Sápmi |

Máŋggat lappilaš tákseeaiggádat dáhpejit, go Kela-sáhtuid bálvalusa buvttadeaddji molsašuvvá – sámegielagiid fástatáksevuoigatvuohta seailu

Davvin nu gohčoduvvon Kela-sáhtuid bálvalusa buvttadeaddji molsašuvvá juovlamánus, muhto sámegielagiin lea sámeguovllus ain riekti geavahit iežaset gielat fástatáksiid sámi giellalága dihte.

Video: Taksiautoilija Jouni Ilmari Romppanen taksissaan.
Sámi giellalága ánssus sámeguovllu olbmot ožžot geavahit sámegielat taksiid buohccisáhtuin, vaikke ortnet nuppástuvvá. Video: Vesa Toppari ja Kirsti Länsman / Yle

Lappi eanangotti ássiid buohccisáhtuin dahjege nu gohčoduvvon Kela-sáhtuid bálvalusa buvttadeaddji molsašuvvá juovlamánu beallemuttus. Helssetlaš Menevä Oy fuolahišgoahtá Kela-sáhtuin 15.12. rájes.

Suoma álbmotealáhatlágádus lágidii sáhtuid vuodjimis fálaldatgilvvu, man helssetlaš Menevä Oy vuittii. Davvin áššis leat ságastallan, muhto álbmotealáhuslágádusas deattuhit, ahte sámegielagiin lea sámiguovllus riekti geavahit sámegielat táksiid sámi giellalága ánssus.

Goit Anáris besset servvodaga sáhtuid vuodjit golbma sámegielat tákseeaiggáda. Guokte Čeavetjávrris ja okta Leammis. Leammilaš tákseeaiggát Jouni-Ilmari Jomppanen joatkáge vuodjima nu mo ovdalge.

– Na dat ii gal váikkut mu eallimii mainnage lágiin, ahte seamma láhkai joatkašuvvá go ovdalge.

Jouni-Ilmari Jomppanen
Kela-sáhtuid ođđa buvttadeaddjis fuolakeahttá Leammi tákseeaiggát Jouni-Ilmari Jomppanen joatká táksesáhtuid vuodjima nu mo ovdalge. Govva: Vesa Toppari / Yle

Bálvalusa buvttadeaddji molsašuvvama dihte oahpes sámegielat fástatákse sáhttá goittotge molsašuvvat. Jos áššehasvuohta ii joatkašuva, Menevä Oy čujuha áššehassii ođđa sámegielat fástatákse.

Doaibmanrávvagat ođđa fástatákse oažžumii ja fástatákse oktavuohtadieđut gávdnojit suomagilli Menevä Oy neahttasiidduin.

Fitnodat áigu dikšut vuodjindoaimma beaktilabbot

Kela-sáhtuid bálvalusa buvttadeaddji molsašuvvama dihte jáhkkimis badjel čuođi lappilaš tákseeaiggáda masset stuorra oasi dietnasis. Fitnodat goit lohpida fuolahit doaimmas.

– Dárkkuhus lea dikšut vuodjindoaimma beaktilabbot ja unnit biilameriin nu, ahte geat leat das mielde, de sidjiide reahkká bargu, dadjá Menevä-fitnodaga Davvi-Suoma guovlomeašttir Toni Kähkönen.

Olles Lappi guovllus dábálaš táksiid dietnasis juoba 70 proseantta lea čoggon dáid buohccisáhtuin. Jouni-Ilmari Jomppanen ii leat vel loahpalaš rehkega časkán dán áššis.

– Mun in leat dan rehkenastán, muhto dainna lágiin lean jurddašan, ahte dieđusge dalá ektui dat váhá bohtet gahččat dat bohtosat.

"Hattithan eai eisige leat buorit"

Dál Kela-sáhtuid leat vuodján badjel 300 biilla, muhto Menevä Oy válddii dušše sullii 200 biilla fárrui Kela-sáhtuide davvin.

Ovdamearkka dihte Avvila márkana badjel 30 biillas logi besset fárrui dán vuodjinrieggái. Dát biillat leat Ivalon taksipalvelu tákset. Sii geat besset joatkit dáid sáhtuid, geahččalit ceavzit.

– Hattithan eai eisege leat buorit dán hommás, muhto gal mii biilaeaiggádin galggašeimmet beassat lieggasa beallai dán doaimmas nu ahte dat lea gánnehahtti. Dat gáibida earret eará dan, ahte guorosnága eat šatta vuodjit, dadjá Ivalon taksipalvelu jođiheaddji Jaakko Kallioinen.

Jaakko Kallioinen
Ivalon taksipalvelu beaivválaš jođiheaddji Jaakko Kallioinen oaivvilda, ahte vaikko hattit eai leat buorit, de galggaše biilaeaiggádat beassat goit lieggasa beallái. Govva: Vesa Toppari / Yle

Máŋgasat Anára gielddas livčče háliidan fárrui Kela-sáhtuid vuodjimii, muhto vuollel bealli beasai, muitala vuodjinrieggá olggobeallái báhcán avvillaš tákseeaiggát Jukka Aittokoski.

– Funeshan munnje geavai. Dieđusge livččen háliidan fárrui, nugo várra 90 proseantta Anára gieldda táksiin.

Varrasamosat: Sápmi

Váldoođđasat

Varrasamosat

Muualla Yle.fi:ssä