Sápmi |

Luođit eai sirdás šat seamma beaktilit buolvvas bulvii – Jávrrešduoddara luođit geasuhedje sále dievva olbmuid Heahtá Márjjabeivviin

Heahtá Márjjabeivviin háliidedje buktit lávddi ala Jávrrešduoddara luđiid ja seammás ealáskahttit árbevieru.

Anna Näkkäläjärvi-Länsman, Ole Henrik Magga ja Petra Magga-Vars
Earret eará Anna Näkkäläjärvi-Länsman, Ole Henrik Magga ja Petra Magga-Vars ovdanbukte máttuideaset luđiid Heahtá Márjjabeivviid konsearttas. Govva: Linnea Rasmus / Yle
Heahttá

Luohtečeahpit, geat hálddašit Jávrrešduoddara dološ luđiid, čoahkkanedje Márjjabeivviid lávvardaga Heahttái juoigat máttuideaset luđiid.

Dán áigge luođit eai šat sirdás buolvvas bulvii seamma láhkai, go ovdal. Danne Heahtá Márjjabeivviin háliidedje buktit masá jo jávkan luđiid lávddi ala.

– Háliidin vehá maiddái dutkat dán luohteárbevieru dili dáinna konsearttain, ahte man olu olbmot máhttet daid, ja maiddái vehá ealáskahttit daid áibbas dološ luđiid ja buktit daid olbmuid gullosii, muitala musihkkár Anna Näkkäläjärvi-Länsman, guhte lei plánemin konseartta ja čohkkemin juoigiid dasa mielde.

Anne Näkkäläjärvi-Länsman ja Janne Lappalainen Hetan marianpäivien konsertissa 2019
Anna Näkkäläjärvi-Länsman ja Janne Lappalainen Heahtá Márjjabeivviid Jávrrešduoddara luođit -konsearttas. Govva: Linnea Rasmus / Yle

Konsearttas ledje mielde logemat juoigi. Okta sis lei guovdageaidnulaš Ole Henrik Magga, gean máŋgasat dovdet gielladutkin ja politihkkárin. Son rohttestii máŋga olbmo luođi, dego iežas áhči, áhku ja máttarádjá luđiid. Daid son lea oahppan juo áibbas mánnán.

– Dan áigge olbmot ovttastalle ja juige nuppiideaset, go ledje leamaš meassuin ja oahppan ođđa luđiid. Olu diein luđiin mun lean hui mánnán oahppan ja muhtumiid gal lean maŋŋit maid oahppan, muitala Magga.

Ole Henrik Magga Hetan Vuollikassa
Ole Henrik Magga muitá máŋga olbmo luođi Jávrrešduoddara guovllus. Govva: Linnea Rasmus / Yle

Olbmuid luođit leamašan álo dehálaš oassi sápmelaččaid luohteárbevierus. Olbmo luohti muitala, makkár gii nu lea, ja luđiin olbmot muitet su vel guhká eallima maŋŋá. Máŋggat juoigit lávejitge muitalit, mo sii vásihit, dego dovddašedje máttuideaset sin luđiid bokte, vaikko eai livččege sin goassige deaivvadan.

– Mun muittán hui bures daid olbmuid luđiid, geaid mun dovddan, muhto velá daidge olbmuid, maid birra lean dušše gullan, dat orrot ovtta ládje lahka go olmmoš juoigá daid, čilge Ole Henrik Magga ja joatká.

– Luohti lea dakkár gulahallan hui máŋgga dásis, ii dušše jietnadásis, muhto dovdodásis, oaidnindásis ja muitodásis. Dat lea dakkár, mat čatnasit muittuid ja olbmot čatnasit luođi bokte.

Ole Henrik Magga Hetan Vuollikassa
Heahtá Vuollikka lei áibbas dievva Márjjabeivviid juoigankonseartta áigge. Govva: Linnea Rasmus / Yle

Ole Henrik Magga lea fuolas luohteárbevieru boahtteáiggis. Nuorat ja mánát eai oahpa šat luđiid seamma láhkai go ovdal ja sii geavahit áiggi eará áššiide.

– Mánát ja rávesolbmot eai astta šat nu olu bidjat áiggi dasa, ahte gulahallat ja oahpahit luđiid. Ja dieđusge boares luđiiguin ii leat nu álki gilvalitge iPad-filmmaiguin ja suohttasiiguin. Goittotge mun illudan, go nu olu nuorat leat beroštišgoahtán oahpahallat ja čoaggit maid luđiid, ahte ii lahppoše dát čáppa árbevierru.

Anna Näkkäläjärvi-Länsman árvala, ahte servodaga nuppástus lea váikkuhan luohteárbevieru dálá dillái.

– Servodat rievdá ja máilbmi rievdá. Luohti gáibida dakkár oktavuođa ealáhusaide ja gáibida maiddái dan servodaga, mainna don juogat dan árbevieru ja luđiid. Jos dat jávká, de dalle maiddái luohti jávká.

Máttut - Jávrrešduoddara luođit -konsertti Hetassa
Máttut - Jávrrešduoddara luođit -konseartta juoigit Anna Näkkäläjärvi-Länsman, Oarjánnieiddat nappo Máret-Elle Valkeapää, Maren-Elle Mäkitalo ja Inger-Anni Valkeapää, Petra Magga-Vars, Ole Henrik Magga, Anna-Reetta Niemelä, Matias Niemelä ja Nils Pedar Gaup. Gitára čuojaha Janne Lappalainen. Govva: Linnea Rasmus / Yle

Lávvardaga Heahtás luohti goit elii ja Vuollikka sále lei spagga dievva.

– Nu dievva olbmot dán viesus, ahte ii livčče čáhkan šat baljo oktage lassin. Dat gal lei erenoamáš somá. Hávski oaidnit, ahte olbmot duođai orrot berošteamen ja atnet dan vearan ja háliidit gullat luđiid. Dat mu váibmui duddjo hui buori, dadjá Ole Henrik Magga.

Maiddái Anna Näkkäläjärvi-Länsman lei konseartta maŋŋá ilus, go nu olu ledje olbmot boahtán sin konseartta guldalit.

– In gal máhttán vuordit, ahte ná olu bohtet olbmot, illuda Näkkäläjärvi-Länsman.

Iige guldaleaddjige gal behtton.

– Gal dat lei oppa fiinnis gullat dakkár albma luđiid. Dat eai leat matge lávlagat, go albma luođit, rábmo Eila-Marja Labba.

Geahča lasi dán áššis vuossárgga Yle Ođđasiin diibmu 16.45 ja maŋŋelabbos Yle Areenas.

Varrasamosat: Sápmi

Váldoođđasat

Varrasamosat

Muualla Yle.fi:ssä