Sápmi |

Maiddái Skábmagovat muittuha gussiidis fuolahit giehtahygienas – lasihit desinfiserenávdnasiid navdon koronavirusnjoammuma dihte

Skábmagovaid veahkkebuvttadeaddji Anni Koivisto goittot sávvá, ahte olbmot eai ballá navdojuvvon njoammumis nu, ahte eai dan dihte boađe festiválii.

Anni Koivisto
Skábmagovaid veahkkebuvttadeaddji Anni Koivisto muitala, ahte sii leat lasihišgoahtán gieđaid desinfiserenávdnasiid festivála dáhpáhusbáikkiide. Govva: Torgeir Varsi / NRK Sápmi

Eamiálbmogiid filbmafestivála Skábmagovat lea olles fártta jođus Anára márkanis. Festivála álggii rahpandilálašvuođain duorastateahkes ja iešguđetlágan dáhpáhusat joatkašuvvet gilis gitta sotnabeaieahkedii.

Oktanaga festiválain Anára gielddas beaggá eahpádus koronavirusnjoammumis.

Skábmagovaid veahkkebuvttadeaddji Anni Koivisto muitala, ahte sii leat jo reageren dáidda ođđasiidda. Festiválas leat maŋimuš jagiid galledan sullii 4 000 olbmo. Dán olmmošmeari lassin Anára márkanis leat dáid áiggiid ollu turisttat.

– Dieđus mii muđuige ávžžuhit, ahte olbmot fuolahit giehtahygienas dákkár festivála áigge.

– Muhto dál dieđus eandalit olbmot fertejit fuolahit das, ahte basset gieđaideaset. Mii leat maid lasihan festiválii máŋgga báikái giehtadesinferenávdnasiid ja šilttaid vuoi olbmot sihkkarit gávdnet ávdnasiid ja fuomášit geavahit daid, Koivisto čilge.

– Ja dieđus jos orru, ahte lea buozus, de dasto ferte báhcit ruoktot.

Veahkkebuvttadeaddji goittot sávvá, ahte olbmot eai ballá navdojuvvon njoammumis nu, ahte eai dan dihte boađe festiválii.

– In mun goit hálit, ahte olbmot báhcet ruoktot dušše dan eahpádusa dihte. Dieđusge muhtumat sáhttet dan dihte báhcit eret, muhto in mun jáhke, ahte dat nu ollu váikkuha festivála gussiid mearrái.

Maiddái Skábmagovain vurdet dieđu kiinnálaš turisttaguoktás váldojuvvon čájánasaid bohtosiin. Daid birra leat lohpidan Suomas muitalit bearjadateahkeda áigge.

– Miihan gullat, leago dárbu vel eanet fuolahit ja váldit ášši monu vuhtii. Gal mii dieđusge fertet smiehttat, mo mii doaibmat, jos dat dávda duođai lea koronavirus.

Varrasamosat: Sápmi

Váldoođđasat

Varrasamosat

Muualla Yle.fi:ssä