Sápmi

Loga varraseamos dieđuid koronavirusa leavvamis: Ministeriijat ja foanddat juolludit ovttas veahkeruđa kultursuorgái, Suomas gávnnahan 400 koronanjoammuma

bild på coronavirus
Koronavirusa dagahan dávdamearkkat leat feber, nuorvvu, gosahat, deahkkebávččas dahje vuoigŋanváttisvuohta. Govva: All Over Press

Yle Sápmi beaiváda dán artihkkalii varraseamos dieđuid koronavirusa leavvamis eandalit davvin.

Yle Sápmi lea álggahan ođđa artihkkala koronavirusa čuovvuleapmái 20.3. rájes.

Varraseamos dieđuid beasat lohkat dáppe.


19.3. dii. 20.16 Sádde jearaldagaid gielddahovdii dahje doaktáriidda

Eanodaga gielda lágida gieldalaččaide dieđihančoahkkima erenomaš vugiin bearjadaga gaskabeaivve. Ulbmilin lea muitalit gieldalaččaide koronavirusdiili váikkuhusain gieldda bálvalusaide.

Dieđihančahkkin lea bearjadaga 20.3.2020 diibmu 12 áigge youtube-kánalas ja doppe báikki alde leat gielddahoavda Jari Rantapelkonen, jođiheaddji doavttir Teemu Taulavuori ja njoammudávddain vástideaddji doavttir Sirpa Pajunen.

Dál berre smiehtastit maid sis háliida jearrat. Sidjiide sáhttá sáddet ovddalgihtii jearaldagaid čujuhussii mihku.nakkalajarvi@enontekio.fi.

19.3. dii. 18.31 THL: Koronaepidemiijas váddásamos dilli miessemánu beallemuttus

Suoma dearvvasvuođa- ja buresveadjinlágádus THL einnosta, ahte Suomas koronavirusepidemiijas váddásamos dilli lea áramustá miessemánu nuppi vahkus.

Ovdal THL árvalii, ahte epidemiija alimus dilli livčče cuoŋománu beallemuttus. Dát einnostus dahkkui ovdal go Suomas ásahedje ráddjendoaimmaid. THL bajit doavttir Tuija Leino muittuha, ahte einnostusat boarásnuvvet jođánit.

19.3. dii. 18.14 Ministeriijain ja foanddain ruđalaš doarjja kultursuorgái

Dáidaga ovddidanguovddáš Taike, oahpahus- ja kulturministeriija sihke stuorra suopmelaš foanddat áigut doarjut veahkkeruđain dáidda- ja kulttorsuorggi, mii lea gillán koronavirusa dihtii.

Ulbmilin lea juohkit sullii 1,5 miljovnna euro cuoŋománu áigge. Ministeriija čujuha 500 000 euro lasseruhtadeami Taikei. Maiddái Suoma foanddat nugo Suoma kulturfoanda, Jane ja Aatos Erkko foanda, Ruoŧŧelaš kulturfoanda, Saastamoinen foanda sihke Jenny ja Antti Wihuri foanda čujuhit ovttas heahtedoarjaga Taikei.

Buot ruhtadoarjagat juolluduvvojit Taike bokte, mii bidjá veahkkeruđat ohcanláhkái cuoŋománu loahpas. Vuosttažettiin veahkkeruđat juolluduvvojit oanehis veahkkeruhtan freelancer-dáiddáriidda.

19.3. dii. 17.22 Lasi rádjefávttat davás

Go Ruošša rádji biddjojuvvui gitta, logemiid rádjefávttaid leat kommanderen Suoma máttanuortaoasis davás doarjut Lappi rádjegozáhusa Suoma viesttarrájis. Viesttarrájis dárbbašuvvo eanet fávttaid, go ovdal doppe lea sáhttán johttit friija.

19.3. dii. 17.12 Buohccedikšuma vuoigŋanmáskkat nohkkagoahtán Suomas

Koronavirusa epidemiija dihte oassin Suoma buohccedikšunbiriin leat nohkkagoahtán vuoigŋanmáskkat bargiide. Sosiála- ja dearvvašvuođaministeriija gearggusvuođahoavda Pekka Tulokas muitala, ahte máskkaid mearri molsašuddet. Tulokas mielde máskkat leat ain muhtun veardde stáhta gearggusvuođavuorkkás. Olgoriikkain daid ii šat oaččo.

19.3. dii. 17.03 EU veahkeha eurohpálaččaid máhccat olgoriikkain ruoktot

EU kommišuvnna ságadoalli Ursula von der Leyen lohpida, ahte EU veahkeha lahttoriikkaid riikkavuložiid máhcat ruoktot. Sullii 100 000 olbmo háliidivčče máhccat iežaset ruovtturiikkaide, muhto girdimiid šluhttemat leat dagahan váttisvuođaid. Kommišuvdna áigu ovttasbargat lahttoriikkaiguin dan ovdii, ahte olbmot besset ruovttuideaset.

19.3.dii 14.35 Suomas 400 koronanjoammuma

Suoma dearvvašvuođa- ja buresveadjinlágádusa mielde Suomas leat gávnnahan oktiibuot birrasiid 400 koronanjoammuma.

Lohku vuođđuduvvá labortoriain sihkaraston loguide, maid THL lea čoaggán njuolga buohccidikšunbiriin.

Dás duohko njoammunlogut vuođđuduvvet dušše njoammudávdaregistara bokte addojuvvon loguide, muitalit THL:s.

19.3 dii 14.00 Norgga ruvnnu kursa vulos

Norgga kruvnnu kursa lea gahččan vuolimus dássái 30 jahkái. Ovttain euroin oažžu dál 12,90 ruvnnu. Mediadieđuid mielde kurssat leat dál oalle vuollin, juoba heajumus dilis go goassige.

Maiddái Ruoŧa ruvnnu árvu lea gahččamin. Norgga stuorámus beaiveáviissa VG mielde sivvan lea ruhtamárkaniin riegádan panihkka koronavirusa dihte, man dihte maid börsakurssat leat mannamin vulošgovlui.

Maiddái Ruoŧa ruvnnu gursa čielgasit niedjan. Ovttain euroin oažžu dál 11 Ruoŧa ruvnnu. Ruhtadoalloáššedovdiid mielde sivvan lea dat, go dál ruhtaváriid sirdet nana valuhtaide dego euroi ja dolláriidda.

19.3. dii. 12.30 Vaikko mátkkošteami ja čoahkkanemiid leat ráddjen, de Davvi-Suoma čuoiganguovddážat leat dievva turisttat

Suopma lea otná duorastaga rájes ráddjegoahtán rádjerasttildeami riikka rájáid alde. Suopmelaččaid mátkkošteami eai goit vel leat ráddjegoahtán. Dat oidno bures Davvi-Suoma čuoiganguovddážiin, gosa suopmelaččat leat dollen luopmomátkái.

Helssetlaš Virve Reinikka muitala, ahte vihkkehalai dárkilit luopmomátkki davás.

– In ballan, muhto smihtten garrasit ášši. Jurddašeimmet goittotge, ahte boahtit deike dál, dáppe leat buoret dorvvus go Helssegi.

Loga áššis eanet dán arktihkkalis.

19.3. dii 10.35 Ipmilbálvalusat streamejuvvojit

Ipmilbálvalusat doaimmahuvvojit doaisttážii nu, ahte dat leat sátneipmilbálvalusat ja báikki alde girkus leat dušše ipmilbálvalusa doaimmaheaddjit. Bismmaid rávvagiid mielde ipmilbálvalusat streamejuvvojit ja sáddejuvvojit neahta bokte guđege searvegotti vejolašvuođaid mielde. Áššis sáhttá lohkat eanet girku sámebarggu Facebook-siidduin.

Ovdamearkka dihte Anára searvegoddi muitala, ahte sin ipmilbálvalusaid sáhttá čuovvut neahttaradios ja vejolaččat maid Facebook bokte livesáttan.

Sámebáhppa Mari Valjakka muitala, ahte Anára searvegoddi lea leamaš mielde rihppaskuvllaid digitálalaš ovdánahttinfidnus ja danin sin digitálabálvalusaid ordnen leat buori vuođu alde.

Yle Sámi radiokanálas gullo rohkos juohke vuossárgga diibmu 10.00–10.30 ja nuppádassii maŋŋebárgga 14.00–14.30. Prográmmaid sáhttá guldalit maid Yle Areena bokte.

19.3. dii 10.08 Unjárga gidde gielddarájá

Unjárgga gielda Norgga bealde lea mearridan giddet gielddarájá, čállá NRK Sápmi. Dat olbmot, geat eai ása Unjárggas, eai oaččo šat mannat barttaide eaige mátkkoštit almmolaš máđiijaid mielde. Dan lea Unjárgga gielddadoavttir mearridan vai nagodit koronavirusnjoammumiid.

Gielddus ii guoskka gádjunveagaide iige daidda olbmuide, geat leat jo Unjárggas ja áigot máhccat ruoktot. Gielddadoavttir maid rávve gieldda ássiid joreštit unnimus lági mielde gieldda rájáid olggobealde.

19.3. dii 10.00 Suopma áigu skáhppot ođđa koronavirusteasttaid

Suopma lea skáhppome ođđalágan teasttaid koronavirusnjoammumiid testemii.

Dassážii Suomas leat gávnnahan 359 njoammuma, muhto duohtavuođas lohku lea stuorát, dasgo buohkaid geat buohccájit koronavirusii, eai teste.

Sosiála- ja dearvvašvuođaministeriija bajithoavda Päivi Sillanaukee dadjá, ahte geahččala skáhppot ođđa teasttaid dakkaviđe, go dat bohtet márkaniidda.

19.3 dii 6.33 Yle Ođđasat otne juo 14.45

Ráđđehusa dieđihančoahkkin dollojuvvo otne duorastaga juo dál logi áigge. Sátta álgá tv:s, radios ja Yle Areenas fártta váili logi ja bistá 11 radjai.

Veaigin Yles juohke beaivvi diibmu 15 lea specialsátta koronavirusdili dihte ja otne go vel lea duorastat, ja lea riikkabeivviid gažadandiibmu, dat dárkkuha maid nuppástusa Yle Ođđasiid sáddenáigái.

Nuba otne Yle Ođđasat juo fártta váili golbma dál iđida dieđu mielde. Dieđihat vejolaš nuppástusain dasto neahtas. Sáddaga sáhttá geahččat maŋŋelis maid Yle Areenas.

18.3. dii. 20.04 Rádjerasttildeami ráddjegohtet gaskaija rájes

Ráđđehusa mearrádusa mielde Suoma rádjejohtolaga ráddjegohtet ihtin duorasdaga diibmu 00:00 rájes, nappo gaskaija maŋŋá.

Lappi girdingiettit giddejuvvojit riikkaidgaskasaš girdinjohtolagas.

Olgoriikkalaččat eai šat beasa Ruššii ollege. Suopmelaččaid máhccan Ruoššas Supmii lea ain vejolaš. Gálvvuid fievrrideamit jotket ain.

Suoma ja Ruoŧŧa, sihke Suoma Norga ráját leat rabas Supmii máhccanjohtolahkii ja gálvvuid fievrrideapmái. Vealtameahttun bargojohtolat joatkašuvvá dábálaččat ovttas gálvvuid fievrridemiiguin.

Olbmot, geat ásset suomas fásta, ožžot máhccat Supmii. Olgoriikkain boahtti olbmot galget goittotge báhcit 14 beaivvi karantenii.

18.3. dii. 19.48 Bismmát: Lagaš olbmot olbmot sáhttet oassálastit vitkkamii

Stáhta eiseválddit leat ávžžuhan, ahte badjel 10 olbmo čoahkkanemiid ii sáhte koronavirusdili dihte dahkat. Dál bismmát rávvejit searvegottiid, ahte pástorálálaš sivaid geažil váinni lágaš olbmot sáhttet oassálastit vitkkamii.

Jos vitkkamii oassálasttet badjel 10 olbmo, ferte garvit lagaš gaskkusteame eará olbmuiguin.

Almmolaš linnján lea ain eanemustá 10 olbmo dilálašvuođat maiddái girkolaš dáhpáhusain.

18.3. dii. 18.32 Kela-sáhtuin vejolaš mátkostit okto

Koronavirusa dihte Kela mearridii, ahte Kela-sáhtuin lea vejolaš mátkostit okto. Sámegielat olmmoš sáhttá diŋgot sáhtu sámegielat vuoddjis.

18.3. dii. 18.27 Norggas plánejit bidjat fápmui gearggusvuođalága

Norgga stáhtaminister Erna Solberg muitala, ahte Norgga ráđđehus evttoha bidjat fápmui gearggusvuođalága koronavirusepidemia dihte. Lága mielde ráđđehus sáhtašii dahkat mearrádusaid parlameantta dohkkeheami haga, muitala NRK.

18.3. dii. 18.21 NRK: Norggas golbma olbmo jápmán koronavirusii otne gaskavahku

NRK muitala, ahte otnáža rádjái Norggas leat jápmán oktiibuot guhtta olbmo koronavirusii. Golbma sis jápme otne gaskavahkku.

Guokte sis jámiiga vuorrasiid ruovttus Lillestorma ja Ringsakera gielddain Norggas. Okta dán golmmas jámii Askeris, Bæruma buohcceviesus.

18.3. dii. 17.37 Kela gidde bálvalanbáikkiid doaisttážii

Oassin Kela bálvalanbáikkiin bargit sirdašuvvet gáiddusbargguide dikšut telefonbálvalusa ja danin oassi bálvalanbáikkiin giddejuvvo. Áššehaccaid rávvet dikšut iežaset Kela-áššiid neahtas dahje telefovnnas. Kela bálvalanbáikkit leat gitta guokte vahku dahje dán rádjái go daid lea dorvvolaš rahpat fas.

18.3. dii. 17.31 Bargo-organisašuvdna ILO: Koronaepidemia sáhttá dolvot joba 25 miljovnna bargobáikki

Ovttastuvvan našuvnnaid bargo-organisašuvdna ILO váruha, ahte koronavirusepidemia soaitá dárkkuhit dan, ahte 25 miljovnna olbmo manahit bargosajis.

ILO mielde váikkuhusaid sáhttet geahpedit, jos kriisii vástidit riikkaidgaskasaš ovttasbargguin, nu mo dahke globála finánsakriissa áigge jagiin 2008-2009.

18.3. dii. 17.07 Anára gielda ordne veahki badjel 70-jahkásaš gielddalaččaide

Anára gielda áigu ordnet vejolašvuođaid mielde fievrridanveahki badjel 70-jahkásaš gielddalaččaide. Veahkki fállát ovdamearkka dihte gávpe- ja báŋkofitnamii. Bálvalus lea nuvttá 13.4.2020 rádjái.

Dasa lassin Anára fállá maiddái ságastallanveahkki juohke árgabeaivvi dii 8 -15. Anára gieldda siidduin gávdno buot buohccedivššáriid nummirat ja rávvagat.

18.3. dii. 16.09 Boles váruha dájuheddjiin

Koronavirusa geažil Suomas leat leamašan dáhpáhusat, mas dájuheaddjit leat figgan beassat olbmuid ruovttuide ja suoládit dávviriid. Bolesa bajit hoavda Seppo Kolehmainen rávve oapmahaččaid fuolahit vuorrasut olbmuid dorvvolašvuođas.

Kolehmainen muittuha, ahte bolesat dahje eará eiseválddit eai daga korona dihte dárkkistemiid ruovttuide iige dan geažil gánnet luoitit geange sisa iežas ruktui.

18.3. dii. 15.56 Maiddái Eurovision-lávlungilvu šluhttejuvvo

Eurohpá oktasašradiofitnodat EBU almmuhii áššis gaskavahku. Eurovision-gilvvu lágideaddjit čoahkkanedje maŋŋebárgga ságastallat vejolašvuođas lágidit lávlungilvvu Hollándda Rotterdamis. Koronavirusa dihte Eurovision-lávlungilvu goittotge šluhttejuvvui.

Lágideaddjit maiddái smihtte molssaeavttuid gilvvu lágideapmái. Molssaeaktun lei, ahte gilvu ordnejuvvo gehččiid haga nu, ahte juohke riikka ovddasteaddji loaiddastivččii iežas ruovttoriikkas tv-studios. Lágideaddjit maiddái guorahalle lágidit gilvvu geassemánus.

EBU mielde lea vejolaš, ahte gilvu lágiduvvo boahtte jagi Rotterdamis. Áššis joatkit ráđđádallamiid Hollándda oktasašradiofitnodagaiguin.

18.3. dii. 15.37 Fitnodatdolliide geahpádusat vearuid máksimii

Ruhtadoalloministeriija dieđiha, ahte Suoma fitnodagaid vearromáksima geahpeduvvo. Ministeriija válmmaštallá vuolit maŋŋonanreanttu máksinortnegii gulli vearuide.

Evttohusas lea, ahte maŋŋonanreanttu vuoliduvvo čieža proseanttas njeallje prosentii. Nuppástus livččii mearreáigásaš.

Maiddái Suoma vearrohálddahus geahpeda gaskaboddosaččat fitnodagaid máksinortnega nu, ahte fitnodagat eai dárbbaš máksit vuosttas golmma mánotbadjái vearuid, mat gullet máksinortnegii.

Ráđđehus addá evttohusas vearrogeahpedemiin nu jođánit go vejolaš.

18.3. dii 15.15 Linnjábiilavuoruin soitet leat nuppástusat

Lappi EJB-guovddáš muitala, ahte Lappi gielddaid gaskasaš linnjábiilavuoruide soitet leat nuppástusat. Skuvllaid giddema dihte eanemusat nuppástusat gusket skuvlalaččaid johtolaga.Maiddái girdingieddeoktavuođat šluhttejuvvojit.

EJB-guovddáš muittuha, ahte dilli sáhttá rievddat hui jođánit ja danin lea dehálaš dárkkistit áigeguovdilis dieđuid bussevuoruin ja áigedávvaliin linnjábiilafitnodagain.

Joavkojohtolagas gánneha fuolahit erenomážit bures hygienas ja geavahit koarttaid mávssedettiin.

18.3. dii 14.41 Rádjefávttat Ruoŧa ja Norgga rájáid ala

Rádjefávttat máhccet rádjerasttildanbáikkiide Ruoŧa ja Norgga rájáid ala boahtte ija. Lappi rádjegohcinlágádus lea mearridan bargui buot rádjerastildanbáikkiide Suoma ja Ruoŧa gaskkaš ja Suoma Norgga gaskkas gohcit, ahte koronavirusepidemiija dihte ásahuvvon mátkkoštanráddjemat čuvvojuvvojit.

Riikkaid gaskkaš leat valjis geaidno-oktavuođat, maid alde ii máŋggalogi jahkái leamašan šat rádjegohcin. Ráddjemat ja bearráigeahčču bohtet fápmui boahtte ija gaskaija. Maiddái rádjá Ruošša guvlui lea giddejuvvon.

Eiseválddit leat rahkkanan bovdet bargui maid juo ealáhahkii báhcán rádjealbmáid, juos lea dárbu.

18.3. dii 14.37 Goalmmát olmmoš biddjojuvvui beaktilis dikšui Suomas

Suomas leat dán rádjái biddjon beaktilis dikšui golbma olbmo. Guokte sis leat ealáhatagis. Mikkelis beaktilis dikšui biddjon olmmoš lea bargoahkásaš. Okta olmmoš lea gártán beaktilis dikšui Kuopios, nubbi Uusimaa-guovllus.

18.3. dii 14.27 Suomas leat dál 359 njoammuma

THL dieđuid mielde Suomas leat dál buohkanassii 359 koronavirusnjoammuma. THL:s leat ovdal juo muitalan, ahte duohtavuođas njoammumat soitet leat juoba 20-30 geardásaččat eanet.

18.3. dii. 13.09 Ruošša gidde skuvllaid vuossárgga

Ruošša gidde skuvllaid čuovvovaš golmma vahkkui boahtte vuossárgga rájes. Ruošša oahppoeiseválddit dadje gaskavahkko, ahte sáhka lea guhkiduvvon giđđaluomus, man áigodagas lea vejolaš gazzat oahpu maiddái gáiddusin.

Ruoššas leat dán rádjái gávnnahan 114 koronanjoammuma.

18.3. dii. 13.00 WHO: Ale geavat ibuprofeiinna, jus leat korona dávdamearkkat

Máilmmi dearvvašvuođaorganisašuvdna ávžžuha, ahte dakkár olbmot geain leat koronavirusa dávdamearkkat, eai galgga geavahit dálkkasin ibuprofeiinna. WHO mielde ibuprofeiina sáhttá dahkat buohcci dili vearrábun. WHO lea čielggadeami dálkkasgeavaheami vai besset addit dárkilut rávvagiid.

Máilmmi dearvvašvuođaorganisašuvnna dieđiheaddji Christian Lindmeier mielde WHO ávžžuha olbmuid geavahit dálkkasin parasetamola, jus koronavirusa dávdamearkkat iđistit. Suoma Dearvvašvuođa- ja buresveadjinlágádus THL čielggada maiddái ášši.

18.3. Suoma skuvllat gitta otnáža rájes

Buot Suoma skuvllat leat gitta otnáža rájes. Skuvllaid gidden guoská nu vuođđoskuvllaid go maiddái logahagaid, ámmátskuvllaid ja allaskuvllaidge.

Oahpahus lágiduvvo dás duohko čuovvovaš mánotbaji gáiddusin ja ruovttuin. Dušše dakkár vánhemat, geat barget servodaga doaibmama dáfus krihtalaš surggiin, sáhttet oažžut 1.—3. luohkká mánáide skuvlaoahpahusa. Beaivedivššut leat rabas olles Suomas, iige skuvllaid gidden guoskka ovdaskuvllaide. Eiseválddit goit ávžžuhit doallat mánáid ruovttuin, jus dasa fal lea vejolašvuohta.

18.3. dii. 9.52 Čáhcesullos koronanjoammun

Čáhcesullos lea gávnnahuvvon koronajoammun vuorrasut olbmos, čállá NRK Sápmi. Koronavirusii buohccán olmmoš lea Girkonjárgga buohcceviesus. Čáhcesullo sátnejođiheaddji Wenche Pedersen muitala, ahte sii leat čielggadeame gos dát olmmoš lea ožžon njoammuma. Finnmárkkus Norgga bealde leat dál guhtta duođaštuvvon njoammuma.

17.3. dii. 16.31 Suomas ráddjegohtet rádjejohtolaga duorastaga rájes

Suoma ráđđehus muitalii koronavirusepidemiija vuostásaš doaimmain disdaga dieđihandilálašvuođas.

Suoma ráđđehus lea mearridan, ahte rádjejohtolaga ráddjegoahtit 19.3. gaskaija. Ráddjehus lea fámus cuoŋománu beallemuddui. Ráddjehus guoská olgo- ja sisrájáid. Goittotge vealtameahttun bargojohtolat ja gálvvuid fievrrideapmi joatkašuvvet dábálaččat.

Dan lassin suopmelaččat eai galgga mátkkoštit olgoriikkaide. Johtolat- ja gulahallanministtar Timo Harakka dadjá, ahte olgoriikkas leahkki suopmelaččat galget dál mearridit, báhcetgo sii olgoriikii vai bohtetgo suopmelaš dearvvašvuođafuolahusa birii. Olbmot geat ásset suomas fásta, ožžot máhccat Supmii. Olgoriikkain boahtti olbmot galget goittotge báhcit 14 beaivvi karantenii.

Dearvvašvuođafuolahussuorggi dávviriid ja dálkasiid vuovdima sáhttet ráddjet. Ásahus lea boahtán jo fápmui.

17.3. dii. 14.05 Suomas 319 njoammuma

THL dieđuid mielde Suomas leat dál buohkanassii 319 koronavirusnjoammuma.

Vuossárgga áigge sihkarastojuvvojedje 47 ođđa njoammuma.

17.3. dii. 13.38 Lappis vihtta koronanjoammuma

Suoma dearvvašvuođa- ja buresveaddjinlágádus THL dieđiha, ahte Lappi eanangottis leat vihtta sihkarastojuvvon koronavirusnjoammuma.

Duohtavuođas lohku sáhttá leat stuorát, daningo Suomas eai testte šat buot eahpádusaid.

17.3. dii. 13.00 Ruoŧŧa ii áiggo vel giddet vuođđoskuvllaid

Ruoŧas leat ráhkkaneame giddet logahagaid ja allaskuvllaid. Vuođđoskuvllat bissot ain rabas, muhto daid maid leat ráhkkaneame giddet maŋŋeleappos, muitala stáhtaminister Stefan Löfven.

Logahagat ja allaskuvllat sirdásit gaskavahkku gáiddusoahpahussii.

17.3. dii. 10.27 Ohcejohkalaš turismafitnodat steŋge uvssaidis gaskaboddosaččat

Ohcejohkalaš turismafitnodat Holiday Village Valle lea mearridan giddet restoráŋŋa ja hotealla Deatnu, sihke šluhtte buot aktivitehtaid 19.3.-13.4. gaskasaš áigodahkii.

17.3. dii. 10.19 Vuosttas koronaboahkuhusat testemis dál

Ovttastuvvon Stáhtain, USAs, leat testen dál vuosttas boahkuhusaid. BBC mielde njeallje olbmo leat ožžon boahkuhusa. Ovttastuvvon Stáhtaid eiseválddiid mielde boahkuhusa geahččaleapmái ja dohkkeheapmái manná goittot ain juo jahki.

Dán boahkahusas leat geavahan oasálaš kopiija virusas. Dutkkit jáhkket dan veahkehit olbmo immunasystema dáistalit virusa vuostá.

Sierrálagan koronavirusboahkuhusaid leat ráhkadeamin miehtá máilmmi.Ovttastuvvon Stáhtain, USAs, leat testen dál vuosttas boahkuhusaid. BBC mielde njeallje olbmo leat ožžon boahkuhusa. Ovttastuvvon Stáhtaid eiseválddiid mielde boahkuhusa geahččaleapmái ja dohkkeheapmái manná goittot ain juo jahki.

Dán boahkuhusas leat geavahan oasálaš kopiija virusas. Dutkit jáhkket dan veahkehit olbmo immunasystema dáistalit virusa vuostá.

Sierralágan koronavirusboahkuhusaid leat ráhkadeamen miehtá máilmmi.

17.3. dii. 7.28 Professor: Koronaepidemiija bistá goittot boahtte geassái

Turku universitehta professor Kari Auranen árvvoštallá, ahte koronavirusepidemiija vuosttas oassi sáhttá bisttit Suomas vel ain juo golbma mánotbaji.

Dan, man guhká epidemiija boahtá bisttit, sáhttá árvvoštallat matemáhtalaččat. Árvvoštallama sáhttá váttásmahttit dahkkit, maid birra ii leat vel diehtu.

17.3. dii. 7.05 Heargecup gaskkalduvvo ollásit

Suoma heargecupa maŋimuš oassegilvu Kuoskus lea šluhttejuvvon. Gilvu galggai leat boahtte vahkoloahpa.

Gonagasgilvvut Anáris leat maid šluhttejuvvon.

17.3. dii. 6.55 Girkonjárgga buohcceviesus diagnoserejuvvon koronavirus

Finnmárkku buohcceviessu muitala, ahte Girkonjárggas lea diagnoserejuvvon korona. Pasientta ohcalii Girkonjárgga buohccevissui mannán vahku loahpa bealde. Pasieantta lea leamašan sirrejuvvon earáin dan rájes.

Positiiva teastaboađus sihkkarastojuvvui vuossárgga.

16.3. dii. 17.28. Suopma ráhkkana heahteláhkii: áigu giddet stáhtarájáid ja giddet skuvllaid

Suopma álggaha válmmaštallat riikkarájáid giddema nu jođánit go vejolaš. Ráđđehus lea mearridan gaskkaduhttit lagašoahpahusa oahppolágádusain, allaskuvllain ja universitehtain gaskavahku 18.3. rájes. Skuvllat leat gitta 13.4.2020 rádjái. Beaivedivššut bissot doaimmas vai kritihkkalaš surggiid bargit besset bargui.

Stáhtaráđđi lea ovttas presideanttain gávnnahan, ahte Suomas ellet earenoamáš áiggiid ja heahteláhka valdojuvvo atnui. Stáhtaráđđi gieđahallá maŋŋebárgga lága atnuiváldinásahusa ja heivehanásahusaid.

Suopma maid álgá ráhkkanit rájiid giddemii nu jođánit go vejolaš. Suoma stáhtaborgáriid ávžžuhit máhccát Supmii dalánaga.

Stáhta gidde stáhta ja gielddaid museaid, teáhterii, girjerájuid ja válaštallan-, nuoraiddoaimmaid, organisašuvnnaid-, astoáiggi- ja riekkisdoaimmaid doaibmalanjaid. Maiddái priváhtasuorggi ja oskkudoaibmiid sávvet doaibmat seamma láhkái.

Galledeamit boarrásiid ja eará riskajoavkkuid ássanbáikkiin gildojuvvojit. Maiddái olggobeale olbmuid galledeamit gildojuvvojit boarrásiidsiiddain, dearvvasvuođaovttadagain ja buohcceviesuin.

Suoma ráđđehus áigu beaivválaččat dieđihit koronadili birra amas boastto dieđut leavvat servodahkii.

16.3. dii. 16.00 Suoma Sámediggi ráddje galledemiid doaibmalanjaide

Sámediggi ráddjegoahtá galledemiidn doaibmalanjaid Sajosis, Ohcejogas ja Heahtás. Sámediggi dieđiha, ahte dušše Sámedikki bargit ja luohttámušolbmot besset johtit doaimmahatlanjain.

Sámedikki stivra gieđahallá 19.3. Sámedikki ráhkkaneami koronavirusdillái ja mearrida dárkilut doaimmain.

Sámedikki bargiid leat rávven oassálastit čoahkkimiidda dušše gáiddusoktavuođain. Sámedikki bargiide leat addojuvvon maiddái rávvagat, ahte flunssas ii oaččo boahtit bargosadjái, iige maiddái, juos gii nu bearašlahtuin lea buozus, vaikke ieš livččiige almmá dávdamearkkaid haga. Sámedikki bargit barget dál eanaš gáiddusbarggus.

Buot sohppon deaivvadeamit, galledeamit ja skuvlendilálašvuođat leat šluhttejuvvon dahje sirdon boahttevuhtii.

Sámekulturguovddáš Sajos info ja restauráŋŋa Čaiju leat gitta 16.–20.3. Sajosa oahpistuvvon johtimat leat gaskkalduhtton doaisttážii, eaige Sajosis lágiduvvo filbmadáhpáhusat dahje eará sullasaš dáhpáhusat, dieđiha Sámediggi.

16.3. dii. 15.30 Lapeco ávžžuha sirret koronabuohcci bázahusaid earáid bázahusain

Lappi bázahusfuolahusa gieldaovttastupmi Lapeco ávžžuha sirret koronanjoammudávdda ožžon olbmuid bázahusaid sierra. Lapeco maiddái ávžžuha bidjat njunneliinniid boaldiruskkaide, iige biobázahusaide. Buohccán olbmuid bázahusaid galgá bidjat sierra bázahuslihtái, mas lea seahkka. Bázahuslihtiid galgá gurret juohke beaivve ja bázahuspussiid galgá giddet bures go daid doalvu bázahuslihttái, dieđiha Lapeco. Lapeco muittuha maiddái, ahte jus bázahuslihti gurremii bohtet boatkagat, bázahusaid galgá báhkket hui diehttásit ja bidjat dakkár sadjái, gos dat eai dagat dearvvasvuođahehttehusaid, eaige eallit beasa daid moivet.

16.3. dii. 15.05 Yle dieđut: Suoma ráđđehus vihkkehallá skuvllaid giddema

Ráđđehus almmuha otne vuossárgga doaimmain, main háliida eastadit koronavirusa njoammumis jođánit olles Supmii. Dát doaimmat dárkkuhit geavadis skuvllaid gidden olles Suomas, muitala Hämeen Sanomat. Áviissa mielde diehtu lea sihkkarastojuvvon máŋgga gáldus.

Maiddái Helsingin Sanomat muitala, ahte skuvllat giddejuvvojit oalle sihkkarit. HS gálduid mielde mearrádus guoskkašii dušše skuvllaid, muhto ii beaivedivššuid.

Yle dieđuid mielde skuvllaid gidden lea oktan áššin ráđđehusa beavddi alde.

Ráđđehus ráđđádallá otne koronavirusdilis ja ordne badjelmearálaš stáhtaráđi čoahkkima. Čoahkkima maŋŋá ordnejit ráđđehusa dieđihandilálašvuođa diibmu 16.

Yle čájeha dieđihandilálašvuođa njuolggosáttan.

16.3. dii. 14.05 Ohcejoga gielddas navdojuvvon koronanjoammun negatiivvalaš

Ohcejoga gielddas navdojuvvon koronavirusnjoammun lea gavnnahuvvon teasttain negatiivalažžan, muitala Ohcejoga doavttir Heidi Eriksen.

Suomas leat dál 272 sihkkarastojuvvon koronanjoammuma, muitala dearvvasvuođa- ja buresveadjinlágadus vuossárgga veaigin. Čájánasaidváldinkriteraid leat rievdadan ja dál eai váldde šat čájánasaid olbmuin, geain eai leat dávdamearkkat.

Koronavirusdili Suomas sáhttá čuovvut dearvvasvuođa- ja buresveadjinlágádusa THL neahttasiidduin.

16.3. dii. 13.35: Finnair heaitá girdimis davás

Boahtte mánu álggu rájis Finnair girdá dušše Roavvenjárgii. Girdimat geahpeduvvojit dađistaga lagamuš guovtti vahku áigge, muhto daid ii leat vel dárkilut diehtu. Dušše beassáža ovddabealde Roavvenjárgga lassin girdet maid Avvilii, Gihttelii ja Guossámii. Boahtte mánu álggus girdet dušše logátoasi dábálaš vuoruid mearis. Sierra guovlluide máilbmái ja ruovttoeatnamii áigot girdit dušše 20 beaivválaš vuoru.

16.3. dii. 12.48 LK: Soađegili skuvlalaččaide ávžžuhus báhcit ruoktot, oahpahus joatkašuvvá skuvllain ja gáiddusin

Soađegili skuvlla rektorat ávžžuhit bearrašiid doallat mánáid ruovttus ja dahkat skuvlabargguid gáiddusin, muitala Lapin Kansa.

Ávžžuhus guoská bearrašiid, main nubbi vánhemiid sáhttá báhcit ruoktot. Rektorat deattuhit, ahte ádjáid ja áhkuid dahje eará riskajoavkkuid ii galgga bivdit mánnáfáktan ruoktot. Soađegilis oahpaheaddjit addet studerenrávvagiid Wilma bokte.

16.3. dii. 12.35 Kárášjoga gielda bidjá karantenagáibádusaid maid Norgga siste mátkkošteapmái

Eiseválddiid dieđuid mielde Kárášjogas ii leat vel korona njoammudávda. Gielda almmuha, ahte háliida eastit olbmuid, geain veadjá leat dávda, njoammudeamis dávdda viidasabbot Kárášjohkii.

Gieldda dieđáhusas namuhit, ahte sii oaidnet dávdda leavvamin olu guovlluin Norggas ja heahtejođihangoddi lea mearridan viiddiduvvon karantenamearrádusaid.

– Buohkat, geat leat leamaš Oslos, Agderis, Rogalánddas, Vikenis, Vestfolddas ja Telemárkkus, Innlandetis ja Vestlánddas galget 14 beaivásaš ruoktokarantenii. Dat gusto buohkaide, geat leat boahtán dáin guovlluin njukčamánu 9. beaivvi rájis, namuha Kárášjoga gielda dieđáhusastis.

16.3. dii. 12.24 Eanodagas astoáiggefálaldagat šluhttejuvvon – eanas báikkiin uvssat gitta

Eanodaga gielddas leat máŋggat báikkit gidden uvssaidis ja astoáiggefálaldagat šluhttejuvvon. Gielda lea almmuhan, ahte sihke lihkadanhálla, alšásále ja maiddái Hetta Hiihtomaa čierastallanluohkká leat giddejuvvon doaisttážii. Maiddái girjerájus lea sirdásan iehčanas geavahussii.

Eanodaga oaggunvahkku lea maid šluhttejuvvon.

Meahciráđđehus fas lea bissehan áššehasbálvalusa buot luondduguovddážiin ja dan geažil sihke Heahtá ja Gilbbesjávrri luondduguovddážat leat gidden uvssaidis.

Eskelisen Lapin Linjat fas lea heaitán vuodjimis Romsii ja Áltái Norgga beallái. Eanodagas Roavenjárgii linnjebiila johttá dábálaččat.

Sámisostera Luovatupa Heahtás fas gidde uvssaidis ihttin 17.3. ja rahpasa čuovvovaš geardde easka mánu geahčen. Maiddái Anára, Gáregasnjárgga ja Vuohču doaibmabáikkit leat gitta čuovvovaš mánu.

16.3. dii. 12.00 Heargegonagasgilvvut šluhttejuvvon

Suoma heargevuoddjiid ovttastus Suomen porokilpailijat almmuha, ahte sis lea ain áigumuš lágidit Kuosku boazocup-oassegilvvu boahtte vahkuloahpas, jus eiseválddiin eai boađe ođđa ráddjehusat čoahkkanemiid ektui. Kuosku oassegilvui eai geahččit beasa searvat.

Searvi lea goittotge mearridan šluhttet Anára Boazogonagas-gilvvuid 28.-29.3.2020 go dat leat nu stuorra gilvvut, dadjá Seppo Koivisto Suomen porokilpailijat -searvvis.

16.3. dii. 11.35 Suomas vuosttas olmmoš beavttalmahttojuvvon divššus koronavirusa dihte – HUS: "Leat ráhkkanan dása"

Beavttalmahttojuvvon divššus lea ealáhatahkásaš olmmoš, guhte gearggai leat oanehis áiggi ossodatdivššus.

– Riikkaidgaskasaš buozalmasvuođaid vuođul lei vuordimis, ahte maid Suomas oassi koronanjoammuma ožžon olbmuin dárbbaša beavttalmahttojuvvon divššu. Leat ráhkkanan dán várás, dadjá bajitdoavttir Ville Pettilä HUS beavttalmahttojuvvon divššus.

Koronavirus sáhttá dagahit smávva oasis buohcciin fáhkka vuoigŋanváttisvuođaid go geahppáide čoggojit vuolšeseallat ja golggus.

16.3. THL: Koronavirusii buohccán olbmuid mearri sáhttá leat 20–30 geardde stuorát, go maid dán rádjái leat gávnnahan

Suoma koronanjoammumiid mearri sáhttá leat duohtavuođas 20–30 geardde eanet go maid dán rádjái leat gávnnahan, dadjá THL dahje Dearvvašvuođa- ja buresveadjinlágádusa alimus hoavda Markku Tervahauta.

Buot návdojuvvon njoammumiid eai šat teste, nu ahte njoammumiid mearri lea jáhkkimis olu stuorát. Suomas váldet iskosiid dálá dilis dušše dakkár olbmuin, geat leat garrasit buohccán, gullet riskajovkui dahje sii barget sosiála- ja dearvvašvuođasuorggis.

16.3. dii. 9.30 Ohcejoga searvegoddi geahpeda dáhpáhusaid – ipmilbálvalusaide fárrui iežas sálbmagirji

Ohcejoga searvegoddi geahpeda dáhpáhusaid. Searvegoddi muitala Facebook-siiddustis, ahte vuossárgga 16.3. rájes Ohcejoga searvegottis lágidit dušše ipmilbálvalusaid ja girkolaš doaimmahusaid. Buot eará doaibma šluhttejuvvo. Searvegoddi maiddái bivdá olbmuid váldit fárrui iežas sálbmagirjji dahje geavahit telefonnas virsikirja.fi -neahttasiiddu, gos gávdno digisálbmagirji

16.3. dii. 8.30 Ohcejogas koronaeahpádus, dadjá Ohcejoga doavttir

Ohcejoga gieldda vástideaddji doavttir Heidi Eriksen muitalii vuossáriđida Yle Sámi iđitsáddagis, ahte Ohcejogas lea koronaeahpádus. Eahpáhusa bohtosat čilget otne vuossárgga, dadjá Heidi Eriksen.

Eriksen namuha jearahallamis maiddái, ahte Anára gielddas lea sihkkarastojuvvon okta korona-dáhpáhus turisttas vahkuloahpa áigge. Turista lea sirrejuvvon eará olbmuin, muitala Eriksen. Yle Sápmi lea jearran Anára jođiheaddjidoaktáris Outi Liisananttis Anára koronadáhpáhusas, muhto son ii kommentere ášši. Liisanantti namuha, ahte THL muitala koronadáhpáhusaid birra.

– Dál ávžžuhivččen olbmuid leat ruoktogielddain, lohká Eriksen.

Heidi Eriksena jearahallama sáhttá guldalit Yle Areenas.

Beaividuvvon 16.3.dii 13.00. Lasihuvvon dieđut Anára jođiheaddjidoaktára addin dieđut.

16.3. dii. 9.06 Davviriikkat ráddjejit johtima

Norga lea álgán hui garra doaimmaide koronavirusepidemiija dihte. Buot olgoráját giddejuvvojit dál gávcci áigge, ja dan lassin maid hápmanat ja girdingiettit giddejuvvojit. Maiddái máŋggat earát Fiestar-Eurohpa riikkat leat dieđihan rájáid giddemis. Dánmárku lea juo gitta ja Viro giddana ihtin. Maiddái Duiskka lea giddemin máttarnjáiddes.

Davvin Kárášjoga gielda lea mearridan, ahte Mátta-Norggas boahtti olbmot šaddet ruovttokarantenii 14 jándorii juos bohtet Kárášjohkii.

Guovdageainnu gieldages lea mearridan, ahte olbmot geat bohtet dohko Tromsa ja Finnmárkku fylkkaid olggobealde dahje Norlándda ja Lappi eanangottiid olggobealde, galget leat 14 jándora karantenas Guovdageidnui joavdama maŋŋá. Lassin lea mearriduvvon, ahte turistenbáikkiin Gihttela gielddas ja Saariselkäs Anáris juos bohtet, šaddet karantenii.

Nannekeahtes diehtu muitala, ahte suopmelaš dearvvasvuođasuorgi olbmot, geat barget Norggas, ožžot goit johtalit riikkaid gaskkaš.

Maiddái Davvi-Norggas ja Davvi-Ruoŧas leat vahkuloahpa áigge gávdnon ođđa doronanjoammumat. NRK Sápmi muitala sotnabeaivve, ahte Álaheajus leat duođaštan golmma olbmos koronavirusa. Finnmárkkus leat duođaštan koronanjoammuma dál njealji olbmos.

15.3. dii. 15.45 koronanjoammumat lassánit Davviriikkain

Suomas leat gávnnahan dál oktiibuot 241 koronavirusnjoammuma (15.3.), muitala Suoma dearvvasvuođa ja buresveadjinlágádus THL. Ođđa njoammumat leat maiddái Davvi-Suomas. Lappi buohccedikšunbires ja Länsi-Pohja buohccedikšunbires leat goappasge guokte ođđa koronanjoammuma.

Maiddái Davvi-Norggas ja Davvi-Ruoŧas leat vahkuloahpa áigge gávdnon ođđa koronanjoammumat. NRK Sápmi muitala sotnabeaivve, ahte Álaheajus leat duođaštan golmma olbmos koronavirusa. Finnmárkkus leat duođaštan koronanjoammuma dál njealji olbmos.

Norga lea maid mearridan giddet girdigittiid ja hámmaniid vuossárgga iđit rájes. Ášši almmuhii stáhtaminister Erna Solberg lávvardaga. Norgalaččat gal ožžot máhccat ruovtturiikii. Norga lea maid árabuš almmuhan ráddjehusaid olgoriikalaččaid riikiiboahtimis. Oktiibuot Norggas SARS-CoV-2-koronavirusii leat buohccán badjel duhát olbmo, čájehit Norgga dearvvasvuođaeiseválddiid statistihkat.

Davvi-Ruoŧas Norrbottenis leat goit gávcci olbmo duođaštan ožžon koronanjoammuma, muitala SVT Norrbotten. Ruoŧas koronavirus lea njommon vehá váile duhát olbmui, čájehit Ruoŧa dearvvasvuođaeiseválddiid dieđut.

13.3. dii. 15.45 Geahča animášuvnnas, mo koronavirus lea leavvan Eurohpás

Video: median oletuskuva, musta laatikko
Animašuvdna čájeha nannejuvvon koronavirusnjoammumiid lohkomeriid ođđajagimánu 22. ja njukčamánu 12. beaivvi gaskkas. Animašuvnna dieđut vuođđuduvvet máilmmi dearvvasvuođaorganisašuvnna WHO datai, mii lea dievasmahttojuvvon Johns Hopkins -universitehta dieđuiguin.

13.3. dii. 15.15 Guovdohálddahuseiseválddit gildet buot badjel 500 olbmo dáhpáhusaid

Guovlohálddahuseiseválddit leat gieldán badjel 500 olbmo dáhpáhusaid. Mearrádus guoská sihke olgo- ja sisdáhpáhusaid infekšuvnna (covid-19) leavvama easttadeami dihte.

Mearrádusat gusket buot Nánnan-Suoma gielddaid ja leat fámus gitta 12.4. rádjái. Mearrádus vuođđuduvvá njoammundávdalága (1227/2020) 58 §:ii ja dainna easttadit ođđa koronavirusa dagahan infekšuvnna leavvama ja dan dagahan hehttehusaid olbmuide ja servodahkii.

13.3. dii. 15.10 Eanodagas skuvllalaččaid ávžžuhit váldit skuvlagirjjiid ruoktot

Eanodaga skuvlalaččaid leat ávžžuhan váldit skuvllagirjjiid ruoktot. Eanodaga hálddahuslaš rektor Riitta Peltovuoma dadjá, ahte sii leat ávžžuhan skuvlalaččaid váldit girjjiid ruoktot, jus gielddat gártet giddet skuvllaid koronanjoammuma dihte.

Anára čuvgehusdoaimma jođiheaddji Ilkka Korhonen namuha, ahte Anáris leat ráddjen gussiid galledeami skuvllain. Maiddái skuvllaid galledeamit leat heaittihuvvon doaisttážii.

Ohcejoga gieldda čuvgehushoavda-rektor Eila Tapiola namuha, ahte Ohcejoga skuvllain leat čuvvon hui dárkilit dávdadili eandalii Norgga bealde. Tapiola dadjá, ahte sii leat muittuhan bargiide, ahte olgoriikii mátkkošteami ja bargama olis njuolggadusat gusket maiddái Norgga.

13.3. dii. 14.45 Koronavirus čuohcá priváhtaolbmuid plánaide – 1 700 olbmo heajat sirdásedje

Koronavirusa njoammunvárra čuohcá máŋgga priváhtaolbmo plánaide. Guovdageaidnolaččat Máret Inger Gaup ja Niillas Heandarat Skum gárttaiga sirdit heajaid maŋŋeleabbui, muitala NRK Sápmi. Gaup ja Skum leigga bovden heajaide 1 700 guossi ja soai galggaiga náitalit njukčamánu 20. beaivve. Loga eanet sudno dovdduid birra NRK Sámi neahttasiidduin.

Suoma Sámedikki riikkaisgaskasašáššiid čálli Inka Saara Arttijeff fas ii leat sáhttán mátkkoštit Anárii bargui. Arttijeff ássá Itália oaivegávpot Romas, gos johtima leat ráddjen juo guhkit áigge.

Arttijeffii sáhte vuolgit ruovttus gosage earágo bargguid, dearvvašvuođalaš sivaid dahje bákkolaš áššiid dikšuma dihte, ovdamearkka dihte borramušgávpái.

– Dáppe leat gidden skuvllaid, universitehtaid, ja mánáidgárddiid. Restoráŋŋat, bivttasgávppit, kafeat, ja máŋggat hoteallat maid leat gitta gaskaboddosaččat. Turisttat eai jur oidno, muitala Arttijeff mo lea Romas dál. Loga Inka Saara Arttijeff jurdagiid birra dáppe.

13.3. dii. 13.00 SOG ordne oahpahusa gáiddusin

Sámi oahpahusguovddáš SOG mearridii odne bearjadaga sirdásit dalán boahtte vahku vuossárgga rájes gáiddusoahpaheapmái ja gáiddusbargui. Gáiddusoahpahus bistá cuoŋománu 9. beaivve rádjai. Oahppit eai galgga boahtit skuvlii dán áigodagas. SOG gidde maiddái ássodaga.

SOG gaskaldahttá maiddái oanehis skuvlejumiid. Ođđa skuvlejumiid álgináiggit čielggaduvvo maŋŋelabbos.

Skuvlii eai luoitte vierroolbmuid ja SOG bargit ožžot bargat skuvllas dušše rektora lobiin.

Sámi oahpahusguovddáš ávžžuha skuvlla ohppiid ja bargiid garvit báikkiid, gos lea alla noammunriskka, sihke čuovvut aktiivvalaččat eiseválddiid dieđiheami.

– Min ulbmilin lea suddjet min oahppiid ja bargiid, ja maiddái geahččalat njoazidit koronavirusa leavvama sámeguovllus, lohká skuvlla rektor Eeva-Liisa Rasmus-Moilanen.

13.3. dii. 12.57 Studeantačállimiid reálaiskkosat ordnejuvvojit vahku árabut

Giđa studeantačállimiid reaálaávdnasiid iskkosa sirdet vahkkuin árabui koronavirusa dihte.

Sámegiela čállimiidda dat ii váikkut. Sámegiela vierisgiellan čállet otne bearjadaga. Eatnigiela iskkus ordnejuvvo maŋit vahkus, 23. beaivve.

Geahča olles ođđa áigetávvala dás.

Divvojuvvon 13.3. dii. 13.15: Sámegiela iskkosiidda dat ii váikkut.

13.3. dii. 12.45 Anára ja Soađegili gielddat ráddjejit galledemiid seaŋgaossodagas ja bálvalandáluin

Anára ja Soađegili gielddat dieđihit, ahte olbmuid eai ávžžut galledit dearvvašvuođaguovddážiid seaŋgaossodagaid dahje boarráriid dikšunbáikkiid ja bálvalandáluid. Jus leš dárbu beassat galledit, galgá váldit oktavuođa njuolga dikšobáikki ovttadahkii.

Anára gielda šluhtte maid sohpojuvvon luopmodikšun- ja veajuiduhtináigodagaid. Soađegili gielda bealistis šluhtte gielddadállui plánejuvvon dilálašvuođaid gitta miessemánus rádjái.

Beaividuvvon Soađegili dieđuiguin 13.3. dii. 14.33.

13.3. dii. 12.10 Eanodagas šluhttejit dáhpáhusaid ja girjebusse bisánii

Eanodaga gielda almmuhii, ahte guovllus leat šluhtten máŋggaid dáhpáhusaid koronavirusa easttadeami dihte. Dáhpáhusain leat šluhttejuvvon Márjjabeivviid ja Saami Ski Race lassin buot dáhpáhusat luondduguovddážis, Kino Hetta filbmačájáhusat ja girjerádjosa Lue Laula Kirjoita -mánáidčájálmas.

Dasa lassin girjerádju almmuha, ahte davviriikalaš girjebusse ii jođe doaisttážii. Maiddái Muonio buresbirgenguovddáža rabasuvssaid beaivi 16.3. lea šluhttejuvvon.

13.3. dii. 11.50 Geahččit eai beasa boazocup-oassegilvui Sallas

Salla boazocup-oassegilvu lágiduvvo lávvardaga ja sotnabeaivve, muhto geahččit eai beasa čuovvut gilvvu.

Suomen porokilpailijat -searvi almmuhii áššis Facebook-siiddustis bearjadaga iđitbeaivve. Searvi maiddái almmuha, ahte Anára gonagasgilvvuid oasil mearrádus dahkkojuvvo vuossárgga.

13.3. dii. 11.30 Norggas bolesstášuvnnat gitta goit guokte vahku

Buot politistašuvnnat leat gitta aŋkke guokte vahku koronavirusa geažil, muitala NRK. Olbmot eai sáhte fitnat politistášuvnnas pássa ordnemin, áššiid váidimin, čoahkkimastimin soabadallanráđis dahje vearjoáššiid dikšumin.

Maiddái geaidnodoaimmahaga stášuvnnat leat giddejuvvon, iige dál leat guovtti vahkkui vejolaš háhkat vuodjinkoartta dahje biilla geahčahit, muitala NRK Sápmi.

13.3. dii. 11.20 Koronavirusii leat buohccán Suomas dál 155 olbmo

Dearvvasvuođa- ja buresveadjinlágádus THL dieđuid mielde Suomas leat hui lahka dan dili, ahte koronavirus lea leavvan epidemiijan.

Dávdda lea leavvagoahtán Eurohpás jođáneabbot ja dilli nuppástuvvá Suomasge epidemiijan juo vahkuloahpa áigge.

THL lea duorastaga luohpan meroštallamis mange guovllu epidemiijaguovlun dasgo dávda lea leavvan nu viidát buot guovlluide. Suomas dávdda njoammun lea vel oalle bures dieđus, muhto dátge sáhttá nuppástuvvat hui jođánit, dadjá THL hoavda Mika Salminen.

Suomas leat bearjadaga iđitbeaivve (13.3.) dieđihan, ahte koronavirus lea njommon Suomas 155 olbmui.

13.3. dii. 10.40 Ipmilbálvalusaid áigot doallat muhto rohkosbottuid lágádusain gaskkalduhttet

Eanodaga searvegoddi almmuha, ahte sii geahččalit doallat ipmilbálvalusaid ja buot girkolaš doaimmahusaid buot diliin. Eahkedaš- dahje rihppaipmilbálvalusaid sadjái ordnejit goittot sátneipmilbálvalusaid, muitala sadjásaš girkohearrá Matti Hirvilammi.

Searvegottit čuvvot ráđđehusa ávžžuhusaid mainna eastadit koronavirusa njoammuma. Dasa lassin girkoráđđehus ja bismagoddi leat rávven searvegottiid boarrásiid ja buohcciid suodjaleamis. Danin ovdamearkan Eanodaga searvegoddi gaskkalduhttá rohkosbottuid doallama dikšolágádusain, almmuha girkohearrá.

13.3. dii. 08.45 Ruoŧa Sámediggi mearredii bissehit buot bargomátkkiid

Ruoŧa Samedikki jođihanjoavku mearridii duorastaga bissehit buot bargomátkkiid otná beaivvi rájes koronavirusa dihte.

Maiddái čoahkkimat, oahpahusat ja konferánssat mat gáibidit báikki alde leahkima leat šluhttejuvvon.

13.3. dii. 07.57 Márjjábeaivvit šluhttejuvvon

Maiddái Márjjábeaidoaluid Heahtás leat šluhtten eastadandihte koronavirusa leavvama.

Heahtá Márjjábeaivvit livčče galgan leat 20.3.–21.3.

13.3. dii. 07.50 Dálvesoađi muitoboddu šluhtejuvvon Helssegis

Dálvesoađi nohkamis šaddá otne bearjadaga 80 jagi. Stáhtaráđi mearrádusa mielde girkobiellut čudjet olles riikkas soađi nohkama muitun diibmu 10.55-11.00 gaskas. Dáinna ávvudit dan bottu, go soahti nogai.

Suoma ja ovddeš Sovjetlihttu gaskkasaš ráfisoahpamuš bođii fápmui diibmu 11.00. Helssega duopmogirkku muitoboddu lea šluhttejuvvon korona dihte. Dasa galge oassálasttit maid stáhta njunnožat.

13.3. dii. 07.50 Oahppit besse karantenas Kárášjogas ja Romssas

Kárášjoga ja davvi-romsalaš joatkkaskuvllat oahppit leat beassan eret karantenas, go ovtta oahppis ii leatge koronanjoammun.

Davvi-romsalaččat gallejedje maŋŋebárgga Kárášjoga joatkkaskuvllas, ja joavkkus lei okta nuorra, guhte lei áiddo mátkoštan Frankriikkas.

Sus navde korona, muhto teasttat ledje negatiivvalaččat.

12.3. dii. 17.30 Salla boazocup-gilvu lágiduvvo lávvardaga ja sotnabeaivve

Suomen porokilpailijat -searvi almmuhii duorastaga, ahte boazocup-oassegilvu Sallas gal lágiduvvo boahtte vahkuloahpas.

Seppo Koivisto dadjá, ahte searvi čuovvu koronavirusa njoammundili ja vihkkehallá boahtte vahkus sierra dan, ahte ordnejuvvojitgo boazocup-oassegilvu Kuoskus 21.–22.3. ja heargegonagas-gilvu Anáris 28.–29.3.2020.

12.3. dii. 16.25 Saami Ski Race maid šluhttejuvvo

Válaštallansearvvit Hetan Hukat ja Kautokeino IL almmuhedje duorastaga, ahte lágideaddjit eai ordne Saami Ski Race čuoigandáhpáhusa dán giđa. Gilvvohallamiid jođiheaddji Heikki Järvistö namuha, ahte gilvvut šluhttejuvvojit Suoma ja Norgga dearvvasvuođa eiseválddiid ávžžuhusas easttadandihte koronavirusnjoammumiid. Saami Ski Race galggai ordnejuvvot 28.3.2020.

12.3. dii. 16.15 Anára gielddas eai leat vel giddemin skuvllaid

Anára gielddas skuvllaid ja beaivedivššuid doaibma joatkašuvvá dábálaš vuogi mielde. Skuvlalaččaid vánhemiidda sáddejuvvon dieđáhusas čuvgehusdoaimma jođiheaddji Ilkka Korhonen dadjá, ahte oahpahus, bagadallan ja iskosat ordnejuvvojit dábálaš vuogi mielde, muhto dili nuppástuvvama čuvvot ja dasa reagerejit.

Korhonen mielde olles Suomas leat skuvllaide sádden rávvagiid, ahte jus skuvllaid gártet giddet, dalle oahpahusas sirdásit gáiddusoahpahussii. Dákkár dáhpáhusas áššis dieđihit sierra earet eará Wilma-dieđu.

12.3. dii. 14.10 Suomas ávžžuhit šluhttet badjel 500 olbmo dáhpáhusaid

Suoma stáhtaminister Sanna Marin (sd.) dadjá, ahte sii leat addimin ávžžuhusaid almmolaš dáhpáhusaid ordnemii. Sii ávžžuhit šluhttet buot badjel 500 olbmo dilálašvuođaid gitta miessemánu loahpa rádjái.

Ráđđehus ávžžuha maid, ahte epidemiaguovlluin boahttit galget soahpat bargoaddiin bargui máhccamis. Luopmomátkkiid gánniha sirdit ja gánniha dahkat mátkkoštanalmmuhusa go manná olgoriikii, dadjá Marin.

Ráđđehusa dieđihandilálašvuohta koronavirusa birra álggii diibmu 14.00.

Suoma gielddain leat maiddái ráhkkaneamen skuvllaid giddemii. Aŋkke Helssegis, Espoos ja Lohjas leat vánhemiidda sádden Wilma-dieđu, ahte oahppiid gánnihivčče váldit skuvlagirjjiid ruoktot ja seailluhit daid doppe. Skuvllat ráhkkanit dainna vugiin dasa, ahte jus skuvllaid gártet fáhkka giddet koronanjoammuma dihte. Oahpahusa sáhttet ordnet gáiddusin ja addit bargobihtáid Wilma bokte.

12.3. dii. 14.00 Kárášjoga gielddanjunuš ávžžuha olbmuid várrugasvuhtii – Norggas leat mearridan giddet buot skuvllaid

Kárášjoga gielddadirektevra Kurt Maurstad árvala NRK Sápmái, ahte buot almmolaš arenat giddejuvvojit koronadávdabalu geažil. Girkut giddejuvvojit ja konfirmášuvnnat leat maŋiduvvon.

– Muhto skuvllat ja mánáidgárddit leat ain rahpasat, dadjá Maurstat.

Maurstad bivdáge buohkaid, geat leat bidjon karantenii váldit dan duođas ja bissut ruovttus.

Norggas dieđihedje duorastaga, ahte buot skuvllat ja mánáidgárddit giddejuvvojit koronavirusa njoammunvára dihte. NRK muitala, ahte ráđđehus lea mearridan doaimmaid, maiguin easttadit koronavirusa njoammumis olbmuide. Norgga ráđđehus áigu muitalit easttadandoaimmain preassadilálašvuođas diibmu 14.00 Norgga áiggi.

12.3. dii. 13.20 Sámi našunálateáhter bisseha čájálmastuvrra

Sámi nášunálateáhter Beaivváš lea maid mearridan šluhttet čájálmastuvrra Sámis. Nášunálateáhter almmuhii duorastaga, ahte sii leat bissehan Olbmot-čájálmasmátki eastadandihte koronavirusa leavvama.

Čájálmasat Deanus, Ohcejogas, Anáris, Kárášjogas ja Guovdageainnus eai čađahuvo, almmuha Nášunálateáhter Beaivvaš Facebook-siiddustis.

12.3. dii. 13.15 Sámenuoraid dáiddadáhpáhus šluhttejuvvo

Sámediggi skuvlen- ja oahppamateriáladoaimmahat lea mearridan šluhttet Sámenuoraid dáiddadáhpáhusa koronavirusa njoammuma eastadeami dihte. Guovttebeaivásaš dáhpáhus livččii lágiduvvon Anáris Sajosis ja Rivdolis Vasatokkas 15.–16.4.

Dáiddadáhpáhusa prošeaktabargi Unna-Maari Pulska atná váidalahttin dan go gártet šluhttet Sámenuoraid dáiddadáhpáhusa.

– Dán dilis dat orru leame áidna molssaeaktu. Dáhpáhusas lea hui stuorra mearkkašupmi sámemánáide ja -nuoraide, ja dan vurdet ja dasa ráhkkanit birra jagi, namuha Unna-Maari Pulska dieđáhusas.

Sámediggi lea čielgadeamen dili riikkaviidosaš lágideddjiiguin ja dutkamin sirdašuvvágo dánsuntemá boahtte jahkkái.

12.3. dii. 12.30 Liet-lávlungilvu maid šluhttejuvvon

Eurohpá unnitlogugielaid Liet-lávlungilvu lea maid šluhttejuvvon. Áššis muitala NRK Sápmi.

Mannán jagi Sámi Grand Prix lávlunoasi vuoiti Saara Hermansson lei dieđihuvvon gilvui. Liet-lávlungilvu galggai dollojuvvot Dánmárkkus cuoŋománu 3. ja 4. beaivve.

12.3. dii. 12.00 Soađegili gielda rahpá rávventelefovnna korona dihte

Soađegili gielda rahpá rávventelefovnna gieldalaččaide, geat navdet ieža buohccán koronavirusii dahje leamaš koronabuohcci lahkosis. Soađegili gieldda rávventelefovdna lea geavahusas duorastaga diibmu 12 rájes ja dat lea rabas diibmu 8–21. Rávventelefovnna nummir lea 040 128 5295.

Soađegili dearvvasvuođafuolahusas dego earáge Sámeguovllu gielddain ávžžuhit váldit oktavuođa dearvvasvuođafuolahussii telefovnnain, iige boahtit njuolgga dearvvasvuođaguovddážii go dávdamearkkat dihttogohtet. Almmolaš gažaldagain gielddat ávžžuhit váldit oktavuođa THL koronarávvemii.

12.3. dii. 11.40 Ođđa njoammumat Suomas – HUS bargi buohccán koronai

Suomas leat duorastaga gávnnahan 22 ođđa koronanjoammuma. Dál Suomas leat 87 koronanjoammuma.

Helsset universitehtalaš buohcceviesus (HUS) lea buohcceviesu bargi lea buohccán koronai, dieđiha Helssega ja Uudenmaa buohccedikšunbire.

HUS ordne ášši olis dieđihandilálašvuođa duorastaga diibmu 12.30. Yle čájeha dieđihandilálašvuođa njuolgga diibmu 12.25.

Buohccedikšunbiret leat muitalan duorastaga iđđes ođđa koronavirusnjoammumiin. Ođđa njoammumat leat dán muttus aŋkke gávcci.

Suoma dearvvasvuođa ja buresveadjinlágádus THL lea duorastaga luohpan meroštallamis sierra riikkaid ja guovlluid epidemiaguovlun. THL mielde epidemiadilli lea Eurohpás ja Davvi-Amerihkas nuppástuvvan nu jođánit, de virus sáhttá njoammus juohke sajis Eurohpás ja eará guovlluin máilmmes.

12.3. Guovdageainnu beassášdoalut šluhttejuvvojit ja SGP maŋiduvvo

Norgga bealde leat šluhttegoahtán sierralágan dáhpáhusaid koronavirusa dihte., muitala NRK Sápmi. Ovdamearkan Guovdageainnu ja Kárášjoga duodjemárkanat ja ja Sámi beassášdoalut, mii sisttisdoallá maid "Sámi Grand Prix" -lávlun- ja juoigangilvvohallamiid, leat šluhttejuvvon. Olles áiggi lasi doalut šluhttejuvvojit dahje maŋiduvvojit.

Norgga bealde leat maid skuvllat giddejuvvon dahjege biddjojuvvon karanteniid korona dihte. Maid Davvi-Norgga stuorra soahtehárjehus lea bissehuvvon.

Maiddái Guovdageainnu searvegoddi lea almmuhan dáhpáhusaid šluhttemis. Searvegodderáđđi almmuhii, ahte dat gidde Guovdageainnu ja Máze girkuid njukča- ja cuoŋománnui. Seammás searvegodderáđđi almmuhii maid, ahte konfirmašuvnnat sirdojuvvojit borgemánnui.

Suoma bealde dilálašvuođat eai goit vel leat šluhttejuvvon, vuordimis leat áŋgge Anára heargegonagasvuodjimat mánu loahpas ja sámenuoraid dáiddadáhpáhus boahtte mánus.

12.3. Háhpárándis koronanjoammun giddii skuvlla

Ruoŧa bealde leat gieldán čoahkkanemiid, maidda bohtet eambo go 500 olbmo.

Ruoŧa ja Suoma rájá alde Háhpárándis lea vuosttas koronanjoammun. Njoammun lea Tornionlaakso skuvlla nappo Tornedalskolanin bargis. Dán dihte Tornedalskolan ja giellaskuvlla badjedássi leat goit otne duorastaga gitta.

Usa presideanta Donald Trump lea duorastaga iđedis gieldán mánotbadjái mátkkošteamis Eurohpás USA:i. Gielddus ii goittot guoskka Británnia.

11.3. Suomas lasi ođđa njoammumat

Suomas koronavirusdilli eallá bottus nubbái, ja gaskavahku eahkedis ovdalaš gávcci dávda leai njommon 61 olbmuid. Eanáš buohccit leat máttimus Suomas, muhto njoammumat leat leavvánan maiddái Viestar- ja Nuorta-Supmii. Maŋimuš Pori gávpoga guovllus lea muitaluvvon guovtti buohccán almmáiolbmos. Soai leaba goit buriid veajuid alde.

Loga dáppe varrasamos dieđuid koronavirusa birra Suomas.

11.3. WHO julggašta koronavirusa pandemian

Ovttastuvvon Našuvnnaid dearvvašvuođaorganisašuvdna WHO julggaštii koronavirusa máilmmiviidosaš buohccivuohtan pandemian. WHO ii goit nuppástuhte dávdda várálašvuođaluohká iige njoammuma eastinrávvagiid. Virusnjoammuma leat ožžon badjel 120 000 olbmo ja dasa leat jápmán badjel 4300 olbmo.

11.3. Suomas leat 19 ođđa koronavirusnjoammuma

Suomas leat gávnnahan goittot 19 ođđa koronavirusnjoammuma. Njoammumiin 11 leat Uusimaas, golbma Pirkanmaas, okta Gaska-Suomas, okta Kanta-Hämes ja okta Varsinais-Suomas.

Suomas leat dán rádjai gávnnahan oktiibuot 59 koronavirusnjoammuma.

11.3. Murmánskkas váruhit mátkkošteamis Supmii ja Norgii

Ruoššaš Murmánskka guovllu ássiid váruhit mátkkošteamis Supmii ja Norgii koronavirusáitaga dihtii.

Barents Observer -neahttaaviissa mielde ná lea maŋŋebárgga ávžžuhan guvernevra Andrei Tshibis guovlohálddahusa čoahkkimis. Sivvan son namuhii ránnjáriikkain gávnnahuvvon koronavirusnjoammumiid. Murmánskka guovllus ii leat virggálaš statistihkaid mielde oktage koronavirusnjoammun.

Barents Observer dieđuid mielde koronavirusa dihtii leat maid šluhtten ustitvuođačuoigamiid, maid galge lágidit buot golmma riikka guovllus boahtte vahku doajáldagas.

11.3. Sámi allaskuvla lágida oahpahusa neahta bokte koronavirusa dihtii

Sámi allaskuvla Guovdageainnus dieđiha, ahte virusa njoammuma eastadeami dihtii allaskuvlla oahput galget dál lágiduvvot neahta bokte ja studeanttaid eai čohkke lagasoahpahussii. Galledemiid áigot maid ráddjet Sámi allaskuvlla diehtosiiddus.

Sámi allaskuvlla dieđiha maiddái, ahte Ii galgga searvat makkárge lágidemiide mat čohkkejit eambbo go 500 olbmo. Galgá maid árvvoštallat, ahte leago dárbbašlaš searvat eará stuorat lágidemiide.

10.3. Kárášjogas giddejit skuvlla

Ovdal gaskaija Kárášjoga gieldda heahtegearggusvuođajoavku lágida preassakonferánsa Kárášjoga gielddavisttis. Kárášjoga Sámi joatkkaskuvllas lea galledan Davvi-Romssa joatkkaskuvlla oahppi, geas navdet koronavirusa. Olles skuvlla bidjet karentenii ja nu maiddái 31 olbmo galledeaddjijoavkku. Skuvla lea gitta goit lávvardahkii, goassážii vurdet bohtosa koronaiskosis. Jus oahppis gávnnahuvvo koronavirus, karantena jotket guvttiin vahkuin.

Norggas leat gávnnahan koronavirusa maŋŋebárgga dieđuid mielde jo 277 olbmos. Norgga dearvvašvuođaeiseválddit ávžžuhitge dál šluhttet dahje sirdit dáhpáhusaid, maidda vurdet badjel 500 oassálasti, čállá VG-aviisa.

10.3. Njoammumat lassánit Suomas

Suoma dearvvašvuođa- ja buresveadjinlágádus THL dieđihii otne logi ođđa koronavirusnjoammumis. Suomas leat dán rádjai gávnnahan koronavirusa oktiibuot 40 olbmos.

10.3. Koronavirus ii dagat dađi stuorát fuola sámegielddaid skuvllain

Ohcejoga, Eanodaga ja Anára gielddaid skuvllat eai leat beare fuolas koronavirusis. Skuvllat bissot rabasin ja dili čuvvot ráfálaččat. Sámeguovllu skuvllat čuvvot oahpahusráđđehusa ja dearvvašvuođaeiseválddiid rávvagiid iežaset doaimmain.

Sámenuoraid dáiddadáhpáhussii oassálastin goit ságastahttá.Sámenuoraid dáiddadáhpáhus čohkke máŋggaid čuđiid sámemánáid ja -nuoraid miehtá Suoma Anárii cuoŋománu beallemuttus. Dáhpáhusa eai leat goittotge vel šluhttemin, muitala dáhpáhusa buvttadeaddji Unna-Maari Pulska.

9.3. Koronavirusa geažil šluhttejit eamiálbmotdáhpáhusaid

Koronavirusa dihte eai áiggo lágidit Árktalaš dálveriemuid Kanádas. Árktalaš dálveriemuid nappo Arctic Winter Games -gilvvuid galge ordnet 15.3–21.3. Yukon territoria oaivegávpogis Whitehorses. Gilvvuide ledje vuolgimin sulaid 2 000 olbmo iskkadit searaideaset iešguđet šlájain dego spábbačiekčamis ja čuoigamis.

Yukon dearvvašvuođaeiseválddit mearridedje šluhttet gilvvuid, go ballet virusa njoammut gilvvuid oktavuođas, muitala NRK Sápmi. Birrasiid 60 sámi nuora ja jođiheaddji ledje mannamin AWG gilvvuide Kanádai Suomas, Ruoŧas ja Norggas.

Guovdageainnus fas galge álgit 9.3. Árktalaš eamiálbmogiid biebmokongreassa, muhto dan maid šluhttejedje koronavirusa dihtii. Dohko galge oassálastit lagabui 200 riikkaidgaskasaš oassálasti miehtá árktalaš guovllu ja máilmmi.

9.3. Mátta-Várjjagis logi olbmo karantenas

Davvi-Norggas Mátta-Várjjagis logi olbmo leat karantenas koronavirusa geažil. Sii leat mátkkoštan guovlluin gos virus lea njommon. Ovttasge ii leat vuos virus, čállet Sør-Varanger aviisa ja NRK Sápmi.

Vahkuloahpa áigge lea Kárášjogas maid okta Sámi joatkkaskuvlla oahpaheaddji biddjon karantenai, go leamaš dahkamušas olbmuin, geas lea koronavirusnjoammun.

8.3. Suopmelaččat eai oassálasttege soahtehárjehusaide Norggas

Suopmelaččaid oassálastin soahtehárjehusaide Norggas lea šluhttejuvvon koronavirusa dihte. Soahteveaga 400 olbmo eananfámut galge vuolgit Davvi-Norgii Romsii, muhto Norgga váldosoahtehárjehusaide oassálastán olbmos gávnnahedje koronavirusa. Dál hárjehusas leat sullii 850 olbmo karantenas vejolaš virusnjoammuma dihte.

Koronavirus lea leavvan Suomas Varsinais-Suomi sihke Savo eanangottiide. Suomas leat nannejuvvon oktiibuot 30 koronavirusnjoammuma. Mátta-Suomas leat giddejuvvon aŋkke guokte skuvlla koronavirusa dihte.

5.3. Bissovaš forum šluhttejuvvo

Eamiálbmogiid bissovaš foruma mearridit maŋidit koronavirusa leavvama dihtii. Ságadoalli Anne Nuorgam árvala, ahte čoahkkin sirdojuvvo čakčii. Čoahkkin galggai leat New Yorkas cuoŋománus.

3.3. Koronavirus njoammu maiddái davvin

Kiinnás vuolgán koronavirus njoammu maiddái Eurohpás ja davvin. Norggas Čáhcesullos gávcci olbmo leat šaddan karantenii. Maiddái Álaheajus leat golmmas, geain navdet njoammuma. Maiddái lágádusat ja fitnodagat smiehttagohte ráddjet bargiideaset mátkkiid Davvi- ja Mátta-Suoma gaskkas.

26.2. Nubbi koronanjoammun Suomas

Helsset ja Uusimaa buohccedikšunbires gávnnahuvvui ovtta olbmos koronavirus. Dávda lei njommon Itálias, Milano guovllus.

20.2. Koronavirus leavvagoahtá máilmmis

Koronavirus lea njoammugoahtán maiddái Eurohpái ja eará guovlluide máilmmis. Ovdamearkka dihte Itálias ja Iranas njoammumat lassánit jođánit.

29.1. Vuosttaš koronavirusnjoammun Suomas

32-jahkásaš kiinnálaš nissonolmmoš ohcalii Avvilis doaktárii influenssa lágan váttuid dihte. Su sirde dalán Lappi guovddášbuohccevissui Roavvenjárgii. Turista lei eret Gaska-Kiinnás Wuhan-gávpogis, gos koronavirusa jáhkket vuolgán johtui.

24.1. Avvilis navde guovtti kiinnálaš turisttas koronavirusa

Anára guovllus johttán kiinnálaččain váldojuvvojedje čájánasat ja daid sáddejedje dutkanláhkai Helssegii dearvvasvuođa- ja buresveadjinlágádus THL:ii. Turisttain ii goit lean koronavirus.

Juovlamánnu 2019: Koronavirus vulggii johtui Kiinnás Hubei eanangottis juovlamánus 2019. Ođđa koronavirus lea sirdásan olbmui jáhkkimis eallis.

Varrasamosat

Muualla Yle.fi:ssä