Sápmi |

Logahatođastusa mielde sámelogahaga oahppit sáhttet beassat stuđeret eanet vaikko boazodoalu dahje duoji – ođđa oahppoplánat bohtet atnui čakčat

Logahatođastusa ulbmilin lea nannet individuála oahpahusa ja joatkkaoahpuide ohcama.

Pasi Oikarinen
Ohcejoga sámelogahaga rektor Pasi Oikarinenis leat alla vuordámušat logahatođastussii ja ođđa oahppoplánaide. Govva: Kirsti Länsman / Yle

Boahtte čavčča ođđa logahatoahppit sáhttet beassat eanet studeret vaikko boazodoalu dahje báikkálaš dujiid, go logahatođastus ja ođđa oahppoplánat bohttet atnui.

Ohcejoga sámelogahagas ulbmilin lea nanusmahttit ja riggodahttit luonddu ja giela oktavuođa, daningo Ohcejohka lea áidna gielda, gos sápmelaččat leat eanetlohkun ja sámegiella lea lunddolaš oassi eallimis.

Dárbu logahatođastussii šattai, go boahtte jagi rájes oahppit leat geatnegahtton studeret gitta 18-jahkásažžan. Oahppit sáhttet válljet logahaga dahje muhtun eará nuppe dási skuvlejumi. Gielddaid geatnegasvuohta lea fállát ja fuolahit joatkkaoahpuin.

– Suomas fuomášedje ovddit logahatođastusa maŋŋá, ahte sisdoalut leat oalle hástaleaddjit ja logahaga oahppit váibet teorehtalaš stuđeremii, muitala Ohcejohnjálmmi skuvlla ja sámelogahaga rektor Pasi Oikarinen.

sámelogahat
Ođastusat ja oahppoplánat gusket daid ohppiid, geat álggahit logahaga 1.8.2021. Govva: Kirsti Länsman / Yle

Ođastus oidno logahaga ohppiid árggas iešguđegelágan plánaid plánemis, muitala Oikarinen.

– Leat njeallje plána: studerenplána, čállinplána, joatkkaoahppoplána ja karriearaplána. Dákkáriid dahket dasto oahpuid mielde.

Rektor muitala, ahte ođastusa vuolggasadjin lea individualisttalaš jurddašanvuohki, muhto Ohcejogas leat bastán juo dán rádjái oahpahit persovnnalaččat go leat nu unna oahpahusjoavkkut.

– Dihto láhkai oahppobálgás dahkat eanet individuála, ja ávnnasoahpaheddjiid ja maiddái spesiálaoahpaheddjiid doarjaga fállat viidásit dál maiddái logahagas.

Rektoris leat alla vuordámušat. Logahatođastusa guovddášnuppástus lea dat, ahte oahpahusas šaddá nuvttá. Ohcejogas oahpahus lea juo ovdal leamašan measta nuvttá.

Rievssatbivddus sáhtášii seammás vaikko dutkat rievssatnáli

Ulbmilin lea maiddái nannet logahatoahppiid ohcama joatkkaoahpuide, muitala sámelogahaga rektor Pasi Oikarinen. Okta vuohki dasa lea, ahte juo logahaga áigge šaddet oktavuođat allaskuvllaide, muhto maiddái báikkálaš birrasii ja ealáhusaide.

– Mis lea leamašan ovttasbargu Lappi universitehtain dáiddu- ja dáiddaávdnasiin goit logi jagi ja maiddái Kevo dutkanlágádusain, Turku universitehtain, ja dál leat plánen vel čiekŋudit dan.

Kevo dutkanlágádusa ja Turku universitehta ovttasbarggu bokte oahppit beasašedje oahpásmuvvat luonddudiehtagiidda. Rektor jáhkká dutkanlágádusas sáhtášedje atnit árvvus dan, ahte oahppit dovdet dan birrasa ja sáhtášedje vaikko rievssatbivddus seammás dutkat rievssatnáli.

Ođastusa mielde logahagaide šaddá seammalágan oahppočuokkesvuogádat go universitehtain lea. Ohcejoga logahaga ohppiin lea leamašan vejolašvuohta čađahit Giellagas-instituhta kurssaid, ja dán ođastusa mielde ovttaskas universitehta kurssaid čađaheapmi šaddá álkibun.

– Dan láhkai oažžut konkrehtalaš ovdamearkkaid das, maid dat allaskuvlastuderen lea ja beassá oahpásmuvvat dasa maid logahaga oahpuid áigge. Ođđa oahppoplána geatnegahttá allaskuvlaovttasbargui.

Pasi Oikarinen
Logahatdiploma plánemis váldit vuhtii báikkálašvuođa: Ohcejogas dat mearkkaša sámekultuvrra ja sámegiela. Govva: Kirsti Länsman / Yle

Logahatdiploma sáhtášii čađahit vaikko musihkas, duojis dahje boazodoalus

Ohcejoga sámelogahaga rektor Pasi Oikarinen muitala, ahte sii leat áiddo dál huksemen ođđa oahppoplánaid. Logahagas lea vejolaš čađahit maiddái logahatdiploma. Logahatdiploma fáddán leat leamašan musihkka, duodji ja boazodoallu.

Ohcejoga badjedásis leat badjelmearálaš bargui oahpásmuvvanvahkut ja oahppit besset ovdamearkka dihtii bargat bohccuiguin. Rektor jáhkká, ahte dat logahatdiploma livčče lunddolaš joatkka dasa. Son oaidná, ahte dákkár diploma sáhtášii leat maiddái giela dáfus buorre oahppanvuohki.

– Giela riggodahttin nu, ahte eat leat dáppe logahaga seinniid siste stuđeremin dábálaš logahaga teorehtalaš ávdnasiid, dieđusge in hálit fuonášit dan, muhto luonddus goittotge leat dat doahpagat ja terminologiija dáppe lea nu rikkis, ahte dákkár ovttasbarggu bokte dat seailu ja ealáska.

Rektor árvala logahatdiploma geasuhit maiddái gánddaid logahahkii

Rektora mielde okta plána lea leamašan dat, ahte logahatdiploma sáhtášii buhttet ovtta studeanttaiskkusávdnasa. Ja ovdamearkka dihtii ohcejohkalaš logahatoahppi sáhtášii čađahit diploma muhtun báikkálaš fáttás.

– Juos jurddaša dan, man olu logahatoahput geasuhit, de sáhttá leat, ahte dát sáhtášii geasuhit maid gánddaid logahahkii.

Sámelogahaga ulbmil lea oažžut oahppoplánaevttohusa válmmašin cuoŋománu loahpas.

– Dalle dat gearggašii vel gieldda mearrádusaiddahkamii nannejupmái, nu ahte mis livčče anus dasto ođđa oahppoplánat vuosttaš jagi logahatohppiide.

Logahatođastus guoská daid ohppiid, geat leat dál ovccát luohkás ja álggahit logahagas 1.8.2021.

Varrasamosat: Sápmi

Váldoođđasat

Varrasamosat

Muualla Yle.fi:ssä