Sápmi |

Losses áigodagas badjánii mokta molsut eallinvuogi alfárot – Dál Maarit Kiprianoff figgá veahkehit daid, geat láhppet iežaset mánástallamii

Mánástallama ruossalasvuođain badjánii Kiprianoffas hállu rievdadit iežas eallima dili. Dál su bargun lea figgat veahkehit daid, geain lea sullasaš váttes dilli, go sus lei.

Kiprianoff loaktá bures dálá barggus, mas oažžu veahkehit olbmuid.
Kiprianoff loaktá bures dálá barggus, mas oažžu veahkehit olbmuid. Govva: Helga West / Yle

Ivnnehis, moddjáhis ja váiban eadni guovlá speadjalis. Maarit Kiprianoff ii leat dovdat šat iežas das, maid oaidná. Son lei hárjánan dasa, ahte lei álo dat, gii movttáskii álket ja lei álo jođus. Guovtte jagi máná riegádeame maŋŋá son hirmahuvai, makkár sus lei šaddan.

– Mus lea álo leamašan ollu návccat buotlágan vásáhusaide, ja go šadden áhpeheapmin, smihtten, ahte mánná ii rievdda mu eallima, ahte sáhtán joatkit dakkár aktiivvalaš eallima ja mánná boahtá fárus. Smihtten, ahte dieđusge eallin joatkašuvvá dego dánge rádjai. Muhto dathan manaige áivve earáláhkai.

– Mánná riegádii ja mun láhppen iežan mánástallamii. Guovtte jagi geahčen in dovdán šat iežan speadjalis. Mun in lean šat ilolaš, muitaša Kiprianoff.

Guorahalai vuđolaččat dan, makkár olmmoš son ieš háliida leat

Duhtameahttunvuohta bohciidahtii sus movtta ohcat molssaeavttuid vuohkkásot eallinvuohkái. Son ozai dieđu neahtas ja dádjadii Valmentamo-siidduide. Doppe son gávnnai veahkkeneavvuid, maid lei ohcalan.

– Áddejin, ahte dain seamma rávvagiiguin, main mun ožžon ieš veahki, sáhtán veahkehit earáid, geat vedjet funet sullasaš dilis, čilge Kiprianoff.

Dáinna jurdagiin son guorahallagođii vuđolaččat gažaldagaid dego: Makkár nissonolmmoš mun ieš háliidan leat? Makkár bargu movttiidahttá mu? Makkár lea mu buorre eallima sisdoallu? Mánástallama oktavuođas son lei alfárot vajálduhttán dan, gii son ieš lea olmmožin ja eandalii nissonolmmožin.

Maarit Kiprianoff
Maarit Kiprianoff ođđa bargui gullet earet eará ságastallamat, bargobájit ja logaldallamat. Govva: Helga West / Yle

Restauraŋŋasuorggis life coachin

Maarit lei 18-jahkásačča rájes bargan restauraŋŋain ja bargan dan suorggis “buot vejolačča”. Measta guovttelogi bargojagi áiggis son gearggai bargat nightklubbain, támppain ja čierastallanbáikkiin.

Roavenjárggas eret leahkki Maarit lea maid bargan restauraŋŋahoavdan. Dát bargoduogáš oahpahii sutnje dan, ahte ii gávdno dakkár váivves dilli, mas ságastallan ii veahkehivčče. Son goit lei álo niegadan das, ahte beasašii vel albmaláhkai veahkehit ja duvdit olbmuid ovddosguvlui.

Su niehku ollašuvai, go son Valmentamo bokte skuvlii iežas hárjeheaddjin, gii nanne olbmo siskkáldas návccaid. Su virggálaš ámmátnamahus lea dál LCF Life Coach(r).

Restauraŋŋasuorgi bázii vássán áigái.

Jáhkká ámmát šadda eanet dábálažžan áiggi mielde

Life coachan dahje návccaid hárjeheaddjin Kiprianoffa bargun ii leat rávvestit, maid su kunddar galggašii bargat.

– Ulbmilin lea ohcat ovttas daid čovdosiid. Olbmos alddis leat dat vástádusat, mus fas leat dat bargoneavvut, muitala son.

Su dábáleamos kunddar lea eadneolmmoš, geas leat hástálusat heivehit oktii árvvuid, maid vánhenvuohta, guoibmevuohta ja bargoeallin bohciidahttet. Barggu váimmus leat ságastallamat juogo telefuvnna bokte dahje báikki alde. Dain lassin sus leat anus neahttagurssat, logaldallamat, bargobájit sihke hárjeheapmeprográmmat.

Kiprianoff oaivvilda, ahte návccaid diđolaš hárjeheapmái olmmoš dárbbaša olggobeal veahki, gii duvde su ovddosguvlui konkrehta láhkai. Son maid jáhkká life coachat šaddet eanet ja eanet bivnnuhabbon seammaláhkai, mo urbána birrasis lea geavvan personal trenejeddjiide sihke terapeuhttiide, main birra hárve šat jurddašuvvo, ahte dat leat dušše rikkes olbmuid várás.

– Galhan dákkár bálvalus, mii lea heivehuvvon iešguđet olbmui, máksá ruđa. Muhto sáhttá dan maid nie smiehttat, ahte dat lea investeren iežas buresveadjimii, ja dashan lea stuorra váikkuhus olbmui alccis sihke su bearrašii. Gažaldat lea dat, mo dahkat dan iežas eallimis dakkár niehkoeallima, mas olmmoš sáhttá návddašit. Juohke olbmo niehkoeallin lea goit earálágan, suokkardallá Kiprianoff.

Persovnnalaš buresveadjin lasiha oktavuođadovddu

Kiprianoff orru diehtimin juoidá persovnnalaččat das, maid stuorra eallinvuogi rievdádus gáibida. Su nieida lea dál 6-jahkásaš, ja su eadni lea gávdnan ilu ja oktavuođadovddu iežas eallimis.

Ođđa barggus son lohká lihkostuvvan dalle, go lea sáhttán iežas ámmátdáidduin veahkehit geannu ođđa bálgá ala. Persovnnalaš buresveadjin vuhtto maid buoret gaskavuođain bearaslahtuid gaskkas.

– Okta mu kunddar lea eadni, gii barggai nu guhkes bargobeivviid, ahte illá oinnii iežas mánáid. Son lei maid suoli niegadan, ahte heaitášii dalá barggus ja skuvlešii iežas vuoktačuohppin. Son ii goit duostan guođđit barggus ja lei láhppon. Hárjeheame bokte sutnje gulul čielggai, maid ja mo son galgá ovdánit, vai áššit šattašedje buoret dillái. Dál son fargga gárvásmuvvá vuoktačuohppin, mojohallá Kiprianoff.

Varrasamosat: Sápmi

Váldoođđasat

Varrasamosat

Muualla Yle.fi:ssä