Sápmi |

Luonddu- ja kulturguovddáš Skierri ja Kino Hetta giddejit uvssaideaset skábmamánnui – jagis 1994 huksejuvvon vistti divodit

Masá 30-jahkásaš vistti láhttiid ja dásiid molsot skábmamánu áigge ja dan botta guovddáš ii leat rabas gussiide. Guovddáš rahpasa fas juovlamánus, maŋimustá Suoma iehčanasvuođabeaivve maŋŋá.

Skierri luontokeskus
Duottar-Sámi luonddu- ja kulturguovddáš Skierri lea rabas golggotmánu lohppii. Dan maŋŋá čuovvovaš háve guovddážis sáhttá galledit juovlamánu álggus. Govva: Vesa Toppari / Yle

Duottar-Sámi luonddu- ja kulturguovddáš Skierri Eanodagas ođaduvvo dán jagi máŋgga láhkai. Geassit Meahciráđđehus válddii oljoliggema sadjái eanaliggema ja beaivvášpanelaid ekologalašvuođa namas.

Luonddu- ja kulturguovddáš lea gitta olles skábmamánu divodeami geažil. Skábmamánu áigge čájáhusat eai leat rabas ja maid Kino Heatta -ealligovvateáhter giddejuvvo.

– Juovlamánu álggus lea ulbmilin váldit áššehasaid fas vuostá ođasmuvvan Skierrái, muitala Meahciráđđehusa plánejeaddji Marko Huusko.

Marko Huusko
Meahciráđđehusa plánejeaddji Marko Huusko mielas lea jo áigige molsut guovddáža láhttiid ja dásiid. Govva: Vesa Toppari / Yle

Divodeami oktavuođas molsot guovddáža siste láhttiid ja dásiid. Huusko mielas lei jo áigige divodit vistti. Luondduguovddáš lea huksejuvvon jagis 1994 ja das leamašan seamma láhttit álggu rájis.

Luondduguovddáža áššehasbálvalusas leat ráhkkanan, ahte luondduguovddáš lea unnimusat njeallje, eanemusat vihtta vahku gitta, muitala áššehasráđđeaddi Satu Kotavuopio Duottar-Sámi luonddu- ja kulturguovddáš Skierris.

– Galggašii goittotge leat nu, ahte Suoma iehčanasvuođabeaivve maŋŋá fas beassá galledit, dadjá Kotavuopio.

Luondduguovddáža kafea giddii uvssaidis juo golggotmánu álggus. Vuos molsot kafea láhttiid, de feaskára ja áššehashivssegiid láhttiid.

Kino Hetta -ealligovvateáhteris lea maŋimus čájehus golggotmánu 27. beaivve ja Kotavuopio mielde dat lea olles čakčabaji maŋimus čájehus.

Kotavuopio muittuha, ahte vaikko guovddáš lea gitta, de áššehasbálvaleaddjit leat áibba dábálaččat barggus vástideamen telefovdnii ja e-poasttaide. Golggotmánu áigge lea vel vejolaš finastit geahččamen čájáhusaid.

Beaivvi ságaid ja Yle Ođđasiid Sámis sáhtát maid guldalit Yle Areenas.

Varrasamosat: Sápmi

Váldoođđasat

Varrasamosat

Muualla Yle.fi:ssä