Sápmi

Lohkanluomus ráhkkanit studeantačállosiidda – Buorit árvosánit eai boađe barggu haga

abiturientteja kuorma-auton lavalla
Avvila logahaga abiturienttat dahke dearvvuođaid iežaset skuvlii duorastaga 13.2. Dalle álggii sis lohkanluopmu. Govva: Marko Uskelin / Yle

Dán giđa studeantačállimat álget njukčamánu 10. beaivve. Buorit árvosánit gáibidit dárkilis lohkanplána, oaivvildit logahaga oahppit.

Dán jagi abiturienttat nappo goalmmát jagi oahppit guđđe logahaga ja jagi nuorat buolva válddii skuvlla háldui. Avvil logahagasge dát árbevierru joatkašuvai duorastaga guovvamánu 13. beaivve. Studeanttat válde dan maŋŋil moadde beaivvi bosihanbottu ja de álgáge duođalaš lohkan giđa studeantaiskosiidda.

– Geahččalan buriid árvosániid oažžut duođaštussii, jus mde beasašin juosat universitehttii njuolga duođaštusain, de dat livččii buorre, dadjá Lassi-Olavi Mäkinen.

abiturientti naamiaisasussa
Lassi-Olavi Mäkinen lei abi-riemuide gárvodan Dragon Ball -ráiddu Vegeta-hápmái. Govva: Marko Uskelin / Yle

– Logan filosofiija ja eaŋgalsgiela, dain goit geahččalan oažžut buriid árvosániid. Loahppa manná mo manná, muitala Mäkinen mihttomeriinis.

Son čálii čakčat ruoŧagiela ja dál giđđat čállá vihtta ávdnasa: filosofiija, eaŋgalsgiela, suomagiela, sámegiela ja servodatdieđu.

Lassi-Olavi Mäkinen čuovvu dárkilis lohkanáigedávvala, man lea ieš plánen, muhto áigu liikká muitit vuoiŋŋastitge.

– Mus lea čielga plána maid mun barggan ja man olu. Dáinna plánain lea dárkkuhus beassat daidda árvosániide, maid lean geahččaleamen oažžut, čilge Lassi-Olavi Mäkinen ja lasiha ahte lea son juo álggahan lohkama.

Studeantadutkkus lea geaidnu alit dási oahpuide

Emmi Leivo háliida joatkit logahagas universitehttii, danin son geahččala fidnet nu buriid báhpáriid go vejolaš logahagas.

Universitehtaid sisabeassanođastusa geažil buorre árvosániin lea álkit beassat universitehttii, iige vealttekeahttá dárbbaš fitnat oba sisabeassaniskosiin, muittuha Leivo.


tyttö naamiaisasussa
Emmi Leivo návddašii penkkari-beaivve, vaikko su gárvvuin bođiige báhkka. Govva: Marko Uskelin / Yle

– Dehálaš lea ahte muitá duođai lohkat, ii geavat lohkanluomu joavdelastimii ruovttus dahje skihpáriiguin, ná jáhkká Emmi Leivo beassat iežas mihttomearrái.

Sus lea maiddái lohkanortnet dán giđđii nu mo oahpaheaddjit ja rektor leat rávven.

– Eai mus datte nu alla mihttomearit leat, gaskaveardásaš duođaštusain lean duđavaš, árvosániin okta E ja moadde M, láhttesta Emmi Leivo.

Duppaldutkkus buktá dorvvu: "Gohan beasašin čađa"

Jenna Muotkajärvi lea čađahan mannan giđa lagašdivššára dutkosa ja sávvá iežas fidnet dán giđa vel logahatduođaštusa ja studeantagahpira. Duppaldutkosa čađaheapmái manná njeallje jagi.

abiturientti naamiaisaussa haastateltavana
Jenna Muotkajärvi asttai maiddái Yle Sámi jearahallamii. Govva: Marko Uskelin / Yle

– Ollu lea vel lohkamuš, muhto mus lea lohkanáigedávval. Njeallje ávdnasa go čálán, de lean jurddašan lohkat moadde diimmu ain beaivvis guđege oahppaávdnaasa. Ovdamearkan eaŋgalasgielas ferten lohkat girjji vahkus go mus leat gávcci girjji lohkanláhkái, čilge Jenna Muotkajärvi.

Son čállá eaŋgalsgiela, dearvvasvuođadieđu, eatnigiela ja oanehis matematihka.

– Áigedávvalis ferte gal doallat gitta, árvala Muotkajärvi.

– Gohan beasan čađa, dieđus dearvvasvuođadieđus galggašii fidnet buori árvosáni go lea juo lagašdivššára dutkkus, dadjá Jenna Muotkajärvi mihttomeriinis.

Lohkamiid gaskkas geargá leat maiddái dienasbargguin ja suohtastallat

Boahtte áiggi plánain Jenna Muotkajärvi muitala, ahte jagi son áigu leat divššárbargguin ja lagašdivššáriidda lea duođaid bargu fállun. Son leamaš juo barggus dearvvasvuođaguovddáža seaŋgaossodagas Avvilis. Maŋit jahkái son áigu ohcat luohkáoahpaheaddji oahpuide universitehttii.

sekasotku lukion aulassa
Logahaga studeanttat ledje veháš moiven skuvllas, muhto dat gullá gul áššái. Govva: Marko Uskelin / Yle

Lassi-Olavi Mäkinen muitala iežas fitnat gaskkohagaid ain dienasbargguin biillaláigohagas. Sihke Emmi, Jenna ja Lassi-Olavi muitet maiddái bottuid doallat ja fuolahit iežaset veadjimis. Okta doallá riegádanbeivviid, nubbi vuolgá abi-dámpatuvrii ja goalmmát muittuha ahte galgá muitit bottuidge doallat, ii dat datte nu duođalaš hommá leat.

Logahatođastus váikkuha maiddái studeantariemuide

Logahatoahpahusa ođastusain dán jahkái muitala Avvila logahaga rektor Ulla Hynönen, ahte ovdal lávejedje penkkari-vahkus leat golbma gullaniskosa.

rehtori penkkarihumun keskellä
Rektor Ulla Hynönen ii lohkan dán penkkari-beaivvi dađi váralut alcces go earáge beaivvit logahagas. Sus leat čiega oahppit. Govva: Marko Uskelin / Yle

– Dálhan iskosat gullama áddemis čađahuvvojit seammás go čálliniskkusge. Oassi Suoma logahagain dolle dáid suohtastallamiid juo vahku ovdalis, muhto Lappi guovllu logahagat leat mearridan ahte dán jagi doalahat dáid skuvlariemuid oahpes áiggis, oktanaga buohkat.

– Ii leat vuos dieđus mo mii dahkat boahtte áiggis, Avvil logahagasge leamaš sáhka ahte dan penkkari-feastta sáhtašii áradit, dadjá rektor Ulla Hynönen.

Suoma golmma davimuš logahagas čállet dán giđa sullii 30 studeantta. Sis viđas dahje guđas Eanodagas ja Ohcejogas, loahpat Avvilis.

Guldal Lassi-Olavi Mäkinen, Emmi Leivo, Jenna Muotkajärvi ja Ulla Hynönen jearahallama Yle Areenas.

Varrasamosat

Muualla Yle.fi:ssä