Sápmi |

LK: Bátneduoddara bálggus šiitá čievrafitnodaga čuoččuhusaid betona bilideames

Sorakukkola Oy fitnodat gáibida Bátneduoddara bálgosa buhtadit sidjiide goluid, mat leat boahtán billašuvvan betonas.

poronvasa.
Sorakukkola Oy ja bátneduoddara bálgosa riidoášši gieđahallet Lappi gearretrievttis áramusat boahtte giđa. Govva: Vesa Toppari / Yle

Gearretriektái boahtán guovtti sierra stevdnenohcamušas Sorakukkola Oy fitnodat gáibida Bátneduoddara bálgosa buhtadit sidjiide goluid, mat leat boahtán billašuvvan betonas. Gaskavahku Lapin Kansa -aviissas muitalit, ahte bálggus lea addán vástádusas áššis gearretriektái ja šiitá das fitnodaga čuoččuhusaid.

Riidoášši duogábealde lea čievravuorká lahka Avvila. Čievrafitnodaga mielde Bátneduoddara bálgosa bohccot leat mannan geasi baikán fitnodaga čievrraid ala. Čievrras leat ráhkadan betona, man kvalitehtas olbmot váidaledje fitnodahkii.

Fitnodaga iežas dutkamušain čielggai, ahte bohccuid baikkat leat mielde betonas. Fitnodat divui sin betonas ráhkaduvvon láhttiid ja mávssii buhtadusaid betonas váidalan olbmuide.

Stevdnenohcamušaid mielde fitnodat gáibida bálgosa máksit sidjiide oktiibuot badjel 100 000 euro ovddas buhtadusaid daid betonain, maid sii navdet billašuvvan bohcco baikkaid dihte.

Bálggus šiitá čuoččuhusaid

Bátneduoddara bálggus lea boazodoallolágas dárkkuhuvvon boazodoalloguovllus ja sámiid ruovttuguovllus. Danin dat ii oainne, ahte das livčče geatnegasvuohta ordnet boazodoalu nu, ahte bohccot eai beasaše ovdamearkka dihte šiljuide dahje eará earenoamáš geavahussii dárkkuhuvvon guovlluide. Bálgosis ii danin livčče buhtadangeatnegasvuohta dáin guovlluin dáhpáhuvvan vahágiid oasil.

Dáid sivaid geažil bálgosis oidnet, ahte maid Sorakukkola Oy gáibádus bohccuid sirdimii láigoguovllustis ii vuođđuduvaše láhkii ja danin dan ii dárbbaš váldit vuhtii.

Stevdnenohcamušas čuoččuhit, ahte bálggus ii livčče máŋggaid gesiid áigge viežžan bohccuid čievravuorkkás eret, muhto bálgosa vástádusa mielde dat ii doala deaivása. Vástádusas muitaluvvo, ahte bohccot livčče sirdojuvvon maid dáin jagiin, muhto bálgosa beales dán barggu dahkan olbmot leat bastán dahkat dan easkka virgeáigge olggobealde.

Dasa lassin čievrafitnodat lea bálgosa vástádusa mielde fuobmán bohccuid guovllustis juo jagis 2016, muhto dat ii leat álgán makkárge doaimmaide eastadan dihte dákkár dáhpáhusaid.

"Boazu ii čiega baikkaid eatnama vuollái"

Lapin Kansa čállá maiddái, ahte vaikko boazodoalloláhka ii dan gáibitge, lea bálggus evttohan hukset áiddi guvlui juo jagis 2016. Čievrafitnodat ii goittotge leat dohkkehan evttohusa, dasgo dan bargit livčče galgan rahpat ja gokčat johtingeainnu verráha jođedettiinis.

– Vai vahát sáhtášii obalohkái leat buhtadan veara boazodoallolága vuođul, galgá fitnodat bastit čujuhit oktavuođa vahága ja boazodoallolága vuđolaš buhtadanákka gaskkas, vástádusas čállojuvvo.

Bálggus lea dan oaivilis, ahte čievrafitnodat lea čuoččuhan, ahte bohccobaikkat eai livčče oidnon fitnodaga guovllus. Dát meidnešii dan, ahte vahágis ii dasto sáhtášii sivahit guovllus duollet dalle fitnan bohccuid.

Vástádusas muitalit maiddái dan, ahte jus bohccot guhtot mannu guovllus ja baiket, leat baikkat čielgasit eatnama alde. Boazu ii goaivvo baikkas oaidnemeahttumii. Nuba bálgosis vástiditge, ahte jus baikkat eai leat leamaš oidnosis čievrafitnodaga guovlluin, sáhtášii leat geavvan nu, ahte baikkat leat boahtán gosnu eará sajis dohko fievrriduvvon čievrra mielde. Nuba Bátneduoddara bálggus oaivvilda, ahte oktavuohta bohccuid ja vahága gaskkas váilu.

Fitnodat: Árvvoštallanlávdegoddi dulkon lága boastut

Riidoášši leat gieđahallan giđa goit guktii Anára árvvoštallanlávdegottis. Árvvoštallanlávdegotti mielas bálggus ii leat geatnegahtton buhtadit fitnodahkii goluid. Čievrafitnodat háliida, ahte gearretriekti gomiha dáid mearrádusaid ja geatnegahttá bálgosa máksit sidjiide buhtadusaid.

Sorakukkola Oy mielde árvvoštallanlávdegoddi lea mearrádusainis heivehan boazodoallolága boastut. Fitnodaga mielas boazodoalu hárjehanvuoigatvuohta ii sisttisdoala vuoigatvuođa dagahit geasage ekonomalaš vahágiid.

Gearretriekti ii leat vel mearridan, goas riidoášši gieđahallojuvvo. Áramusat ášši váldogieđahallan lea boahtte giđa.

Varrasamosat: Sápmi

Váldoođđasat

Varrasamosat

Muualla Yle.fi:ssä