Sápmi |

Logenár olbmo váldon gitta Dakota Access Pipeline proteastaguovllus

Miellačájeheaddjit ožžo mearrádusa vuolgit USA:s Davvi-Dakotas, Standing Rockas gaskavahkku. Bolesat válde gitta 10 olbmo, geat ledje báhcán leirii.

Yli 700 ihmistä kokoontui 7. joulukuuta 2016 vastustamaan öljy-putken rakentamista intiaanireservaatin vesilähteen alapuolelle Pohjois-Dakotassa.
Badjel 700 olbmo čoahkkanii 7.12.2016 vuostálastit oljobohcci huksema indiánareserváhta lahkosii Davvi-Dakotas. Govva: Michael Nigro / AOP

Miellačájeheaddjit leat gártan eret USA:s Davvi-Dakotas, Standing Rockas, gos sii leat dáistalan Dakota Access Pipeline vuostá.  Guovvamánu beallemuttus proteastaguovllus ledje šat dušše moadde čuođi miellačájeheaddji. Gaskavahku eahkeda 22.2. loahpatge galge vuolgit jogo eaktodáhtolaččat dahje bággemiin.

Davvi-Dakota guvernovrras ja USA militearafámuin bođii bákkolaš evakuerenmearrádus, ahte gaskavahku 22.2. diibmu 14.00 rádjái galget buohkat vuolgit proteastaguovllus.

Eiseválddit dadje, ahte gaskavahku evakueren lea dárbbašlaš dorvvolašvuođasivaid dihte. Oassi leairras lea dulveguovllus, ja dat sáhtášii dagahit várálaš dili, go dálki lieggana ja muohta suddá.

– Dulvečázit sáhtášedje jođihit ribaid ja bázahusaid lagaš johkii, dadjá Davvi-Dakota riekteministtar Wayne Stenehjem.

Eiseválddit muitalit, ahte sii leat vuođđudan Bismarckii sirdásanguovddáža, man dárkkuhussan lea veahkehit aktivisttaid guođđit leairra. Guovddážis miellačájeheddjiide fállet čázi, biepmu ja kuponga, mainna oažžu ovtta ija hoteallas ja bussemátkki ruoktot.

10 arresterejuvvon, 2 buohccevissui

Sullii 100 miellačájeheaddji vulge eaktodáhtolaččat ovdal diibmu 14. Muhtin miellačájeheaddjit bolde seremoniijalaččat iežaset tealttáid ja leairra eará ráhkadusaid ovdalgo vulge leairras.

Davvi-Dakota guvernovra Doug Burgum oaivvilda, ahte gaskavahku mearreáiggi maŋŋá báikki alde ledje sullii 25-50 miellačájeheaddji.

Sullii golbmalogi miellačájeheaddji čoahkkanedje lahka leairra sisabeassama dan maŋŋá, go livččii jo galgan guođđit leairra. Moaddelogi eará miellačájeheaddji bisso leairra eará guovlluin.

Bolesat arresterejedje 10 olbmo, geat ledje báhcán guvlui dan maŋŋá go áigemearri lei dievvan.

Stáhta eiseválddiid mielde miellačájeheaddjit ledje cahkkehan sullii 20 dollabuollima. Guokte nuora, 7-jahkásaš gánda ja 17-jahkásaš nieida, gárte Bismarck buohccevissui dáhpáhusaid olis.

Varrasamosat: Sápmi

Váldoođđasat

Varrasamosat

Muualla Yle.fi:ssä