Sápmi |

LK: Miesit leat unnánut go guhkes áigái – miesselohku sáhttá muhtin bálgosiin niedjat beliin

Loahpalaš miessetáhpaid diehtit easkka čavčča rátkimiin, danin go buot bálgosat eai čohkke bohccuid geassemearkuma várás.

Miessi
Buot bálgosat eai čohkke bohccuid geassemearkuma várás. Govva: Xia Torikka / Yle

Dán gease leat unnánut miesit go guhkes áigái, ja maid misiid sturrodagain leat gávnnahan erohusaid geassemearkumiin, muitala Lapin Kansa -aviisa.

Garra čavčča ja dálvvi maŋŋá boazodoalus lea fuones dilli. Mannan čavčča eai lean guobbarat bohccuide ja golggotmánus muhtii suddan eatnama ala. Dálvit fas lei olahus olu muohta.

Oassi áldduin ii guoddán fuones ragatáiggi ja ortnega dihtii.

– Orru, ahte váttis dálvvi dihtii oassi čoavjjehiin leat reiton, muitala Bálgosiid ovttastumi ságadoalli Jukka Knuuti Lapin Kansai.

Son árvala, ahte miesselohku sáhttá geahppánit aŋkke logi proseantta das, mii dat dábálaččat lea. Bálgosiid gaskkas leat goittot erohusat.

Go miesselohku njiedjá, dat dagaha ruđalaš táhpaid earenoamážit dakkár boazodoalliide, geain ii leat stuorra ealu.

– Ferte vihkkehallat, mo dán dilis beassat ovddosguvlui, Knuuti smiehtada.

Lappi bálgosa boazoisit Antti Äärelä muitala, ahte sin bálgosa geassemearkumiin miesit ledje badjel beali unnánut go dábálaččat.

– Leat áiddo geargan mearkumis, ja mis orru šaddamin heittot miessejahki, dadjá Äärelä.

Antti Äärelä taljojen kanssa
Mis orru šaddamin heittot miessejahki, dadjá Lappi bálgosa boazoisit Antti Äärelä. Govva: Kirsti Länsman / Yle

Buot bálgosat eai čohkke bohccuid geassemearkuma várás

Loahpalaš miessetáhpaid diehtit easkka čavčča rátkimiin, danin go buot bálgosat eai čohkke bohccuid geassemearkuma várás. Oassi bálgosiin fas leat mearridan sirdit mearkumiid maŋŋelabbui čakčii.

Kemi-Sompio bálgosis ain árvvoštallet dan, gánnehago bohccuid čohkket ollenge dán gease. Boazoisit Mika Kavakka muitala, ahte sis ii leat hoahppu.

– Juos šaddet buorit dálkkit ja dilli, de gal mii sáhttit muhtun čorraga áidut. Dál goittotge orru, ahte nu ii geava.

Guobbarat meroštallet dan, makkárin boahtte dálvi šaddá.

– Juos dán čavčča eai leat guobbarat, de šaddet váttisvuođat. Guobbariid šaddamii eat sáhte moge váikkuhit, dadjá Bálgosiid ovttastumi ságadoalli Jukka Knuuti.

Varrasamosat: Sápmi

Váldoođđasat

Varrasamosat

Muualla Yle.fi:ssä