Sápmi |

Maiddái eaktodáhtolaččat Anára roggamiin

Anáris ordnijedje dán čavčča arkeologalaš roggamiid, mas eaktodáhtolaš oassálastit mákse unna supmi, mii gokčá goluid. Arkeologa Oula Seitsonen Helssega universitehtas muitala, ahte Suomas eaktodáhtolaččaid oassálastin roggamiidda oppalohkái lea hárvenaš.

Roggamat Anáris.
Govva: Inger-Elle Suoninen / Yle Sápmi

Dán čavčča Anára girkosiidda lahkosis leat roggan nuppi máilmmisoađi áigásaš duiskalaš soahtebuohcceviesu bázahusaid.

Anáris ordnejuvvui almmolaš vahku bisti roggan, masa oassálaste lagabui 10 eaktodáhtolačča.

Anára roggamiidda oassálastán eaktodáhtolaččat galge máksit unna oassálastinmávssu. Helssega universitehta dutki ja arkeologa Oula Seitsonen muitala, ahte Suomas lea hárvenaš, ahte eaktodáhtolaččat besset oassálastit roggamiidda.

Helssega Universitehta dutki ja arkeologa Oula Seitsonen.
Helssega Universitehta dutki ja arkeologa Oula Seitsonen. Govva: Inger-Elle Suoninen / Yle Sápmi

– Olgoriikkain dat lea dábálut, ahte eaktodáhtolaččat mákset das, ahte besset searvat roggamiidda. Suomas dat lea hárvenaš, ahte eaktodáhtolaččat besset oppalohkái oassálastit roggamiidda, muitala Seitsonen.

Beassá oahpásmuvvat arkeologalaš bargui

Maiju Kolehmainen Helssegis lea okta dain 10 eaktodáhtolaččas, geat leat beassan Anárii roggat.

Helssetlaš Maiju Kolehmainen.
Govva: Inger-Elle Suoninen / Yle Sápmi

– Moai bođiime isidiin deike. Lean beroštuvvan historjjás, Sámis ja luonddus ja lean álot háliidan geahččalit dákkára. Lea somá oaidnit maid arkeologat barget, muitala Kolehmainen.

Anára roggamiin bohte eanet gávdnosat go ledje vuordán. Roggit gávdne jáhkkimis ráju mii lei buollan, ja danin ovtta sajis dahke olu gávdnosiid.

– Gávdnosiin lea máŋga spánja dievva porseliinna ja iešguđetlágan unna buohcceviessodoibmii laktaseaddji gávdnosa, dálkkascirggastagat, termomehtera bihtát ja dálkkasburkke lohkit ja bihtát ja dien diekkárat, muitala Seitsonen.

Geahča eanet áššis otná Yle ođđasiin diibmu 15.15 Yle TV1:s ja Davviriikalaš Sámi tv-ođđasiin diibmu 20.45 Yle Fem-kanálas.

Varrasamosat: Sápmi

Váldoođđasat

Varrasamosat

Muualla Yle.fi:ssä