Säämi |

Lovmat uđđâ uáppee loheh anarâškielâ Aanarist – halijdeh oppâđ kielâ, et peesih tain porgâđ

Taan täälvi anarâškielâ lohhein lii táválii luuhâmive iähtun jotelub liähtu.

oppilaat
SMK anarâškielâ uáppeeh já máttáátteijeeh Aanaarjäävri riddoost Kuáskimnjaargâs čohčuv 2019. Máttáátteijee Veikko Aikio, Jonna Kesti, máttáátteijee Miina Seurujärvi, Laura Ylinampa, Anne Seipiharju, Iida Virtanen, Marke Laaksonen, Nora Nevia já Tomi Koivunen. Govva: Anja Kaarret / Yle

Taan-uv täälvi Säämi máttááttâskuávdáást Aanarist loheh lovmat uđđâ uáppee anarâškielâ.

Taan täälvi anarâškielâ lohhein lii táválii luuhâmive iähtun jotelub liähtu, go tääl mieldi láá meid häppilis ollâopâttuv uáppeeh. Taat meerhâš tom, et luokkaast opâttem, kielâ luuhâm, lii eenâb.

Motomeh keevâtliih kuursah kal láá taan-uv ive, tego taan čoovčâ lii jo lâm kuálástemkurssâ. Tain kuursâin lii juurdâ sárnuđ eenâb.

Uáppeeh halijdeh porgâđ kieláin

Taan ive SMK kielâ lohhein maaŋgâs haalijd porgâđ mahtnii kieláin, talle ko uáppá taan.

Iida Virtanen já Tomi Koivunen
Iida Virtanen já Tomi Koivunen lává puáttám Porist Anarân luuhâi anarâškielâ. Govva: Anja Kaarret / Yle

Iida Virtanen Tomi Koivunen lává puáttám Porist luuhâđ anarâškielâ Anarân. Suái lává kielâtotkeeh ja máhulávt älgiv tutkâđ meid anarâškielâ.

Sunnui Anarist láá ennuv uđđâ ääših. Virtanenan taat lii vuosmuš kerdi, ko lii nävt tavveen. Iäge suái toolâ tomkin máhđuttemin, ko oppâv kielâ, et pásáččáin tavas. Kuohtuin soojijn láá šiev já hyenes ääših.

– Porist ij pyevti sárnuđ anarâškielâ já Anarist ij pyevti sárnuđ porimurre, iätá Virtanen.

Laura Ylinampa
Laura Ylinampa Ruávinjaargâst haalijd puáttiđ Anarân máttáátteijen. Govva: Anja Kaarret / Yle

Laura Ylinampa lii puáttám Ruávinjaargâst Anarân. Sunjin tavveen eellim lii uápis já ličij vaalmâš varriđ tavas.

– Mun halidâm aassâđ Anarist já halidâm máttáátteijen, muštâl Ylinampa.

Porgâdijn älkkeht uáppá kielâ

Anarâškielâ oppâmân Säämi máttááttâskuávdáást lii ain kullum pargokuursah.

Kuálástemkuursah láá enâmus. Vuosmuš kurssâ lii ain roovvâdmáánust. Talle uáppeeh láá ovdánâm jo tommit, et opâttâs tábáhtuvá tuše anarâškielân.

Veikko Aikio
Veikko Aikio máttát viermikuálástus SMK uáppeid Kuáskimnjaargâs. Govva: Anja Kaarret / Yle

Kuálástemkurssâ máttááttijjee, kuálástusmiäštár Veikko Aikio ii opâttâm jo iivijd viermikuálástem já juoŋâstem anarâškielân.

Aikio tuálá tergâdin, et uáppeeh peessih jieijah porgâđ. Sun tuše čáittá, maht kalga porgâđ já juáhás kárttá jieš talle iskâđ. Puohah peesih puoh hommáid.

– Uáppeid lii tehálâš, et kuálástemsäänih puátih uápisin, ko mii sárnup tääbbin tuše anarâškielâ. Amahân kuittâg motomeh säänih pääcih mielân, muštâl Aikio.

Pargokuursâi lasseen ooppâtmist kevttih meid kielâmiäštárijd.

Kuldâl SMK taan täälvi uáppeid, ko sii lijjii Kuáskimnjaargâst kuálástemkuursâst.

Varrasamosat: Säämi

Váldoođđasat

Varrasamosat

Muualla Yle.fi:ssä