbbaš reiset Sámis Helssegii”

Yle Sámi hoavda Maiju Saijets lea movtta, go sámegielat doaimmahus viimmat oažžu iežas doaimmaheaddji oaivegávpotguvlui.

– Helssegis ásset ollu sápmelaččat, geaid birra sápmelaččat galget beassat gullat iežaset medias. Lea vuogas go mis lea dan guovllus olmmoš báikki alde čuovvumin áššiid, ahte ii dárbbaš reiset Sámis Helssegii ja geahččalit moatti beaivvis juksat olbmuid ja áššiid, dadjá Saijets.

Varrasamosat: Sápmi

Váldoođđasat

Varrasamosat

Muualla Yle.fi:ssä