Sápmi

Maiju Saijets lea válljejuvvon Yle Sámi hoavdan

Filosofiija magisttar Maiju Saijets lea válljejuvvon Yle Sámi ođđa hoavdan. Ovddeš hoavda Pirita Näkkäläjärvi celkkii iežas eret suoidnemánus.

Yle Sápmin päällikkö Maiju Saijets
Govva: Vesa Toppari / Yle

Yle Sámi ođđa hoavdan lea válljejuvvon filosofiija magisttar Maiju Saijets. Son álggaha hoavdan 11.12.2017.

Saijets bargá dál Yle Sámi vástideaddji buvttadeaddji sadjásažžan. Son lea ovdal bargan Yle Sámi ođasdoaimmaheaddjin ja ođashoavdda sadjásažžan sihke Yle Rovaniemi doaimmaheaddjin.

Saijets lea bargan ovdal maid máŋggaid jagiid prošeaktabargguid Sámemusea Siiddas ja Sámedikkis.

– Lean hui rámis das, go beasan jođihit dakkár mediadálu, mii dovdá Sámi servodaga bures ja mas buvttadit tv-, radio- ja neahttafálaldaga buot Suomas hállojuvvon sámegielaiguin. Iihán dákkár fálaldat leat mange eará mediaásahusas Suomas. Sámegielat mediafálaldat lea hirbmat dehálaš sápmelaččaide dasgo dan bokte sápmelaččaid iežaset jietna ja áššit bohtet oidnosii, dadjá Saijets.

Yle Sápmi bálvala golmma sámegillii

Yle Sámi hoavda vástida Yle sámegielat bálvalusa bargoveagas, ruhtadoalus, strategiija ollašuhttimis sihke journalismma ja doaimma ovddideamis.

Yle Sámi doaimmahusas barget 18 doaimmaheaddji Eanodagas ja Anáris. Doaimmahus buvttada iežas radiokanálii prográmmaid golmma sámegillii: davvisáme-, anáraš- ja nuortalašgillii. Yle Sápmi barga maiddái tv:ii sámegielat ođđasiid ja mánáidprográmma. Neahtas Yle Sápmi bálvala sámegillii yle.fi/sapmi-siiddus.

Varrasamosat: Sápmi

Váldoođđasat

Varrasamosat

Muualla Yle.fi:ssä