Säämi

Maailm vuossâmuš livđeskiärru almostuvá porgemáánust – “Kalehân tast lii hirmâd stuorrâ merhâšume”

Kuobžâ-Piäká Ánná, Anna Morottaja lii rähtimin skiäru. Skiärru lii maailm vuossâmuš livđeskiärru já almostittemkonsert lii Ijâttes Iijâst porgemáánu 16. peeivi.

Ijahis Idja 2018
Anna Morottaja tijmá Ijâttes Iijâst. Govva: Vesa Toppari / Yle

Kuobžâ-Piäká Ánná, Anna Morottaja lii rähtimin maailm vuossâmuu livđeskiäru. Sust lii lamaš mielâst kuhháá, ete kolgâččij rähtiđ já tääl sun illood ko skiärru lii viijmâg puátimin.

– Muu skiäru nommâ lii Livđe. Toh láá enâmustáá toh ärbivuáváliih livđeh moh láá tobbeen arkkâdâhpaadijn já mun lam ráhtám tain jieččân tulkkuumijd, muštâl Morottaja.

Skiärust láá fáárust meiddei kulmâ uđđâ livđe. Skiäru almostittemkonsert lii Ijâttes Iijâst 16. peeivi porgemáánu. Konsertist piäsá kuullâđ magareh livđeh skiärust láá.

– Tot lii tot jiäráskittee äšši, ij tuš must mutâ eres-uv skiärrurähtein, ete kiergân-uv tot tohon, muštâl Morottaja.

Anna Morottaja
Anna Morottaja uđđâ skiäru nommâ lii “Livđe” . Govva: Ulla Isotalo

Morottaja lii jieš pyevtittâm skiäru. Sust láá kuittâg ulmuuh iššeen paddiimist já skiäru graafisâš sundáttâlmist.

– Mun lam jieš pyevtittâm tom já jieš porgâm puoh, te ennuvhân tast lii lamaš pargo já opâttâllâm, iätá Morottaja.

Skiäru merhâšume lii styeres anarâškielân, mutâ meiddei kulttuurân.

– Lokketevstáid lam čáállám, ete taat lii maailm vuosmuš livđe-skiärru, te kalehân tast lii hirmâd stuorrâ merhâšume sehe kulttuurân muusikpiälán já kielân materiaal kost älgiđ kuldâliđ já opâttâllâđ, juurdâš Morottaja.

Varrasamosat: Säämi

Váldoođđasat

Varrasamosat

Muualla Yle.fi:ssä