Säämi |

Mahtsun tääl kolgâččij lihâdiđ já puurrâđ? – Keejâ video olgolihâdemkoonstâin

Lihâdem luhostuvá pääihist-uv, ko máttá kevttiđ mielâkuvviittâs. Marja Guttormist já Ritva Torikkast láá maaŋgâlágáneh koonstah jieškote-uv lihâdemvuovijd.

Video: Marja Guttorm
Guttorm Máárjá lihâdem koonstah ko ij peesâ sävrisalin.

Aanaarlâš Marja Guttorm loptee luuvdá já vonâttâl seelgi. Olgon piäiváduvvâst lii suotâs lihâdiđ.

Guttorm lii toollâm lihâdemkuursâid Aanaar aalmuglâšopâttuvvâst. Koronavirustile tiet sun ij peesâ innig toollâđ kuursâ. Stivrejum lihâdem lii maŋgâsáid tehálâš, iäge puohah viišâ ohtuu lihâdiđ.

– Mun lam huámmášâm, ete mun jieš jiem viišâ nuuvt ennuv lihâdiđ. Jis tun lah lijkkum liihâdmân ain, te talle tot luhostuvá pyerebeht, sun iätá.

Maht tääl talle kolgâččij lihâdiđ?

Guttorm leggist toppiittâhtiädu moovtân pajas, forgâ pivâstâh kale kolgá!

– Mun lam smiettâm, ete väzzim lii pyeri, kaččâm, čuoigâm já suábbiväzzim. Vyeimi puáhtá talle hárjuttâllâđ, ko piäsá sávrusalin. Roopâtipšom lii muu mielâst tehálâš, vonâttâllâm, Guttorm rävvee.

Guttorm lii meid toollâm toppiittâhtiäddukuursâid Anarist. Maŋgâsijn lii toppiittâhtiäddu pääihist já uánihâš-uv lihâdempuddâ pijssáá.

– Pyereeb lii olgon, mun jiem viišâ tääbbin pääihist siste. Muu mielâst tijmepeeli lii jo pyeri, sun muštâl.

“Jis mun halijdâm lihâdiđ pääihist, puávtám tom porgâđ”

Aanaarlâš Ritva Torikka tuálá kieđâin hula-riegis. Spiekâstâhtiileest liihâdmân tarbâšuvvoo mielâkuvviittâs, mutâ Torikkast tot luhhoost kávnoo.

Torikka lii jottáám stivrejum liihâdmist. Tääl sun lii kolgâm hutkâđ uđđâ vuovijd lihâdiđ.

– Tothân tääl nuuvâi tiäđust-uv ko poođij tot koronavirus. Tääl ferttee hutkâđ maidnii muide. Tääl láá lamaš muotâpargoh, ete toh láá puáhtám tom lihâdem, sun povvust.

Ritva Torikka
Ritva Torikka kalga tääl jieš keksiđ, maht liihâd, ko stivrejum liihâdmeh láá nuuhâm Govva: Anja Kaarret / Yle

Vuáváámeh sust lihâdem várás kale láá. Sun ááigu ruggâđ savehijd ráájust já čuoigâliđ. Pääihist-uv lihâdem kale luhostuvá.

– Jis mun halijdâm lihâdiđ pääihist, mun puávtám tom porgâđ, puávtám kevttiđ jieččân roopâ já must láá meid tiäduh, sun muštâl.

Sun ij liihâd nuuvt távjá tääl, ko ohtuu ferttee lihâdiđ. Vaigâdumos äšši sunjin lii tot, ete piäsá joton.

– Ferttee uážžuđ jieijâs joton. Ko váhá vuálgá olgos, te šadda pyeri mielâ. Tot vissâ lii tot stuárráámus hommá, ete kiško jieijâs olgos, sun povvust.

Tiervâsliih purrâmušah láá ovdâmerkkân myerjih, heđâlmeh já kyeleh

Marja Guttorm muštoot, ete tääl lii tehálâš kiddiđ huámmášume meid toos, maid porá. Pizza já limonaad iä lah tiervâsliih muulsâiävtuh.

– Smietâ váhá, ete maid tun puurah. Kannat smiettâđ, ete purrâmušâst láá raavvâdamnâseh. Lam ain smiettâm, ete mun tarbâšâm vitamiinijd, muorjijd, putes purrâmuš, heđâlmijd, kyele já kale tom poccuu piärgu meiddei, sun muštâl.

Jis ubâ peeivi viälláá sohvá alne, iä naharehkin ruttii ehidist. Jis liihâd, te uáđá meid pyerebeht.

– Tondiet tot lihâdem lii tehálâš, ete uáđáh pyereest. Jis ubâ peeivi smietah korona, te tun jieh vaje ko smiettâđ já tun jieh pyevti uáđđiđ, sun iätá.

Ritva Torikka
Ko liihâd tuárvi, te nahareh-uv puátih pyerebeht. Govva: Anja Kaarret / Yle

Jis koronavirus lii tovâttâm vädisvuođâid uáđimân, te liihâdmáin puáhtá vaibâdiđ jieijâs nuuvt, ete vissásávt uáđá pyereest.

– Jieht mun eellim Aanaarjäävrist čuoigâmin 10 kilomeetterid já muotâpargoid porgâmin kyehti tijme, kale mun lijjim nuuvt vaibâm, sun povvust.

Koronauđđâseh láá tääl jyehi saajeest, televisiost, radiost já neetist, mutâ sun ij lah tain perustum.

– Mun koolgâm pieijâđ TV kiddâ, ko jiem pyevti kuldâliđ, ko ubâ ääigi puátih, sun iätá.

Tääbbin uáináh lase Máárjá lihâdemvideoid.

Varrasamosat: Säämi

Váldoođđasat

Varrasamosat

Muualla Yle.fi:ssä