Sápmi |

Márkomeannu lahkona – Anders Sunna hápme festiválaguovllus dáiddabarggu ovttas eará dáiddáriiguin

Dán jagáš dáiddabarggu hápmejit Joar Nango, Unn Kristin Laberg, Anders Sunna, Matti Aikio ja Katarina Pirak Sikku.

Anders Sunna nojaa kaiteeseen.
Anders Sunna lea ráhkadan dáiddabargguid maiddái Suoma bealde, dán govas Sunna málemin murala Oulu gávpogis.

Sámi festivála Márkomeannu váldá vihtta sámi dáiddára mielde ráhkadit sámi dálááiggedáidaga.

Dán jagáš diŋgojuvvon buvtta hástala Joar Nango, Unn Kristin Laberg, Anders Sunna, Matti Aikio ja Katarina Pirak Sikku hábmet dáidaga lundui mii lea festivála birrasis.

– Márkomeannu sihtá hástalit dán 5 sámi dáiddára hábmet visuála dáidaga lundui ja luonddus márkkogilážiin, dadjá sadjásaš buvttadeaddji Anne Henriette Hætta Reinås.

Dán jagáš diŋgojuvvon buktagii šaddá namma #EANAN.

– Namma jo muitala makkár jurdda dan duohken lea, namalassii atnit ealli luondu oassin buktagis, Márkomeannu-festiválas muitalit.

Dáiddárat bohtet iešguđet báikkiin Sámis

Festivála álggahii dáiddaprošeavtta #EANAN:in jo measta golmma jagi dassái, ja buvtta gárvejuvvo dán geasi mielde. Bargu galgá leat válmmaš festiválaguovllus ovdal go festivála álgá.

– Mis leamaš nu lihkku, ahte leat fidnen fárrui moadde dain eanemus gelddolaš dáiddáriin Sámis. Dan lassin ahte sii leat iešguđet báikkiin eret Norggas, Ruoŧas ja Suomas, de lea sis iešguđetgelágan duogáš ja vásáhusat. Ovdamearkka dihte de lea Unn Kristin Laberg báikkálaš dáiddár, ja Matti Aikio ges gullá boazodoallobearrašii Vuohčus, Suomabeale Sámis. Mii leat bargan guhká dáinna diŋgojuvvon buktagiin, ja mii illudat sakka oaidnit dán čađahuvvot, lohká sadjásaš buvttadeaddji Anne Henriette Hætta Reinås.

Norgga Sámediggi, Davvi Kulturoktavuohta, Kulturráđđi ja Nordlándda fylka leat dorjon prošeavtta.

Márkomeannu lágiduvvo Gállogiettis Evenášši suohkanis suoidnemánu 27.-29. b. Festiválaprográmma oainnát dáppe.

Varrasamosat: Sápmi

Váldoođđasat

Bivnnuhamosat

Varrasamosat

Muualla Yle.fi:ssä