Sápmi |

Maiddái Ohcejogas bidjagohtet eanet návccaid dálveturismii – dálveturisttaid mearri lea jo lassánan

Olles Davvi-Suopma geasuha dálvet olu turisttaid. Deaddu dovdo maiddái Ohcejogas, gos fitnodatdoallit fertejit dál satset dálvesesoŋŋii.

Tiina Salonen ja Mika Länsman.
Tiina Salonen ja Mika Länsman leaba leamašan vihtta jagi fitnodatdoallin Aurora Holidays -fitnodagas. Govva: Vesa Toppari / Yle

OHCEJOHKA Dálvet Ohcejoga márkanis eai bálljo turisttat oidno. Veahážiid mielde eanet ah eanet dálveturisttat gávdnet goit eará Sámi gilážiid lassin maiddái Ohcejohkii.

Ohcejoga gieldda ovddidan- ja ealáhushoavda Eeva-Maarit Aikio lohká fitnodatdolliid bargan dan ovdii, ahte gilli geasuha maiddái dálvet.

– Dasa leat varra máŋggat ákkat, manin Ohcejohka geasuha dálvet. Okta dieđus lea dat, go Deanu soahpamušas álge hupmat máŋga jagi dassái, nu min fitnodatdoallit álge ovddidit garrasit sin doaimmaid, ja investerejedje ja márkanaste maiddái dálvesesoŋŋa.

– Dálveturisma lea garrasit lassánan olles Lappis ja Sámis, nu galhan dat deaddu oidno maiddái dáppe, muitala Aikio.

Eeva-Maarit Aikio
Ohcejoga gieldda ovddidan- ja ealáhushoavda Eeva-Maarit Aikio lohká, ahte fitnodatdoallit leat bargan dálveturismma ovdii stuorámus barggu. Gielda bargá duogášbarggu. Govva: Vesa Toppari / Yle

Vaikko dálveturisttat eai vel dán dilis jur dihtto Ohcejoga márkanis, fitnodatdoallit goit satsejit dál dálveturismii. Seamma, mii geasuha mátkkošteddjiid eará báikegottiide, geasuha maiddái sin guvlui. Guovssahasat ja sevdnjes áigihan Ohcejogas reahkká.

– Gal dat lea jorggihan nu, ahte dálvesesoŋŋa lea mis dat stuorát, masa bidjat návccaid. Eandalii guovssahassesoŋŋa, mii bistá vihtta mánu dáppe Ohcejogas. Geassi jorrá ain guolásteddjiiguin, muhto gal dange geahččalit márkanastit maiddái olgoriikkalaččaide, muitala fitnodatdoalli Tiina Salonen Ohcejogas.

Sihke fitnodatdoalli ja gieldda ovddidan- ja ealáhushoavda muitalit, ahte dálveturisttaid mearri lassána Ohcejogas. Turisttat lávejit orrut márkana olggobealde, ja danin sin eai oainne márkanis.

Maiddái gielda bidjá návccaid turismii

Ohcejoga gielda lea gidden fuomášumi fitnodatdolliid bargui. Gielddas leatge jođus máŋga fidnu, maiguin dorjot turismma dárbbuid, muhto main maiddái báikkálaččat váldojuvvojit vuhtii.

Gielddas leat dál jođus Ealáhusaid ovddidanfidnu ja Turismma eanangeavahanplána -prošeakta. Fidnuiguin sii leat ođasmahttán Ohcejoga mátkkoštanimago ja smiehtadan ođđa bálvalusaid. Aikio muitala, ahte Turismma eanangeavahanplána -fidnus sii čielggadit, gosa sáhttet ovdamearkka dihte ráhkadit máđiiijaid, go stuorra oassi gieldda eatnamiin lea suodjaluvvon.

Ohcejogas leat maiddái eará turismii laktáseaddji fidnut boahtime. Gielda lea ožžon ruhtadeami vásttolaš mátkkošteami ovddidanfidnui. Fidnui ohcet dál bargi ja dan ulbmilin lea fokuseret dasa, ahte eai šatta olu čitnabázahusat, ja giddet fuomášumi maiddái kultuvrralaš ja sosiálalaš gierdevašvuhtii.

Aikio lohká, ahte gielda bargá duogášbarggu, guovlomárkanastima, strategalaš linnjemiid, eanangeavahanplánaid ja ordne skuvlejumiid.

– Fitnodatdoallit leat bargan dás dan stuorámus barggu, lohká Aikio.

Tiina Salonen
Tiina Salonen lea johtán gieldda ordnen skuvlejumiin ja lohká dain leamašan ávkki. Govva: Vesa Toppari / Yle

Fitnodatdoalli Tiina Salonen Ohcejogas oaidná, ahte gieldda ordnen skuvlejumiin lea ávki.

– Mun lean oalle olu johtán gieldda ja dáid fidnuid bokte ordnejuvvon skuvlejumiin ja infodilálašvuođain. Doppe gal olu ordnejit oba áigge, go daidda fal beasašii oassálastit. Dat lea oalle olu, olu galgá ieš bargat ja smiehttat maid bargat, muhto gal dain leamašan ávki, muitala Salonen.

Varrasamosat: Sápmi

Váldoođđasat

Varrasamosat

Muualla Yle.fi:ssä