Sápmi

Maiddái duddjoma sáhttá oahppat neahta bokte – soai háliideaba seailluhit duodjeárbevieru ja nu šadde duodjevideot

elle-máret helander
Duojár Elle-Máret Helander háliida sirdit iežas dieđu ja máhtu videoid bokte. Govva: Anneli Lappalainen / Yle

Nubbi duojáriin háliida sirdit iežas duodjemáhtu ovddos guvlui, nubbi fas háliida movttiidahttit sámenuoraid duddjot amas duodji jávkat.

Dán áigge máŋggaid áššiid sáhttá oahpahallat neahta bokte ja oahpahusvideot gávdnojit measta juohke áššái interneahtas. Dál maiddái dujiid oahpahallan lihkostuvvá videoid bokte.

Beakkán anárlaš duojár Elle Biehtár Elle-Máret, Elli-Maarit Helander lea duddjon iežas nuorravuođa rájes ja dál son juohká iežas máhtu maiddái earáide.

Helandera nieida Linda Louhekari lea govven ja almmustahttán duodjevideoid, main Helander oahpaha duddjot.

– Dieđusge munge álggán leat dan ahkásaš, ahte mun háliidivččen sirdit duoji, ahte juos eai máhte, de sáhttet das geahččat mo galgá ráhkadit.

Ii sáhte lohkat, ahte dákkár duodjevideot livčče vel valjis. Helandera mielas duodjevideot galggašedje leat eanetge.

– Go dálhan mánát eai šat oahpa seammaláhkai nugo ovdal, ahte ohppe ruovttus. Muhtumat, geat leat čeahpit, duddjojit earáge duoji go sámi duoji, de sii sáhttet oahppat maiddái dain videoin. Dat lea maiddái ovttaláhkai, mo don sirddát dan dieđu ja oahpu maid don máhtát.

Dán rádjái Helander lea duodjevideoin oahpahan, mo galgá ruvdet ja bárggežiid bárgidit. Plána lea goittotge govvet ja almmustahttit oahpahusvideo maiddái gáktegoarrumis.

elle-máret helander
Elle-Máret Helander áigu boahtte geasi oahpahit video bokte gávtti goarruma. Govva: Anneli Lappalainen / Yle

Helander lea duddjon ja oahpahan rumbbuid ráhkadeami. Son jáhkká dange livčče vejolaš oahpahit video bokte, muhto álki dat ii livčče.

– Dat lea olu váddásut, dan galgá nu hirbmat bures plánet ja smiehttat, mo don čájehat dan vai nubbi ádde.

Nuorra duojára mielas livčče somá YouTubes gávdnat rávvagiid duddjomii

Kárášjohkalaš Elle Nystad lea maiddái govvegoahtán duodjevideoid. Su mielas duodji galggašii oidnot eanet ja duddjoma oahpahallan galggašii leat álkit.

– Dat lea váilevašvuohta. Ii leat nu, ahte juos don háliidat oahppat duoji, de don sáhtát beare ohcat YouTubes, mo galgá duddjot garraduoji, mo galgá guorrut. Muhto dat livčče hui fiinnis gal, juos dat livčče eanet.

Eadni oahpaha su duddjot ja Nystad háliidage juohkit ohppojuvvon áššiid maid eará sámenuoraide. Vuosttaš videos son oahpaha mo galgá riessut.

Elle Nystad
Kárášjohkalaš Elle Nystad oaivvilda, ahte lea dehálaš seailluhit duodjeárbevieru. Govva: Priváhtta

Háliida videoiguin inspireret ja movttiidahttit eará nuoraid duddjot

Elle Nystad mielas duodji ii galgga jávkat ja ballu leage dat, mii su movttiidahttá duddjot.

– Mun jáhkán mun ja hui olu earáge sápmelaččat oaivvildit, ahte lea dehálaš seailluhit duoji boahtte buolvvaide ja earenoamážit nuoraide. Danne mun maiddái geahččalan ráhkadit videoid vai sáhtán inspireret ja movttiidahttit eará nuoraid álgit duddjot.

Nystad lea ožžon olu rámi earenoamážit rávesolbmuin iežas videoin. Buorre máhcahat movttiidahttá su ráhkadit lasi videoid.

– Sii oaivvildit, ahte mun dagan dakkár kulturbarggu, go sihke giela ja duoji lean dál váldán mu YouTube kanálii.

Dán áššis oainnát lasi beaivvi Yle Ođđasat -sáddagis. Yle Ođđasiid Sámis ja Beaivvi ságaid sáhtát maid guldalit Yle Areenas.

Varrasamosat

Muualla Yle.fi:ssä