Sápmi |

Luohti eallá gal lávddiid aldi, muhto gullogo dat árgabeaivvis?

Luohti lea Suomas buoremusat seilon fiesttara bealde, Eanodaga guovllus boazodoalliid gaskas. Otná beaivvis luohti eallá gal lávddiid aldi, muhto gullogo dat muđui árgaeallimis? Ingá-Máret Gaup-Juuso ja Wimme muitaleaba sudno oainnuid luođis.

Ingá-Máret Gaup-Juuso Ijahis ijas 2015
Govva: Yle Sápmi

Dál don gulat luođi beare lávddiid aldi sierralágan dáhpáhusaid oktavuođas. Dat ii leat šat nu lunddolaš oassi eallimis go dolin.

Dán áigge luođi figget rádjet dihto hiŋgalii, oaivvilda dovddus Sámi artista.

– Mun láven gohččodit sin luohtebolesin, mat dasto gáržžidit dán luođi. Bidjet hui baskkit, ahte dat lea áidna vuohki juoigat ja veháge das spiehkkasa nu de dál dat  gal ii oaččo dienna lágiin juoigat, doala njálmmi gitta, dadjá Wimme Saari.

"Dáluinhan eai juoigan, viesuin"

Eanodaga duoddariin, vuvddiin ja jávregáttiin luohti lea skádjan ráfis.

Bádjeolbmuid eai leat bastán njoarostit ja nuba sin gaskas luohti lea seilon ja vel nanosmuvvange. Ii oba oskuge leat sáhttán dan jaskkodahttit, árvala Wimme.

– Leago dat dakkár nággáris olbmot leamaš ja vel nai. Dat eai leat nu vuollánan dasa go lea dubmejuvvon  suddun. Dego mun lean muitán, ahte dáluinhan eai juoigan, viesuin. Muhto dastogo beasai gárdde lusa ja duoddariid, meahccái gárddástallat, lávostallat, doppehan gal. Dat orui nu, ahte duopmuhan ii ole dohko, dadjá Wimme.

"Juoigit čájehit Sámi vuoiŋŋa"

Ingá-Máret Gaup-Juuso beaggá čeahpes juoigin Sámis. Su mielas lea buorre, ahte luohti lea fámolaš juoba lávddi áldi.

– Mungo dál lean oaidnán daid juigiid, geat roahkasmuvvet  mannat lávddi ala juoigat. Mu anán daid árvvus. Ja lea maiddái dat, ahte dat dustet čájehit dán Sámi vuoiŋŋa. Dat lea hui dehálaš ja mávssolaš midjiide sápmelaččaide, Gaup-Juuso dadjá.

"Juoigat oažžu dat gii hálida"

Wimme jáhkká luođi boahtteáigái. Son roahkasmahttá ođđa juoigiid rohttet luođi dalle go lea miella.

– Dat gii hálida ja dovdá, ahte luohti riegáda. Ožžot fal juoigat iige dárbbaš beroštit das maid earát dadjet, Wimme ávžžuha.

Geahča eanet dán áššs duorastaga tv-ođđasiin!

Varrasamosat: Sápmi

Váldoođđasat

Varrasamosat

Muualla Yle.fi:ssä