Sápmi |

Luossariemuin birgejedje olgobáikegottálaččat – “Ohcejohkalaččat fertejit dál álgit hárjehallat dan luossabivddu”

Dán artihkkalis gávnnat Luossariemuid bohtosiid ja video das, mo gilvu ovdánii.

Luossagonagasat jagis 2019.
Gilvvu vuittiiga guvttiin guliin 15-jahkásaš Samu Hautamäki Pedersöres eret ja Kimmo Kemppainen Kivijärvis eret. Sudno guokte luosa dettiiga oktiibuot 15,7 kilo. Govva: Kaija Länsman / Yle
ohcejohka

Galbma davádaga dihte dálvebiktasat eai lean liigi dán jagi Luossariemuin. Lávvardahkii ledje einnostan Ohcejohkii njuolga neavrresdálkki.

Lihkká gilvvuide oasálaste 111 olbmo ja 6 joavkku vel, muitala gilvvuid jođiheaddji Jarmo Helander.

– Gal dat dálki balddii olbmuid. Munge dieđán máŋgasa, geat ledje suorganan dan dálkkis, eaige vuolgán goallut Deanu ala. Dálkái mii eat veaje maidige, dadjá Helander.

Samuel Vuolab oassálasttii luossagonagasgilvui ovttas Elisa Kuvajain.

– Dálki ii lean nu heittot maid ledje lohpidan. Dan dihte masá in oba vuolgánge. Dat lea bures mannan, gáddái leat boahtán buohkat, muitala Vuolab.

Samuel Vuolab Ohcejogas.
Vaikko Samuel Vuolab ii goddánge otne luosa ja vuoitán luossagilvvu, son lei buriin mielain. Govva: Kaija Länsman / Yle

Soai eaba goddán luosa, muhto Vuolab máhtii illudit sin beales, geat godde. Dat dárkkuha Vuolab mielas dan, ahte go guolli goddo, de Luossariemuin lea boahtteáigi.

Songe beasai vásihit dán geassái juoidá ođđa.

– Dat ii munnos gal ii gaikkehange. Vuosttas geardde geasis oidnen guliid njuikumen, govvida Vuolab.

Gilvvuid jođiheaddji: Dábálaččat báikkálaččat birgejit luossagilvvus

Dáid gilvvuin godde oktiibuot ovcci guoli. Luossariemuid leat ordnen 38 geardde. Dál lei vuordimis, ahte gilvvu olles historjjá viđátčuođát guolli goddo. Nuhan dat goddui, gilvvu maŋimuš bottuid áigge, muitala Helander. Dan gottiiga Kjell Aalto Ohcejogas ja Mika Purola Helssegis.

Gilvvuid golbma buoremusa ledje olgobáikegottálaččat. Dat gal lea beanta imaš, smiehtada Helander.

– Historjjálaš dáhpáhus. Ii dáidde goassige gilvvuid historjjás geavvan nu, ahte golbma buoremusa leat olgobáikegottálaččat.

– Ohcejohkalaččat fertejit gal dál álgit hárjehallat dan luossabivddu. Vai leatgo mii jo nu boarásmuvvan, ahte mii eat šat nodde suhkat dan láhkai, ahte luossa dohppešii, reašká Helander.

Dán siiddu áibbas loahpas gávdnojit dieđut sis, geat ovddit jagiin leat vuoitán luossagonagasvuođa.

Videos oainnát mo gilvobeaivi manai Deanu alde.

Video: luossariemu 2019.
Luossariemut Ohcejogas 2019

Luossagonagas áiggui vuoittu maŋŋá mannat nohkkat ja iđđes fas suhkat

Gilvvu vuittiiga guvttiin guliin 15-jahkásaš Samu Hautamäki Pedersöres eret ja Kimmo Kemppainen Kivijärvis eret. Dán jagi luossagonagasaid guokte luosa dettiiga oktiibuot 15,7 kilo.

-Áibbas buorre dovdu. Binná geassá moji, dadjá Hautamäki várrugasat.

-Vuogga lei dakkár čáhppat ja binnáš girjái. Diddi dohppii dan seamma vuggii, muitala Kemppainen.

Menddo sakka eaba áiggo ávvudit, muitala Kemppainen.

-Gánda manná nohkkat ja iđđes fas suhkat. Dan gal in dieđe maid ieš áiggun, geažida Kemppainen.

Loga dás luossariemuid bohtosiid:

NammaRuoktobáikiLuossakilot
1. Samu HautamäkiPedersöre15756
1. Kimmo KemppainenKivijärvi15756
2. Jarno SaukonojaNivala11511
2. Olli SuorsaKalajoki11511
3. Jorma HämäläinenSuolahti8804
3.Joni HämäläinenTurku8804
4. Mateus MoilanenOhcejohka6696
5. Veikko KoivistoLappeenranta6046
5. Marko KyyrönenVantaa6046
6. Juhani KaaveSuoločielgi3403
6. Oskari HelanderOhcejohka3403
7. Kjell AaltoOhcejohka2432
7. Mika PurolaHelsinki2432

Varrasamosat: Sápmi

Váldoođđasat

Varrasamosat

Muualla Yle.fi:ssä