Säämi |

Livđe lii iäláskâm já párnááh-uv uáppih liivđijd – livđe kulloo já uáinoo meid puáttee ive anarâškalenderist

Vuossaargâ ehidist uárnejui livđekonsert Anarist, mii lâi siämmást meid puáttee ive anarâš seinikalender almostittemtilálâšvuotâ. Sampo-Oskar Sieppi lii nuorâ livđoo, kote livđui konsertist poccuu.

Sieppi
Sampo-Oskar Sieppi hárjuttâlâi kyehti mánuppaje poccuu-livđe. Sun livđui konsertist jieht vuossaargâ Anarist. Govva: Anja Kaarret / Yle

Anarâšâi muusikärbivyehi livđe iälásk. Puáttee ive livđe uáinoo já sáttá kulluđ-uv maŋgâsij paaihijn, tondiet ko Anarâškielâ seervi ive 2022 seinikalender fáddán lii livđe.

Anarâškielâ servi almostit jyehi ive seinikalender, mutâ puáttee ive kalender eromâšvuotân lii tot, ete kalenderteevstâi lasseen piäsá kuldâliđ meid jienâid neetist. Jyehi mánuppaje várás lii ohtâ livđe ađai ohtsis 12 livđed.

Vuossaargâ ehidist lâi máhđulâšvuotâ kuullâđ taid liivđijd livđekonsertist Anarist Sajosist. Tilálâšvuotâ lâi siämmást meid livđekalender almostittemtilálâšvuotâ.

Konsertist lijjii mieldi käävci livđoo. Ohtâ sist lâi Sampo-Oskar Sieppi, kote livđui poccuu livđe. Poccuigijn porgâm lii sunjin uápis äšši, mutâ poccuu livđum sun kale hárjuttâlâi kuhháá.

– Mun hárjuttâllim hirmâd kuhháá, kyehti mánuppaje, iätá Sieppi.

Suu mielâst ij lamaš vaigâd livđuđ já sun meid halijdiččii eenâb livđuđ.

Párnáid máttáátteh liivđijd anarâškielâ kielâpiervâlist.

Toovláš anarâš livđeh láá ohtsis 130

Konsertist livđui meid Kuobžâ-Piäká Ánná, Ánná Morottaja, kote lii iäláskittâm livđe, mii masa lappui. Sun lii meid livđekalender idea enni.

– Kyehti ive tassaaš, ko jieččân livđe skiärru lâi päddejum, te smiettim, ete ijhân muu jienâ lah áinoo mii kalga liivđijn kulluđ. Iärráseh-uv livđojeh já taid kalga meid uážžuđ ulmui peljijd, muštâl Morottaja.

Toovláš anarâš livđeh láá ohtsis suullân 130 já tai juávhust väljejii kalenderân 12 livđed.

Seinikalender já livđeh ilosmiteh ulmuid tiäđust-uv kalender häämist, mutâ liivđijd puáhtá meid kuldâliđ neetist já veikkâba jieš livđuđ. Kalender omâsteijee uážžu syelisääni, main piäsá neetist kuldâliđ liivđijd. Kalenderist piäsá luuhâđ liivđij saanijd já čielgiittâsâid livđeest.

Anna Morottaja
Puoh livđojeijeeh iä peessâm vuossaargâ livđekonsertân pääihi oolâ. Tast šoodâi Morottajan juurdâ, ete konsert kolgâččij jotteeđ kyláin já konsert monâččij ulmui luus. Govva: Anja Kaarret / Yle

Seurujärvi já Valle iävá kuullâm livđe pärnivuođâstis

Livđekonsert kiäsuttij ulmuid ennuv. Kuldâleijeeh lijjii puáttám ovdâmerkkân Ucjuuvâst, Pärttihist, Avelist, Anarist já Njellimist. Lyyli Seurujärvi Matti Valle láin puáttám Njellimist kuldâliđ liivđijd.

Anarâšâi livđeärbivyehi masa lappui talle ko sárnoi meeri kiäppánij. Espanja taavdân jammii ennuv anarâšah, vissásávt meid maaŋgah kiäh mattii livđuđ. Uárbispárnáid pieijii párnáipááikán, iäge párnááh tobbeen oppâm livđuđ. Jáámmám ulmuid iä halijdâm livđuđ já tondiet ärbivyehi kuuloold lappuuškuođij.

Meid Seurujärvi já Valle iävá lah pärnivuođâst kuullâm liivđijd teikkâ oppâm livđuđ. Suoi kuittâg ilodává tast, ete livđe lii iäláskâm.

– Hitruuhân tot lii ko lii uđđâsist iäláskâm. Hirmâd pyeri, iätá Valle.

Matti Valle ja eemeed
Lyyli Seurujärvi já Matti Valle láin puáttám Njellimist Anarân kuldâliđ liivđijd, maid suoi iävá pärnivuođâstis kuullâm. Govva: Anja Kaarret / Yle

Aalgâst kuullâp magareh sahâvuáruh livđekonsertist lijjii. Kuullâp Sampo-Oskar Sieppi, Satu Aikio, Lyyli Seurujärvi, Matti Valle já Ánná Morottaja jurduid. Jietna: Anja Kaarret / Yle

Kuldâl lase anarâš saavâid tääbbin.

Varrasamosat: Säämi

Váldoođđasat

Varrasamosat

Muualla Yle.fi:ssä