Sápmi |

LK: Fuođđoguovddáš lea fidnen ohcamuša golmma gumppe goddimii Anáris

Spiehkastatlobi leat ohcan Avvila, Bátneduoddara, Muttošjávrri, Báhčaveaji, Váhčira ja Njávdáma bálgosiid guvlui. 

Susi Ähtärin eläinpuistossa
Dát gumpe lea govvejuvvon Ähtäri ealliidgárddis. Govva: Pasi Takkunen / Yle

Fuođđoguovddáš lea duorastaga fidnen spiehkastatlohpeohcamuša golmma gumppe goddimii Anáris, muitala Lapin Kansa -aviisa.

Fuođđoguovddáža fuođđohoavda Sami Tossavainen muitala Yle Sápmái, ahte priváhta olmmoš lea ohcan spiehkastatlobi Avvila, Bátneduoddara, Muttošjávrri, Báhčaveaji, Váhčira ja Njávdáma bálgosiid guvlui.

Ohcamuša ággan leat njeallje boazovahága, muitala Tossavainen Lapin Kansa -aviisii.

Okta gumpe lea joreštan olbmuid šiljuin

Okta gumpe lea maŋimuš vahkuid áigge joreštan olbmuid šiljuin Avvila Áhujäävri guovllus. Dan leat duođaštan ealli baikkas váldon dna-iskosiin.

Gumppe leat geahččalan vuojihit eret olbmuid ássanbáikkiin, muhto dat lea álo máhccan ruovttoluotta. Lapin Kansa dieđuid mielde boles lea 18.12. addán vuojihanmearrádusa, mii lea fámus ođđajagimánu loahpa rádjai.

Bolesis lea ovddasvástádus gumppiin, mat johtet čoahkkebáikkiin ja olbmuid šiljuin. Dain galgá almmuhit heahteguovddážii. Jus gumppe oaidná eará guovlluin, das sáhttá almmuhit báikkálaš bolesa bálvalannummirii, Fuođđoguovddážii dahje Meahciráđđehusa bearráigeahču eiseváldái.

Varrasamosat: Sápmi

Váldoođđasat

Varrasamosat

Muualla Yle.fi:ssä