Sápmi |

Luke čielggadeapmi: Deanu guolástanturisma buktá olu dietnasa Ohcejoga gildii

Čielggadeami mielde Deanu guolástanturismmas dehálamos lei luosa guolásteapmi ja luonddu ráfis návddašeapmi.

luossariemu 2019.
Luondduriggodatguovddáš Luke dutkamuša mielde Ohcejoga gieldda dienasgoluin stuorámus oassi bođii guolástanturismmas jagis 2018. Govva: Kaija Länsman / Yle

Luondduriggodatguovddáš Luke dutkamuša mielde Deanu guolleturisttat geavahedje gávpegálvo- ja bálvalusskáhppomiidda Ohcejogas sullii 2,6 miljon euro ovddas jagis 2018.

Luondduriggodatguovddáža spesiáladutki Marja Knuuttila mielde turisttaid ruđa geavaheamis Ohcejogas bealli juohkásii gávpegálvvuide ja bealli báikkálaš bálvalusaide. Stuorra geardduhanváikkuhusat čuvvot das, ahte guolástanturisttat geavahedje olu báikkálaš bálvalusaid.

Guolástanlobiide geavahedje measta 0,6 miljon euro ja stággolobiin printenbálvalusaide vuollelaš 30 000 euro.

Jagis 2017 fápmui boahtán Deanu guolástansoahpamuša ulbmil lei geahpedit deattu guolástanturismmas Deanus goalmmádasain, muhto dat geahppánii sullii beliin. Suoma bealde guolástanturisttaid mearri geahppánii sullii 65 proseantta dan maŋŋá, go ođđa guolástansoahpamuš bođii fápmui.

Luossa lei dehálamos sivva boahtit Ohcejohkii

Čielggadeami mielde Deanu guolástanturismmas dehálamos lei luosa guolásteapmi ja luonddu ráfis návddašeapmi.

Guolástanturisttat ledje duđavaččat maid idjadanbálvalusaide. Dehálamos ovddiduvvon čuozáhat lei guolástanjándoriid oažžun ja lohpevuogádaga njuovžilut doaibman. Knuuttila mielde lohpegávpi lea ovddiduvvon, muhto lohpejándormearit leat ain seammát go jagiin 2017-2020. Dan geažil Suoma beale guolástanturisttat oste jo jagis 2018 ollu guolástanjándoriid Norgga bealde.

Dutkamuša vuođđun lei Suoma lohpegávppis jagis 2018 Deanu guolástanlobiid skáhppon 2 594 guolástanturistii sáddejuvvon gažadeapmi, mas vástádusproseanta lei 71. Dutkanmateriálan geavahedje maiddái Luke ja Lappi EBI-guovddáža statistihkaid. Seammás čogge dieđu báikkálaččain ja guovllu fitnodatdoalliin.

Dutkamuša lea ruhtadan Suvdilis šaddan ja bargu 2014–2020 – Suoma ráhkadusruhtarádju -prográmma.

Varrasamosat: Sápmi

Váldoođđasat

Varrasamosat

Muualla Yle.fi:ssä